mujh ko tanhaaiyon ne maaraa hai — Paraveen Rai

kuchh to kahiye hamaare baare mein
kaun hain ham hamein pata to chale

— Paraveen Rai

pahle zakhmon se ham navaaze gae
phir dilaasa diyaa gayaa ham ko

— Paraveen Rai

khaamoshi mein rahne vaale logon ko
sannaaTe ki guunj sunaai deti hai

— Paraveen Rai

us se hi to chalte hain kaarobaar gulshan ke
vo hi raat-raani hai vo hi gul-hazaara hai

— Paraveen Rai

mere ash'aar churaane vaalo
kyaa miraa dard churaa sakte ho

— Paraveen Rai

puchh kar kaun dil dukhaataa hai
haadse kab bataa ke hote hain

— Paraveen Rai

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi

husn jalva dikhaa gayaa apnaa
ishq baiThaa rahaa udaas kahin

— Saifuddin Saif

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq