tumhaari yaad baDhi aur dil huaa raushan — Tajdar Adil

har musaafir ke saath aataa hai
ik nayaa raasta hamesha se

milaa thaa hijr ke raste mein subh ki maanind
bichhaD gayaa thaa musaafir se raat hone tak

duniyaa-bhar mein jitne manzar achchhe hain
un kaa husn aur shor havaa kaa tere naam

vo is kamaal se khelaa thaa ishq ki baazi
main apni fath samajhtaa thaa maat hone tak

zakhm kab kaa thaa dard uThaa hai ab
us ke jaane kaa dukh huaa hai ab

meri aankhon mein khvaab hain jis ke
us ki aankhon mein rat-jagaa hai ab

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

yaad aao mujhe lillaah na tum yaad karo
meri aur apni javaani ko na barbaad karo

mujhe kharaab kiyaa us ne haan kiyaa hogaa
usi se puchhiye mujh ko khabar ziyaada nahin

aati hai baat baat mujhe baar baar yaad
kahtaa huun dauD dauD ke qaasid se raah mein

muddatein ho gaiin bichhDe hue tum se lekin
aaj tak dil se mire yaad tumhaari na gai