aasmaan se zamin kaa rishta — Arshad Sad Rudaulvi

"tu mujhe bhuul na paaegaa bahut roegaa yaad chehra miraa aaegaa bahut roegaa shab-e-furqat mein barasti hui aankhon mein kabhi jab koi khvaab sajaaegaa bahut roegaa khauf rusvaai ujaale mein sataaegi use tu charaaghon ko bujhaaegaa bahut roegaa pahli baarish se uThegi jo mahak miTTi ki us ko saanson mein basaaegaa bahut roegaa jab mire pyaar ke mahke hue phulon ko kabhi zinat-e-zulf banaaegaa bahut roegaa mujh ko maalum hai tanhaai mein aadat us ki naam likh likh ke miTaaegaa bahut roegaa us ki aankhon mein hai tasvir mire maazi ki aankh darpan se milaaegaa bahut roegaa us ki khaamoshi ki zanjir agar TuTegi qissa-e-hijr sunaaegaa bahut roegaa tujh ko jaanaa hai agar jaa mire hamraahi magar 'saad' bin ji nahin paaegaa bahut roegaa"

"tu ne kyon meri mohabbat kaa bharam toD diyaa hijr qismat mein likhaa aur qalam toD diyaa apne haathon se banaayaa thaa jise apnaa khudaa dil-e-kaa'ba kaa vahi ham ne sanam toD diyaa hijr ulfat kaa vo sahraa hai jahaan majnun ne dhuup mein gham ki jhulaste hue dam toD diyaa zinda rahne ki mire dil mein nahin ab khvaahish is qadar tu ne mujhe ai mire gham toD diyaa vaqt ik aisaa sikandar hai jahaan mein jis ne achchhe-achchhon kaa yahaan 'saad' hasham toD diyaa"

"tu mire ishq ki rudaad nahin samjhegaa kyuun mohabbat mein huun barbaad nahin samjhegaa umr bhar qaid mein rahne ki aziyyat ko kabhi jo parinda rahaa aazaad nahin samjhegaa ahd-e-nau se koi ummid lagaanaa hai fuzul ab koi maqsad-e-fariyaad nahin samjhegaa dosti kyaa hai faqat dost samajh saktaa hai jis ne matlab se kiyaa yaad nahin samjhegaa dil ki viraan gali ham ne sajaai kaise kyuun kiyaa dard se aabaad nahin samjhegaa tujh se main shikva gila kaise karun 'saad' aakhir ye atiyya hai khudaa-daad nahin samjhegaa"

"is naa-muraad dil ki tamanna bhi haae haae khaataa hai choT kartaa hai shikva bhi haae haae taskin tere zikr se hoti to hai magar chubhtaa hai dil mein hijr kaa kaanTaa bhi haae haae main dil ki tirgi se karun jang har ghaDi duniyaa mein har taraf hai ujaalaa bhi haae haae yaadon kaa teri dil mein parinda muqim hai chhoDe kabhi na mujh ko akelaa bhi haae haae barson kisi nazar kaa main kartaa rahaa tavaaf lekin rakhaa gayaa mujhe pyaasaa bhi haae haae barbaadiyon kaa meri tamaashaa ye dekhtaa ghairon ke saath meraa vo apnaa bhi haae haae jannat ko log bhuul gae jis ko dekh kar kitni ajab jagah hai ye duniyaa bhi haae haae tu hi akelaa dard kaa maaraa nahin hai 'saad' kartaa nahin magar koi itnaa bhi haae haae"

"siyaah hoti hui raat par nazar rakhnaa har ek pahlu har ik baat par nazar rakhnaa na jaane kis ghaDi koi ujaaD de basti khudaa ke vaaste haalaat par nazar rakhnaa abhi jo dost hain dushman vo ban bhi sakte hain tum un ke badle khayaalaat par nazar rakhnaa kahin giraa na de kachche makaan ko tere bahut zaruri hai barsaat par nazar rakhnaa badal na jaaein kahin dekh kar sitamgar ko tum apne aap ke jazbaat pe nazar rakhnaa fazaa mein zahr jo ghole zabaan se apni tum aisi 'saad' har ik zaat pe nazar rakhnaa"

"mohabbat ke sahaare mar gae kyaa shab-e-furqat ke maare mar gae kyaa bhanvar se jo nikal aae the bach kar vo dariyaa ke kinaare mar gae kyaa nazar aati hai in mein kyon udaasi in aankhon ke sitaare mar gae kyaa nahin hoti hai dil mein koi halchal sabhi armaan hamaare mar gae kyaa khizaan kyon 'saad' dil par hai musallat nazar ke sab nazaare mar gae kyaa"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"