apne hi saae mein thaa mein shaayad chhupaa huaa — Farigh Bukhari

"dekhaa tujhe to aankhon ne aivaan sajaa liye jaise tamaam khoe hue khvaab paa liye jitne the tere mahke hue aanchalon ke rang sab titliyon ne aur dhanak ne uDaa liye aisi ghuTi fazaaon mein kaise jiyeinge vo kuchh qaafile jo aae hain taaza havaa liye in sar-phiri havaaon se kuchh aashnaa to huun gahre samundaron mein na kashti ko Daaliye izhaar kijiye ki zaraa karb kam to ho ai dosto dukhon ko dilon mein na paaliye khud hi uThaaein apne junun ki jaraahatein ye rog dusron ke na khaate mein Daaliye pahle ye kohsaar to taskhir kijiye 'faarigh' abhi falak pe kamandein na Daaliye"

"parchhaaiyon ke ban mein kahin aa gayaa huun main daur-e-sitam kaa ek nayaa tajraba huun main chehron ki ek bhiiD sadaaon kaa ik julus teri gali mein aa ke tamaashaa banaa huun main ik 'umr se ye kis kaa mujhe intizaar hai jalti hui siyaah saDak par khaDaa huun main kitni kaDi masaafatein hain mere ham rikaab roz-e-azal se apne liye haadsa huun main vo subh meraa haath jhaTak kar chali gai raaton kaa zahr phaank ke pachhtaa rahaa huun main aabaadiyaan bhi mujh ko rifaaqat na de sakin tanhaai ki salib pe laTkaa rahaa huun main maqtal mein baT gayaa hai miraa reza reza jism bahte hue lahu ko nazar aa rahaa huun main 'faarigh' dukhe dilon ke na main kaam aa sakaa sharmindagi se ungliyaan chaTkhaa rahaa huun main"

"teri khaatir ye fusun ham ne jagaa rakkhaa hai varna aaraaish-e-afkaar mein kyaa rakkhaa hai hai tiraa aks hi aaina-e-dil ki zinat ek tasvir se album ko sajaa rakkhaa hai barg-e-sad-chaak kaa parda hai shagufta gul se qahqahon se kai zakhmon ko chhupaa rakkhaa hai ab na bhaTkeinge musaafir nai naslon ke kabhi ham ne raahon mein lahu apnaa jalaa rakkhaa hai ham se insaan ki khajaalat nahin dekhi jaati kam-savaadon kaa bharam ham ne ravaa rakkhaa hai kis qayaamat kaa hai didaar tiraa vaada-shikan dil-e-betaab ne ik hashr uThaa rakkhaa hai koi mushkil nahin pahchaan hamaari 'faarigh' apni khushbu kaa safar ham ne judaa rakkhaa hai"

"ham vaqt ke ham-safar hi Thahre kab tak koi apne ghar hi Thahre hai kokh koi sadaf nahin hai laazim to nahin guhar hi Thahre ji leinge vo lamha oDh kar ham ai kaash vo lamha bhar hi Thahre unchi thiin uDaanein jin ki vo bhi zindagi-e-baam-o-dar hi Thahre is shahr mein zindagi giraan hai jo Thahre vo daar par hi Thahre suraj thaa ki chaand thaa ki taare sab jaah-parast udhar hi Thahre ham log vo varaq-paa hain 'faarigh' jannat mein bhi mukhtasar hi Thahre"

"vo raushni hai kahaan jis ke baad saayaa nahin kisi ne aaj talak ye suraagh paayaa nahin kahaan se laaun vo dil jo tiraa buraa chaahe udu-e-jaan tiraa dukh bhi koi paraayaa nahin tiri sabaahat-e-sad-rang mein bikhar jaaun abhi vo lamha miri zindagi mein aayaa nahin tire vajud pe angDaai ban ke TuuTaa hai vo naghma jo kisi mutrib ne gungunaayaa nahin nai-naveli zaminon ki sondhi khushbu mein vo chaandni hai ki jis mein koi nahaayaa nahin ham ek fikr ke paikar hain ik khayaal ke phuul tiraa vajud nahin hai to meraa saayaa nahin vo baab jis mein tavaanaaiyon ki khushbu hai fasaana-saaz ne 'faarigh' kabhi sunaayaa nahin"

"hue hain sard dimaaghon ke dahke dahke alaav nafas ki aanch se fikr-o-nazar ke diip jalaao kiran kiran ko siyah badliyon ne gher liyaa hai tasavvuraat ke dhundle charaagho raah dikhaao kahaan hai gardish-e-dauraan kidhar hai sail-e-havaadis sukun-e-marg-e-musalsal mein Dubne lagi naav kabhi khizaan ke bagule kabhi bahaar ke jhule samajh sake na zamaane ke ye utaar chaDhaao ajiib saa hai kharaabaat ke faqihon kaa fatvaa bhaDakte shoalon se tapte dilon ki pyaas bujhaao hazaar gardanein kham hon buraa nahin pe sitam hai khayaal-o-fikr ki pasti nigaah-o-dil kaa jhukaao"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"chaand bhi khoyaa khoyaa saa hai taare bhi khvaabida hain aaj fazaa ke bojhal-pan se lahje bhi sanjida hain jaane kin kin logon se is dard ke kyaa kyaa rishte the hijr ki is aabaad saraa mein sab chehre naadida hain itne barson baad bhi donon kaise TuuT ke milte hain tu hai kitnaa saada-dil aur ham kitne pechida hain sun jaanaan ham tark-e-taalluq aur kisi din kar leinge aaj tujhe bhi ujlat si hai ham bhi kuchh ranjida hain kaanon mein ik sargoshi hai be-maani si sargoshi aankhon mein kuchh khvaab saje hain khvaab bhi umr-rasida hain ghar ki vo makhdush imaarat gir ke phir taamir hui ab aangan mein peD hain jitne saare shaakh burida hain is basti mein ek saDak hai jis se ham ko nafrat hai us ke niche pagDanDi hai jis ke ham girvida hain"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"dast-kash hon na mai-e-gul ke khush-aashaam abhi ki labaalab hain mah-o-mehr ke do-jaam abhi zehn mein saaqi hai mai-khaana hai hai jaam abhi hosh kahtaa huun ise hosh kaa kyaa kaam abhi mujh ko darkaar na hai kufr na islaam abhi sidhe sidhe hi chale aate hain paighaam abhi tu bhi baaqi tiri rahmat bhi hai baaqi saaqi rahne de hai mai-e-isyaan se baDaa kaam abhi khaal-o-gesu se hai ye silsila-e-raaz-o-niyaaz daana sad-daana ho ye daam ho sad-daam abhi ziist ke khvaab ki taabir abhi baaqi hai ibtidaa dekh chuke hai magar anjaam abhi rah-rav-e-ishq abhi duur hai mearaaj-e-habib rashk-e-manzil na huaa raah mein har gaam abhi zarra-zarra hai ik aatish-kada-e-nur kalim dekh agar tu na ho aatish-zada-e-baam abhi imtiyaaz-e-man-o-tu raaz-e-khafi hai lekin khaasgaan ke liye kahtaa huun sar-e-aam abhi aks ko zo'm hai be-misli-e-rang-o-bu kaa turfa ye hai ki muqaabil hai vo gulfaam abhi raaz-goi tiri 'aiman' hai gunaah-e-akbar maang le afv ki us kaa hai karam aam abhi"

"baad-e-shimaal chalne lagi ang ang mein lipTaa hai kaun mujh se ye patjhaD ke rang mein khvaahish ke kaarobaar se bachnaa muhaal hai utregaa tu bhi saath mire is surang mein main aandhiyon mein haath bhi pakDun tiraa to kyaa ik shaakh-e-be-siper huun havaaon ki jang mein 'raanjhaa' main 'ahd-e-nau kaa qabilon mein baT gayaa to 'hir' ban ke pi na saki zahr jhang mein garmaa sakin na chaahatein teraa kaThor jism har ek jal ke bujh gai tasvir sang mein aage 'musavvir' aag 'aqab mein hai ye sadaa pichhe na muD ke dekhnaa is dasht-e-sang mein"

"tifli piiri o naujavaani hech tiin din ki hai zindagaani hech umr-e-do-roza par ghamanD itnaa munimon ki hai lan-taraani hech raat thoDi hai aao pyaar karein subh ko hogi ye kahaani hech chaar din ki bahaar hai saari ye takabbur hai yaar-e-jaani hech dil ke haathon 'haqir' jhagDon mein meri guzri sadaa javaani hech"