chheDaa hi kyon havaa-e-rah-e-ku-e-yaar ne — Ijtiba Rizvi

"hadein phailin nazar ki phir bhi kam-bini nahin jaati ki har surat abhi ek aankh se dekhi nahin jaati zamin-e-dil bahut kuchh narm kar di be-qaraari ne magar ham hain isi ehsaas ki sakhti nahin jaati hayaat-e-jaama-zeb aur nau-ba-nau jaame magar kyaa hai ki is barbaad-saamaan ki tunuk-rakhti nahin jaati tajalli be-naqaab aur kor aankhein kyaa qayaamat hai ki suraj saamne hai aur siyah-bakhti nahin jaati miraa zikr-e-vafaa likh kar moarrikh ye bhi likhtaa hai ye ik rasm-e-kuhan thi ab kahin barti nahin jaati main kyaa munh le ke aauun aap ke aaina-khaane mein ye surat aisi bigDi hai ki pahchaani nahin jaati tasavvur se bhi aage justuju ki raah jaati hai vahaan ki baat lekin phir yahaan laai nahin jaati takalluf-bar-taraf rasm-e-muravvat tah karo 'rizvi' mohabbat aap hoti hai mohabbat ki nahin jaati"

"nahin sahi mire naalon mein kuchh asar na sahi nazar kuchh aap ki bechain hai idhar na sahi ham uljhanon mein paDe aql-e-naa-rasaa le kar vo aish-e-be-khabari khuub thaa khabar na sahi adaa-faroshi-e-baazaar-e-tur aur huzur khabar yahi to hai mashhur mo'atabar na sahi fidaa ho taab-e-basaarat miri basirat par nazar ne chun to liyaa taaqat-e-nazar na sahi pukaarte hain ki guunj is pukaar ki rah jaae duaa duaa to kahi jaaegi asar na sahi hujum-e-be-khabaraan hai bhari to hai mahfil tumhaari bazm mein 'rizvi'-e-baa-khabar na sahi"

"khirad ko khaana-e-dil kaa nigah-baan kar diyaa ham ne ye ghar aabaad hotaa is ko viraan kar diyaa ham ne chhupoge kyaa digar rang-e-shabistaan kar diyaa ham ne ki apne ghar ko phunkaa aur charaaghaan kar diyaa ham ne ghuTe jaate the tum minaa-e-qalb-e-ahl-e-khalvat mein tumhein jaam-e-kaf-e-sahraa-nashinaan kar diyaa ham ne anis-e-khvaajgaan tum the jalis-e-khvaajgaan tum the magar tum ko nasib-e-kam-nasibaan kar diyaa ham ne harim-e-naaz se tum ko churaa laane ke mujrim hain ye sahraa thaa ise bhi ku-e-jaanaan kar diyaa ham ne nazar vaalo zaraa chaak-e-garebaan dekhte jaao ise chaak-e-naqaab-e-ru-e-jaanaan kar diyaa ham ne zamin khaakistar-e-yak shola-o-yam aab-e-yak-girya yahi vo aab-o-gil hai jis ko insaan kar diyaa ham ne jafaa se fitrat-e-aasudgaan taa'mir ki tum ne vafaa ko qismat-e-aashufta-haalaan kar diyaa ham ne mataa'-e-husn mahsusaat mein arzaan hi rah jaati giraan us ko ba-yak takhil-e-yazdaan kar diyaa ham ne khanDar mein maah-e-kaamil kaa sanvarnaa is ko kahte hain tum utre dil mein jab dil ko bayaabaan kar diyaa ham ne amaanat maangti thi ham se saamaan-e-nigah-daari tumhin ko shahr-e-khaamoshi kaa darbaan kar diyaa ham ne"

"ahbaab chhuTe mahbub chhuTe ghar chhuT gayaa dar chhuT gayaa jab dil se tamanna chhuT gai sab rishta naataa TuuT gayaa ai saaqi-e-bazm-e-kaif-e-hayaat ab mujh ko pyaasaa jaane de mai jis mein miri taqdir ki thi vo shisha tujh se TuuT gayaa go shisha-gar-e-qudrat ne bahut TuuTe hue shishe joD diye lekin ye hamaaraa shisha-e-dil joDaa na gayaa yuun TuuT gayaa is saaz pe naghma ab chheDo to naala paidaa hotaa hai maujud hain vo sab taar jo the bas ek nahin hai TuuT gayaa ham rote hain apne pyaaron ko aur fitrat ham se kahti hai ab aur khilaunon se khelo jo TuuT gayaa so TuuT gayaa vo raah mein hai aankhon mein hai dam ai baad-e-sabaa aahista guzar hain taar-e-nafas par hachkole ab TuuT gayaa ab TuuT gayaa kahte ho ki maango jo maango batlaao tumhi ham kyaa maangein chaahaa thaa ki maangein tum se tumhein ye ho na sakaa ji chhuT gayaa haan sun ki tujhe thi ham se gharaz mohtaaj-e-nazar thaa husn tiraa rakkhi rahi shaan-e-istighnaa aakhir ko ye bhaanDaa phuuT gayaa ye dil to vahi dil hai 'rizvi' aabaad bhi thaa viraan bhi hai armaanon ki is basti ko kal ek musaafir luuT gayaa"

"ik akhgar-e-jamaal farozaan ba-shakl-e-dil pheinkaa idhar bhi husn-e-tajalli-nisaar ne afsurdagi bhi husn hai taabindagi bhi husn ham ko khizaan ne tum ko sanvaaraa bahaar ne is dil ko shauq-e-did mein taDpaa ke kar diyaa kyaa ustuvaar vaada-e-naa-ustavaar ne jalve ki bhiik de ke vo haTne lage the khud daaman pakaD liyaa nigah-e-e'tibaar ne gesu ghubaar-e-raah-e-tamannaa se aT na jaaein sahraa mein aap nikle hain ham ko pukaarne"

"churaane ko churaa laayaa main jalve ru-e-raushan se magar ab bijliyaan lipTi hui hain dil ke daaman se tanavvo kuchh to ho ai bulbul-e-kam-zauq maatam kyaa agar taamir-e-sahraa ho gai takhrib gulshan se mujhe kuchh tajrabe har rang ke jholi mein rakh chalnaa musaafir huun gharaz kyaa hai mujhe sahraa o gulshan se mujhe har kaarvaan se chhuTnaa is bad-gumaani mein ki shaayad raahbar ko rabt-e-pinhaani ho rahzan se mazaaq-e-jazb-e-baatin gum hai ab tazin-e-zaahir mein ye tifl-e-dasht-e-aiman ghaT gayaa tahzib-e-gulshan se"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"chaand bhi khoyaa khoyaa saa hai taare bhi khvaabida hain aaj fazaa ke bojhal-pan se lahje bhi sanjida hain jaane kin kin logon se is dard ke kyaa kyaa rishte the hijr ki is aabaad saraa mein sab chehre naadida hain itne barson baad bhi donon kaise TuuT ke milte hain tu hai kitnaa saada-dil aur ham kitne pechida hain sun jaanaan ham tark-e-taalluq aur kisi din kar leinge aaj tujhe bhi ujlat si hai ham bhi kuchh ranjida hain kaanon mein ik sargoshi hai be-maani si sargoshi aankhon mein kuchh khvaab saje hain khvaab bhi umr-rasida hain ghar ki vo makhdush imaarat gir ke phir taamir hui ab aangan mein peD hain jitne saare shaakh burida hain is basti mein ek saDak hai jis se ham ko nafrat hai us ke niche pagDanDi hai jis ke ham girvida hain"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"dast-kash hon na mai-e-gul ke khush-aashaam abhi ki labaalab hain mah-o-mehr ke do-jaam abhi zehn mein saaqi hai mai-khaana hai hai jaam abhi hosh kahtaa huun ise hosh kaa kyaa kaam abhi mujh ko darkaar na hai kufr na islaam abhi sidhe sidhe hi chale aate hain paighaam abhi tu bhi baaqi tiri rahmat bhi hai baaqi saaqi rahne de hai mai-e-isyaan se baDaa kaam abhi khaal-o-gesu se hai ye silsila-e-raaz-o-niyaaz daana sad-daana ho ye daam ho sad-daam abhi ziist ke khvaab ki taabir abhi baaqi hai ibtidaa dekh chuke hai magar anjaam abhi rah-rav-e-ishq abhi duur hai mearaaj-e-habib rashk-e-manzil na huaa raah mein har gaam abhi zarra-zarra hai ik aatish-kada-e-nur kalim dekh agar tu na ho aatish-zada-e-baam abhi imtiyaaz-e-man-o-tu raaz-e-khafi hai lekin khaasgaan ke liye kahtaa huun sar-e-aam abhi aks ko zo'm hai be-misli-e-rang-o-bu kaa turfa ye hai ki muqaabil hai vo gulfaam abhi raaz-goi tiri 'aiman' hai gunaah-e-akbar maang le afv ki us kaa hai karam aam abhi"

"baad-e-shimaal chalne lagi ang ang mein lipTaa hai kaun mujh se ye patjhaD ke rang mein khvaahish ke kaarobaar se bachnaa muhaal hai utregaa tu bhi saath mire is surang mein main aandhiyon mein haath bhi pakDun tiraa to kyaa ik shaakh-e-be-siper huun havaaon ki jang mein 'raanjhaa' main 'ahd-e-nau kaa qabilon mein baT gayaa to 'hir' ban ke pi na saki zahr jhang mein garmaa sakin na chaahatein teraa kaThor jism har ek jal ke bujh gai tasvir sang mein aage 'musavvir' aag 'aqab mein hai ye sadaa pichhe na muD ke dekhnaa is dasht-e-sang mein"

"tifli piiri o naujavaani hech tiin din ki hai zindagaani hech umr-e-do-roza par ghamanD itnaa munimon ki hai lan-taraani hech raat thoDi hai aao pyaar karein subh ko hogi ye kahaani hech chaar din ki bahaar hai saari ye takabbur hai yaar-e-jaani hech dil ke haathon 'haqir' jhagDon mein meri guzri sadaa javaani hech"