Divakar Rahi

vaqar-e-khun-e-shahidan-e-karbala ki qasam
yazid morcha jiita hai jang haara hai

is daur-e-taraqqi ke andaz nirale hain
zehnon men andhere hain saDkon pe ujale hain

is intizar men baiThe hain un ki mahfil men
ki vo nigah uTha.en to ham salam karen

agar ai nakhuda tufan se laDne ka dam-kham hai
idhar kashti na le aana yahan paani bahut kam hai

saval ye hai ki is pur-fareb duniya men
khuda ke naam pe kis kis ka ehtiram karen

ghusse men barhami men ghazab men itaab men
khud aa ga.e hain vo mire khat ke javab men

ain-fitrat hai ki jis shaakh pe phal aaeinge
inkisaari se vahi shaakh lachak jaaegi

bahut aasaan hai do ghunT pi lenaa to ai 'raahi'
baDi mushkil se aate hain magar aadaab-e-mai-khaana

sochne ki ye baat hai 'raahi'
sochte hi rahe to kyaa hogaa

ab to utni bhi mayassar nahin mai-khaane mein
jitni ham chhoD diyaa karte the paimaane mein

vaqt barbaad karne vaalon ko
vaqt barbaad kar ke chhoDegaa

abas ilzaam mat do mushkilaat-e-raah ko 'raahi'
tumhaare hi iraade mein kami maalum hoti hai