jis par nazar paDe use khud se nikaalnaa — Wali Uzlat

tiri vahshat ki sarsar se uDaa juun paat aandhi kaa
miraa dil haath se khoyaa to tere haath kyaa aayaa

ishq gore husn kaa aashiq ke dil ko de jalaa
saanvlon ke aashiqon kaa dil hai kaalaa koelaa

jaave thi jaasusi-e-majnun ko taa raahat na le
varna kab lailaa ko thaa sahraa mein jaane kaa dimaagh

main sahraa jaa ke qabr-e-hazrat-e-majnun ko dekhaa thaa
ziyaarat karte the aahu bagula tauf kartaa thaa

jaa kar fanaa ke us taraf aasuda main huaa
main aalam-e-adam mein bhi dekhaa maza na thaa

vo pal mein jal-bujhaa aur ye tamaam raat jalaa
hazaar baar patinge se hai charaagh bhalaa

main baDaa ho gayaa huun magar bachpanaa
mere dil se kabhi bhi gayaa hi nahin

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

main badalte hue haalaat mein Dhal jaataa huun
dekhne vaale adaakaar samajhte hain mujhe

dil-e-haris hi apnaa na ho sakaa qaane
vagarna tere karam mein to kuchh kami na rahi