Asrar Jamayee

kal jo qaatil the vahi aae masihaa ban kar
rahiye in logon se hushyaar chanaa jor garam

apni gharaz ke aage sadaa-e-zamir kyaa
saare takallufaat ko nilaam kijiye

urdu kaa iqbaal bhi dekhaa
aur us ko paamaal bhi dekhaa

leader jo nazar aae to bolo ye adab se
taqrir mein tum garmi-e-whiskey se jilaa do

jantaa kaa khuun bechiye paise kamaaiye
kyon shikva-haae gardish-e-ayyaam kijiye

kuchh der dum hilaaiye aaqaa ke saamne
phailaa ke paanv ghar pe phir aaraam kijiye

zindagi ho miri netaaon ki surat yaa-rab
ho faqat apni gharaz se hi mohabbat yaa-rab

yaaraan-e-ham-mazaaq ki mahfil sajaaiye
jo muttafiq na ho use badnaam kijiye

dal-badal jitne hain kahte hain ye siina taane
ham hain 'ghaalib' ke taraf-daar chanaa jor garam

ye fan pe tabsira to karte nahin zaraa bhi
bas shakhsiyat kaa un ki Dhote phireinge laasha

rahun aazaad na ho qaid-e-maqaami maalik
dil badalnaa ho miraa shaghl-e-davaami maalik