lab pe kuchh baat aai jaati hai — Mirza Hadi Ruswa

Talnaa thaa mere paas se ai kaahili tujhe
kam-bakht tu to aa ke yahin Dher ho gai

hans ke kahtaa hai musavvir se vo ghaarat-gar-e-hosh
jaisi surat hai miri vaisi hi tasvir bhi ho

baad tauba ke bhi hai dil mein ye hasrat baaqi
de ke qasmein koi ik jaam pilaa de ham ko

usi par munhasir thi zindagi kyaa
ghaTaa jaataa hai dam zabt-e-fughaan se

apne surat-gar se puchhun main agar maqdur ho
kyaa banaayaa thaa mujhe tu ne miTaane ke liye

ham ko bhi kyaa kyaa maze ki daastaanein yaad thiin
lekin ab tamhid-e-zikr-e-dard-o-maatam ho gaiin