Ishrat Bareilvi

شب وصال میں دل پر قلق ابھی سے ہے سحر ہے دور مرا رنگ فق ابھی سے ہے ہنوز دفن ہوا ہی نہیں ترا بسمل کہ زلزلے میں زمیں کا طبق ابھی سے ہے میں لکھ چکا ہی نہیں حال دل کہ اس کی طرف ہوائے شوق میں اڑتا ورق ابھی سے ہے چلا نہیں وہ ارادہ ہی سیر ماہ کا ہے پہ نازکی سے جبیں پر عرق ابھی سے ہے کسی نے شام کے آنے کو کیا کہا عشرتؔ کہ منہ پہ آپ کے پھولی شفق ابھی سے ہے

shab-e-visaal mein dil par qalaq abhi se hai

تشریف شب کو لانا کیوں عار جانتے ہیں شاید کہ آپ ہم کو بد کار جانتے ہیں زلفوں کے پیچ میں ہم گو جانتے نہیں کچھ پر سر پٹک کے اپنا من مار جانتے ہیں وحشت میں جو جو ہم نے پتھروں سے سر کو مارا صحرا میں جا کے پوچھو کہسار جانتے ہیں افسوس جن کی خاطر یوں خلق میں سبک ہیں خاطر کا اپنی ہم کو وہ یار جانتے ہیں یہ بھی نصیب و قسمت گل کھائے جن کے غم میں محفل کا اپنی ہم کو وہ خار جانتے ہیں مطلق نہیں ہے پروا سیر چمن کی عشرتؔ ہم داغ دل کو اپنے گلزار جانتے ہیں

tashrif shab ko laanaa kyon aar jaante hain