Iqbal Azeem

bil-ehtimam zulm ki tajdid ki ga.i
aur ham ko sabr-o-zabt ki takid ki ga.i

jhuk kar salam karne men kya harj hai magar
sar itna mat jhukao ki dastar gir paDe

yuun sar-e-rah mulaqat hui hai aksar
us ne dekha bhi nahin ham ne pukara bhi nahin

qatil ne kis safa.i se dhoi hai astin
us ko khabar nahin ki lahu bolta bhi hai

ham bahut duur nikal aa.e hain chalte chalte
ab Thahar jaa.en kahin shaam ke Dhalte Dhalte

haath phaila.un main isa-nafason ke aage
dard pahlu men mire hai magar itna bhi nahin

ab ham bhi sochte hain ki baazaar garm hai
apnaa zamir bech ke duniyaa kharid lein

ai ahl-e-vafaa daad-e-jafaa kyuun nahin dete
soe hue zakhmon ko jagaa kyuun nahin dete

junun ko hosh kahaan ehtimaam-e-ghaarat kaa
fasaad jo bhi jahaan mein huaa khirad se huaa

manzil to khush-nasibon mein taqsim ho chuki
kuchh khush-khayaal log abhi tak safar mein hain

jab ghar ki aag bujhi to kuchh saamaan bachaa thaa jalne se
so vo bhi un ke haath lagaa jo aag bujhaane aae the

guftugu nazr-e-ehtiyaat hui
qabl is ke ki ibtidaa karte