sochne ki ye baat hai 'raahi' — Divakar Rahi

ain-fitrat hai ki jis shaakh pe phal aaeinge
inkisaari se vahi shaakh lachak jaaegi

bahut aasaan hai do ghunT pi lenaa to ai 'raahi'
baDi mushkil se aate hain magar aadaab-e-mai-khaana

ab to utni bhi mayassar nahin mai-khaane mein
jitni ham chhoD diyaa karte the paimaane mein

vaqt barbaad karne vaalon ko
vaqt barbaad kar ke chhoDegaa

agar maujein Dubo detin to kuchh taskin ho jaati
kinaaron ne Duboyaa hai mujhe is baat kaa gham hai

abas ilzaam mat do mushkilaat-e-raah ko 'raahi'
tumhaare hi iraade mein kami maalum hoti hai

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

be-ilm shaairon kaa gila kyaa hai ai 'munir'
hai ahl-e-ilm ko tiraa tarz-e-bayaan pasand

maango samundaron se na saahil ki bhiik tum
haan fikr o fan ke vaaste gahraai maang lo

us ko sochun to dhyaan mein mere
khushbu aati hai pahli baarish ki

tere bin hayaat ki soch bhi gunaah thi
ham qarib-e-jaan tiraa hisaar dekhte rahe