ab kisi dard kaa shikva na kisi gham kaa gilaa — Moghisuddin Fareedi

ham ne maangaa thaa sahaaraa to mili is ki sazaa
ghaTte baDhte rahe ham saaya-e-divaar ke saath

hai 'faridi' ajab rang-e-bazm-e-jahaan miT rahaa hai yahaan farq-e-sud-o-ziyaan
nuur ki bhiik taaron se lene lagaa aaftaab apni ik ik kiran bech kar

tiri adaaon ki saadgi mein kisi ko mahsus bhi na hogaa
abhi qayaamat kaa ik karishma hayaa ke daaman mein pal rahaa hai

is daur mein insaan kaa chehra nahin miltaa
kab se main naqaabon ki tahein khol rahaa huun

sirf alfaaz pe mauquf nahin lutf-e-sukhan
aankh khaamosh agar hai to zabaan kuchh bhi nahin

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

ye aansu ponchh lijiye aur muskuraaiye
chaara nahin hai koi bhi rukhsat kiye baghair

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

main ne apni palkon par gham-kade sajaae hain
aarzu ke maatam mein sogvaar hasti hai

husn jalva dikhaa gayaa apnaa
ishq baiThaa rahaa udaas kahin