gham-e-khaashaak kyaa shoale ko hogaa — Mahshar Badayuni

"kahin sahraa mein jo dariyaa dekhein ham bhi aaine mein chehraa dekhein ham mohabbat ke liye khaak uDaaein log galiyon mein tamaashaa dekhein sabr aa jaae agar apnaa ye haal jin ki khaatir hai vo tanhaa dekhein band aankhon mein baDi vusat hai band aankhon hi se duniyaa dekhein ghar hai mausam se bachaanaa mushkil jaanib-e-abr-o-havaa kyaa dekhein itni divaar-e-gulistaan na baDhaao ki bayaabaan miraa rastaa dekhein ab yahi shakl-e-tamannaa hai ki ham umr bhar khvaab-e-tamannaa dekhein ham bashar hain na ki sahraa ke shajar jo sadaa apnaa hi saayaa dekhein"

"hamaare haath the suraj nae jahaanon ke so ab zaminon ke ham hain na aasmaanon ke hazaar gird lagaa lein qad-aavar aaine hasab-nasab bhi to hote hain khaandaanon ke huruf-bin to sabhi hain magar kise ye shuur kitaab paDhti hai chehre kitaab-khvaanon ke ye kyaa zarur ki naamon ke ham-mizaaj hon log bahaar aur khizaan naam hain zamaanon ke vo chaahe aa ke na baahar kisi se baat karein khabar makinon ki dete hain dar makaanon ke hamaari qadr ko samjhe ye asr-e-naa-qadraan ham ahl-e-fan hain khilaune nahin dukaanon ke ab aisi shorish-e-baazaar-e-madh mein 'mahshar' khamosh lahje ghanimat hain qadr-daanon ke"

"taair ke liye din raat kaa Dar dahliz pe rizq aur taaq mein ghar sab rauzan-e-zindaan band hue yaa kuchh na rahaa zindaan se udhar baahar ye qadam niklein to khule zanjir madad karti hai ki dar maqtal ki zamin se phuul ugein jaataa hai kahin miTTi kaa asar niind aati hai us ke saae mein gir jaae ye divaar agar ham sog hain jaage sapnon kaa ai raat hamein mahsus na kar jalvaon se bahut nazdik ho tum ai bul-havso daaman pe nazar hai apnaa qayaam is aalam mein shabnam kaa baseraa kaanTe par yaa sirf Dagar thi vaqt na thaa ab sirf hai vaqt kaa naam Dagar kuchh apni pyaasein bujh bhi gaiin kuchh qarz hain dariyaa-noshon par"

"thaa main aakhir usi mausam ki fazaa mein pahle is qadar soz na thaa meri navaa mein pahle hai agar us ki ye hasrat ki use sab dekhein shaahid-e-charkh ho ru-posh ghaTaa mein pahle khaak-poshon ke badan der mein lau dete hain aag lagti hai kisi narm qabaa mein pahle honT siinaa bhi hai ab farz chalo ye bhi sahi aisi shartein na thiin aadaab-e-vafaa mein pahle ahl-e-fan us ko na bhulein ki dil o jaan ki tapish harf mein baad ko aati hai sadaa mein pahle mere arsa-gah-e-taqdir mein aane vaalo din guzaaro kisi aashob-saraa mein pahle mere sahraa mein tum aae to ho naazuk-nafaso saans bhi li hai kabhi aisi havaa mein pahle"

"aise ghurbat mein baiThaa huun jaise baDaa baar-e-sar rakh diyaa ek sehn ek dar ek divaar kaa naam ghar rakh diyaa is hunar par jo tum is qadar nukta-chin ho to main kyaa kahun mere maalik ne kyuun mujh mein sachchaaiyon kaa hunar rakh diyaa main ne shaakhein taraashin bulandi-e-nashv-o-numaa ke liye tum ko tesha milaa tum ne to kaaT kar hi shajar rakh diyaa tez-tar baad-e-khud-sar chali to yahaan kaun si lu ghaTi main ne aur ik lahu se jalaa kar diyaa baam par rakh diyaa meraa hissa thaa kyaa dukh shanaasaai ke zakhm rusvaai ke vaqt ke ru-ba-ru main ne saaraa hisaab-e-safar rakh diyaa kitne naadaar dil tum ne Thukraa diye ye na sochaa kabhi is mohabbat ne to paa-e-aflaas par taaj-e-zar rakh diyaa main ne to apnaa khud hi likhaa faisla log aise bhi the munsifi ke liye paa-e-naa-munsifi par bhi sar rakh diyaa"

"haar kar jang ham nahin aae tiir udhar se bhi kam nahin aae gham-shanaason ko aae sab hi kamaal bas khayaal-e-karam nahin aae apni shohrat hai us gali mein bahut ham pe ilzaam kam nahin aae rahaa phikaa hi rang-e-bazm agar bazm mein ahl-e-gham nahin aae"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"