buDhe kamzor vaaldain ke saath — Badr Muneer

"vahshat-e-baam-o-dar se bhaagte hain jab kabhi apne ghar se bhaagte hain haath maltaa hai dida-e-hairaan log itnaa hunar se bhaagte hain jis mein kuchh bhi buraa nahin lagtaa aise husn-e-nazar se bhaagte hain mere is shahr-e-be-yaqin ke log shor se aur shar se bhaagte hain aisaa badlaa mizaaj-e-aab-o-havaa peD apne samar se bhaagte hain qahqahon mein jo the sharik vahi ab miri chashm-e-tar se bhaagte hain 'badr' ham hain ghazaal-e-dasht-e-junun vo jidhar ho udhar se bhaagte hain"

"mahv kar Daali kisi ne dil se meri yaad tak ho nahin sakti magar is zulm par fariyaad tak vahshatein itni baDhi hain kaarobaar-e-shauq mein duur mujh se bhaagtaa hai ab miraa ham-zaad tak teri meri laghzishon par hi kahaan mauquf hai baat chal nikli to phir jaaegi ye ajdaad tak sochtaa huun kyaa kareinge indimaal-e-dard-e-dil ghaur se sunte nahin hain jo miri rudaad tak ban gae insaan apni zaat mein jangal 'munir' uD gai hai bastiyon se bu-e-aadam-zaad tak"

"kalaam apnaa tabhi to aksar se mukhtalif hai jo sochte hain vo pesh-e-manzar se mukhtalif hai kahaan se ham apni gardishon kaa javaaz DhunDein hamaaraa mehvar zamin ke mehvar se mukhtalif hai isi liye to qubuliyat ke hain dar muqaffal du'aa tumhaari mire muqaddar se mukhtalif hai tabhi to baiThe hain manzaron par jamaae aankhein jo un kaa zaahir hai un ke andar se mukhtalif hai taraashte hain jo aazaraan-e-khayaal aksar vo ek paikar tumhaare paikar se mukhtalif hai 'munir' donon hain nilgun vus'aton ke haamil magar samandar kaa khvaab ambar se mukhtalif hai"

"hiddat-o-habs pe tanqid nahin kar sakte kyon ham aisaa mire khurshid nahin kar sakte karni paD jaae vazaahat pe vazaahat lekin ham tiri baat ki tardid nahin kar sakte jab tiraa saamnaa hotaa hai to ai sehr-jamaal 'arz kar sakte hain taakid nahin kar sakte misl-e-auraaq-e-pareshaan hai kitaab-e-hasti nuskha-e-dard ki tasvid nahin kar sakte jo mohabbat ki haqiqat se karein sarf-e-nazar vo kabhi 'ahd ki tajdid nahin kar sakte zahr piinaa to baDi duur kaa qissa hai 'munir' log sachchaai ki taaid nahin kar sakte"

"dekh lete ho mohabbat se yahi kaafi hai dil dhaDaktaa hai suhulat se yahi kaafi hai muddaton se nahin dekhaa tiraa jalva lekin yaad aa jaate ho shiddat se yahi kaafi hai jo bhi raste mein guzartaa hai mire pahlu se dekhtaa hai tiri nisbat se yahi kaafi hai mere aangan mein utartaa nahin vo chaand kabhi dekh lete hain use chhat se yahi kaafi hai saari duniyaa se ulajhte hain magar teraa kahaa maan lete hain sharaafat se yahi kaafi hai haal duniyaa ke sataae hue kuchh logon kaa puchh lete ho sharaarat se yahi kaafi hai kyaa huaa ham ko mayassar jo zar-o-maal nahin kaT rahi hai baDi 'izzat se yahi kaafi hai aaj ke ‘ahd-e-taghaaful mein kisi dar pe 'munir' koi aa jaae zarurat se yahi kaafi hai"

"vafur-e-ishtiyaaq mein zabaan se kyaa nikal gayaa phir us ke baa'd bazm kaa mizaaj hi badal gayaa idhar-udhar ke log to kareinge us ki parvarish zaraa saa koi khauf bhi agar dilon mein pal gayaa hamaari raat jagmagaa rahi hai aab-o-taab se zamin kaa chaand aasmaan ke chaand ko nigal gayaa makaan se makaan to hue hain muttasil magar khulus jis kaa naam thaa vo shahr se nikal gayaa ye bhed puure shahr ko diyaa hai main ne is liye ki hote hote baat kaa pata use bhi chal gayaa na-jaane us ghaDi thi kyaa dil-o-nazar ki kaifiyat chhuaa jo main ne phuul ko to meraa haath jal gayaa"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"chaand bhi khoyaa khoyaa saa hai taare bhi khvaabida hain aaj fazaa ke bojhal-pan se lahje bhi sanjida hain jaane kin kin logon se is dard ke kyaa kyaa rishte the hijr ki is aabaad saraa mein sab chehre naadida hain itne barson baad bhi donon kaise TuuT ke milte hain tu hai kitnaa saada-dil aur ham kitne pechida hain sun jaanaan ham tark-e-taalluq aur kisi din kar leinge aaj tujhe bhi ujlat si hai ham bhi kuchh ranjida hain kaanon mein ik sargoshi hai be-maani si sargoshi aankhon mein kuchh khvaab saje hain khvaab bhi umr-rasida hain ghar ki vo makhdush imaarat gir ke phir taamir hui ab aangan mein peD hain jitne saare shaakh burida hain is basti mein ek saDak hai jis se ham ko nafrat hai us ke niche pagDanDi hai jis ke ham girvida hain"

"dast-kash hon na mai-e-gul ke khush-aashaam abhi ki labaalab hain mah-o-mehr ke do-jaam abhi zehn mein saaqi hai mai-khaana hai hai jaam abhi hosh kahtaa huun ise hosh kaa kyaa kaam abhi mujh ko darkaar na hai kufr na islaam abhi sidhe sidhe hi chale aate hain paighaam abhi tu bhi baaqi tiri rahmat bhi hai baaqi saaqi rahne de hai mai-e-isyaan se baDaa kaam abhi khaal-o-gesu se hai ye silsila-e-raaz-o-niyaaz daana sad-daana ho ye daam ho sad-daam abhi ziist ke khvaab ki taabir abhi baaqi hai ibtidaa dekh chuke hai magar anjaam abhi rah-rav-e-ishq abhi duur hai mearaaj-e-habib rashk-e-manzil na huaa raah mein har gaam abhi zarra-zarra hai ik aatish-kada-e-nur kalim dekh agar tu na ho aatish-zada-e-baam abhi imtiyaaz-e-man-o-tu raaz-e-khafi hai lekin khaasgaan ke liye kahtaa huun sar-e-aam abhi aks ko zo'm hai be-misli-e-rang-o-bu kaa turfa ye hai ki muqaabil hai vo gulfaam abhi raaz-goi tiri 'aiman' hai gunaah-e-akbar maang le afv ki us kaa hai karam aam abhi"

"baad-e-shimaal chalne lagi ang ang mein lipTaa hai kaun mujh se ye patjhaD ke rang mein khvaahish ke kaarobaar se bachnaa muhaal hai utregaa tu bhi saath mire is surang mein main aandhiyon mein haath bhi pakDun tiraa to kyaa ik shaakh-e-be-siper huun havaaon ki jang mein 'raanjhaa' main 'ahd-e-nau kaa qabilon mein baT gayaa to 'hir' ban ke pi na saki zahr jhang mein garmaa sakin na chaahatein teraa kaThor jism har ek jal ke bujh gai tasvir sang mein aage 'musavvir' aag 'aqab mein hai ye sadaa pichhe na muD ke dekhnaa is dasht-e-sang mein"

"tifli piiri o naujavaani hech tiin din ki hai zindagaani hech umr-e-do-roza par ghamanD itnaa munimon ki hai lan-taraani hech raat thoDi hai aao pyaar karein subh ko hogi ye kahaani hech chaar din ki bahaar hai saari ye takabbur hai yaar-e-jaani hech dil ke haathon 'haqir' jhagDon mein meri guzri sadaa javaani hech"