is daur mein insaan kaa chehra nahin miltaa — Moghisuddin Fareedi

ham ne maangaa thaa sahaaraa to mili is ki sazaa
ghaTte baDhte rahe ham saaya-e-divaar ke saath

hai 'faridi' ajab rang-e-bazm-e-jahaan miT rahaa hai yahaan farq-e-sud-o-ziyaan
nuur ki bhiik taaron se lene lagaa aaftaab apni ik ik kiran bech kar

tiri adaaon ki saadgi mein kisi ko mahsus bhi na hogaa
abhi qayaamat kaa ik karishma hayaa ke daaman mein pal rahaa hai

sirf alfaaz pe mauquf nahin lutf-e-sukhan
aankh khaamosh agar hai to zabaan kuchh bhi nahin

ab kisi dard kaa shikva na kisi gham kaa gilaa
meri hasti ne baDi der mein paayaa hai mujhe