itni siyaah-raat mein itni si raushni — Saud Usmani

ye to duniyaa bhi nahin hai ki kinaaraa kar le
tu kahaan jaaegaa ai dil ke sataae hue shakhs

vo chaahtaa thaa ki dekhe mujhe bikharte hue
so us kaa jashn ba-sad-ehtimaam main ne kiyaa

kisi alaav kaa shoala bhaDak ke boltaa hai
safar kaThin hai magar ek baar aakhiri baar

barun-e-khaak faqat chand Thekre hain magar
yahaan se shahr mileinge agar khudaai hui

un se bhi meri dosti un se bhi ranjishein
siine mein ek halqa-e-ahbaab aur hai

khvaahish hai ki khud ko bhi kabhi duur se dekhun
manzar kaa nazaara karun manzar se nikal kar

jhaankte raat ke garebaan se
ham ne sau aaftaab dekhe hain

shor din ko nahin sone detaa
shab ko sannaaTaa jagaa detaa hai

raushni ho rahi hai kuchh mahsus
kyaa shab aakhir tamaam ko pahunchi

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

baat vo aadhi raat ki raat vo puure chaand ki
chaand bhi ain chait kaa us pe tiraa jamaal bhi

shab-e-vaada fasil-e-hijr se aage chamaktaa hai tiraa ism-e-sitaara-ju
ki jaise koi paivand-e-ridaa-e-subh aa jaae kisi qindil ki zad mein