juun shisha bharaa huun mai se lekin — Qayem Chaandpuri

mai pi jo chaahe aatish-e-dozakh se tu najaat
jaltaa nahin vo uzv jo tar ho sharaab mein

— Qayem Chaandpuri

kahtaa hai aaina ki hai tujh saa hi ek aur
baavar nahin to laa main tire ru-ba-ru karun

— Qayem Chaandpuri

gandumi rang jo hai duniyaa mein
meri chhaati pe muung daltaa hai

— Qayem Chaandpuri

iraad kar na paDh ke miraa khat ki ye tamaam
be-rabtiyaan hain samra-e-hangaam-e-ishtiyaaq

— Qayem Chaandpuri

koi din aage bhi zaahid ajab zamaana thaa
har ik mohalle ki masjid sharaab-khaana thaa

— Qayem Chaandpuri

TuuTaa jo kaaba kaun si ye jaa-e-gham hai shaikh
kuchh qasr-e-dil nahin ki banaayaa na jaaegaa

— Qayem Chaandpuri

na tum hosh mein ho na ham hosh mein hain
chalo mai-kade mein vahin baat hogi

— Bashir Badr

sau fasaad ek ishq mein uTThe
boyaa ik tukhm uge hazaar darakht

— Imdad Ali Bahr

kisi ke zakhm par chaahat se paTTi kaun baandhegaa
agar bahnein nahin hongi to raakhi kaun baandhegaa

— Munawwar Rana

dil ki zakhmon ko kiyaa kartaa hai taaza har-dam
phir sitam ye hai ki rone bhi nahin detaa hai

— Zafar Anwar

dil mein rakh zakhm-e-navaa raah mein kaam aaegaa
dasht-e-be-samt mein ik hu kaa maqaam aaegaa

— Zafar Ghauri

'ghaalib' chhuTi sharaab par ab bhi kabhi kabhi
piitaa huun roz-e-abr o shab-e-maahtaab mein

— Mirza Ghalib