Taban Abdul Hai

dekh qasid ko mire yaar ne puchha 'taban'
kya mire hijr men jiita hai vo ghamnak hanuz

khvan-e-falak pe ne.amat-e-alvan hai kahan
khali hain mahr-o-mah ki dono rikabiyan

yahan yaar aur bardar koi nahin kisi ka
duniya ke biich 'taban' ham kis se dil lagaven

vo to sunta nahin kisi ki baat
us se main haal kya kahun 'taban'

main to talib dil se hunga diin ka
daulat-e-duniya mujhe matlub nahin

mujhe aata hai rona aisi tanha.i pe ai 'taban'
na yaar apna na dil apna na tan apna na jaan apna

havaa bhi ishq ki lagne na detaa main use hargiz
agar is dil pe hotaa haae kuchh bhi ikhtiyaar apnaa

buraa na maaniyo main puchhtaa huun ai zaalim
ki be-kason ke sataae se kuchh bhalaa bhi hai

aataa nahin vo yaar-e-sitamgar to kyaa huaa
koi gham to us kaa dil se hamaare judaa nahin

aaine ko tiri surat se na ho kyuun kar hairat
dar o divaar tujhe dekh ke hairaan hai aaj

imaan o diin se 'taabaan' kuchh kaam nahin hai ham ko
saaqi ho aur mai ho duniyaa ho aur ham hon

le meri khabar chashm mire yaar ki kyun-kar
bimaar ayaadat kare bimaar ki kyun-kar