kisi alaav kaa shoala bhaDak ke boltaa hai — Saud Usmani

khvaahish hai ki khud ko bhi kabhi duur se dekhun
manzar kaa nazaara karun manzar se nikal kar

ye to duniyaa bhi nahin hai ki kinaaraa kar le
tu kahaan jaaegaa ai dil ke sataae hue shakhs

vo chaahtaa thaa ki dekhe mujhe bikharte hue
so us kaa jashn ba-sad-ehtimaam main ne kiyaa

barun-e-khaak faqat chand Thekre hain magar
yahaan se shahr mileinge agar khudaai hui

un se bhi meri dosti un se bhi ranjishein
siine mein ek halqa-e-ahbaab aur hai

itni siyaah-raat mein itni si raushni
ye chaand vo nahin miraa mahtaab aur hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

safar mein aise kai marhale bhi aate hain
har ek moD pe kuchh log chhuT jaate hain

yuun to maujud apne ghar mein hai
aadmi mustaqil safar mein hai

aaj Duubaa huaa khushbu mein hai pairaahan-e-jaan
ai sabaa kis ne ye puchhaa hai tiraa naam-o-nishaan

qaasid nahin ye kaam tiraa apni raah le
us kaa payaam dil ke sivaa kaun laa sake