puchh kar kaun dil dukhaataa hai — Paraveen Rai

kuchh to kahiye hamaare baare mein
kaun hain ham hamein pata to chale

khaamoshi mein rahne vaale logon ko
sannaaTe ki guunj sunaai deti hai

us se hi to chalte hain kaarobaar gulshan ke
vo hi raat-raani hai vo hi gul-hazaara hai

mere ash'aar churaane vaalo
kyaa miraa dard churaa sakte ho

yuun samajhiye ghazal mukammal hai
jab mohabbat baghal mein baiThi ho

pahle zakhmon se ham navaaze gae
phir dilaasa diyaa gayaa ham ko

main baDaa ho gayaa huun magar bachpanaa
mere dil se kabhi bhi gayaa hi nahin

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

chaand ne taan li hai chaadar-e-abr
ab vo kapDe badal rahi hogi

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh