shab-bhar kaa tiraa jaagnaa achchhaa nahin 'zehraa' — Zehra Nigaah

kahaan ke ishq-o-mohabbat kidhar ke hijr o visaal
abhi to log taraste hain zindagi ke liye

— Zehra Nigaah

jo dil ne kahi lab pe kahaan aai hai dekho
ab mahfil yaaraan mein bhi tanhaai hai dekho

— Zehra Nigaah

uTho ki jashn-e-khizaan ham manaaein ji bhar ke
bahaar aae gulistaan mein kab khudaa jaane

— Zehra Nigaah

koi hangaama sar-e-bazm uThaayaa jaae
kuchh kiyaa jaae charaaghon ko bujhaayaa jaae

— Zehra Nigaah

divaanon ko ab vusat-e-sahraa nahin darkaar
vahshat ke liye saaya-e-divaar bahut hai

— Zehra Nigaah

dekho vo bhi hain jo sab kah sakte the
dekho un ke munh par taale ab bhi hain

— Zehra Nigaah

jhaankte raat ke garebaan se
ham ne sau aaftaab dekhe hain

— Salman Akhtar

raushni ho rahi hai kuchh mahsus
kyaa shab aakhir tamaam ko pahunchi

— Aslam Farrukhi

shor din ko nahin sone detaa
shab ko sannaaTaa jagaa detaa hai

— Saifuddin Saif

raat yuun dil mein tiri khoi hui yaad aai
jaise viraane mein chupke se bahaar aa jaae

— Faiz Ahmad Faiz

ai soz-e-jaan-gudaaz abhi main javaan huun
ai dard-e-laa-ilaaj ye umr-e-shabaab hai

— Akhtar Ansari

itni siyaah-raat mein itni si raushni
ye chaand vo nahin miraa mahtaab aur hai

— Saud Usmani