Hasan Barelvi

puchhte jaate hain ye ham sab se
majlis-e-vaz men sharab bhi hai

aa.i kya ji men tegh-e-qatil ke
ki juda ho ga.i gale mil ke

shisha uTha kar taaq se ham ne
taaq pe rakh di saaqi tauba

ek kah kar jis ne sunni ho hazaron baten
vo kahe un se mujhe aap se kuchh kahna hai

jo khaas jalve the ushshaq ki nazar ke liye
vo aam kar diye tum ne jahan bhar ke liye

abr hai gulzar hai mai hai khushi ka daur hai
aaj to Duube hue dil ko uchhalne dijiye

dekh aao mariz-e-furqat ko
rasm-e-duniyaa bhi hai savaab bhi hai

jaan agar ho jaan to kyun-kar na ho tujh par nisaar
dil agar ho dil tiri surat pe shaidaa kyuun na ho

dil ko jaanaan se 'hasan' samjhaa-bujhaa ke laae the
dil hamein samjhaa-bujhaa kar su-e-jaanaan le chalaa

ishq mein be-taabiyaan hoti hain lekin ai 'hasan'
jis qadar bechain tum ho us qadar koi na ho

o vasl mein munh chhupaane vaale
ye bhi koi vaqt hai hayaa kaa

gulshan-e-khuld ki kyaa baat hai kyaa kahnaa hai
par hamein tere hi kuche mein paDaa rahnaa hai