ghar se baahar kabhi niklaa kiije — Jaleel Hashmi

"shaakhcha khaak-e-gulistaan mein paDaa hai yaaro us se ehsaan-e-bahaaraan na uThaa hai yaaro tum ne puchhaa hai na kuchh ham ne kahaa hai yaaro haadisa ham pe jo guzraa hai to kyaa hai yaaro kar gayaa khaak hamein rukhsat-e-gul kaa manzar zakhm-e-nazzaara magar ab bhi haraa hai yaaro maryam-e-shaam khule baal phir aati dekho phir masihaa koi suuli pe chaDhaa hai yaaro raat andheri sahi maayus nahin nuur se ham ashk palkon pe abhi kaanp rahaa hai yaaro ab miri shab mire ashkon se rahegi raushan shaam ke vaqt diyaa meraa bujhaa hai yaaro saamne aate ho ab ajnabiyon ki surat ye bhi shaayad koi yaari ki adaa hai yaaro paanv hain khaak pe khurshid pe saaya us kaa 'hashami' khoj mein ye kis ki chalaa hai yaaro"

"jo teri afshaan sanvaarein zindagi ai zindagi roz-o-shab aise guzaarein zindagi ai zindagi baDh gayaa dariyaa kaa paani kaf uDaataa mauj mauj uD gaiin kunjon ki Daarein zindagi ai zindagi har taraf chhaayaa huaa hai ik sukut-e-bekaraan phir bhi ham tujh ko pukaarein zindagi ai zindagi teri surat par gumaan-e-dasht-o-sahraa haae haae tere qadmon mein bahaarein zindagi ai zindagi sar uThaaein daar par yaadein sar-e-maqtal sadaa naqsh tere hi ubhaarein zindagi ai zindagi jin ke honTon par sadaa rahte hain tere zamzame un ke sinon mein kaTaarein zindagi ai zindagi shahr hai aakhir ye koi sard viraana nahin jiine vaale dam na maarein zindagi ai zindagi dein jo tujh ko fursat yak do nafas ki tohmatein un se bhi ham log haarein zindagi ai zindagi duur tak miltaa na ho naam-o-nishaan teraa jahaan ham vahaan daaman pasaarein zindagi ai zindagi"

"siikh liyaa jiinaa main ne itnaa zahr piyaa main ne shikva nahin kiyaa main ne aansu ponchh liyaa main ne un se mil kar aayaa huun khvaab nahin dekhaa main ne havaa ko aate jab dekhaa raushan kiyaa diyaa main ne pyaasaa thaa kartaa bhi kyaa likh Daalaa dariyaa main ne parcham saa lahraayaa huun khaai tez havaa main ne husn-e-chaman likhtaa kaise paDhaa na ik pattaa main ne divaaron ki basti mein darvaaza likkhaa main ne paash paash huaa phir bhi sar unchaa rakkhaa main ne kisi ko kyaa denaa 'hashmi' qarz hi kiye adaa main ne"

"jo shikva karte hain 'hashmi' se kam-numaai kaa unhein bhi Dar hai zamaane ki kaj-adaai kaa phire hain dhuup mein saae ko saath saath liye ki khul na jaae bharam apni be-navaai kaa magar kuchh aur hai yaari ki baat shauq se tum lagaao chehron pe ilzaam aashnaai kaa 'araq 'araq the nadaamat ki aanch se khud hi gila karein bhi to kyaa teri bevafaai kaa kuchh is adaa se sataae gae hain ham ab ke har ek saans mein andaaz hai duhaai kaa chalaa to huun tire hamraah kuchh qadam hi sahi jo de to kyuun mujhe taana shikasta-paai kaa jo apne dar pe sadaa di to kyaa milaa pyaare yahi ki naam Dubo aae ham gadaai kaa nikal paDe ho use DhunDne magar 'hashami' ye raasta hai miri jaan naa-rasaai kaa"

"kahi na un se jo honTon pe baat aai bhi ki aashnaai bhi thi sharm-e-aashnaai bhi koi talab thi to dast-e-savaal phailaate magar mili thi kahaan surat-e-gadaai bhi kaho havaa se chale aaj raat tham tham kar ki aag hai mire daaman mein kuchh paraai bhi tire karam ke fasaane to shahr bhar se kahe tire sitam ki kahaan jaa ke dein dahaai bhi tiri sadaa pe gumaan dhaDkanon kaa hotaa thaa 'ajab thaa ab ke sukut-e-shab-e-judaai bhi tumhaari ham-safari ke bhi the bahut ehsaan hui hai vajh-e-nadaamat shikasta-paai bhi nazar bujhi to mile raushni kahaan 'hashami' jalaa ke sham' bahut aankh se lagaai bhi"

"khaak un galiyon ki palkon se bahut chhaani thi phir bhi surat miri is shahr mein an-jaani thi ham bhi kuchh apni vafaaon pe hue the naadim un ko bhi tark-e-taalluq pe pashemaani thi khud-farebi to alag baat hai varna ham ne apni surat kahaan aaine mein pahchaani thi zindagi sang bani thi tujhe rukhsat kar ke dil na dhaDkaa thaa to marne mein bhi aasaani thi haadisa sakht thaa jaankaah thaa ab ke yaaro varna ham ne to kabhi haar nahin maani thi rah gai raah mein yuun sharm-e-shikasta-paai kyaa Thaharte kahin vo be-sar-o-saamaani thi naa-rasaai koi kis aankh se dekhe apni ham bhi TuuTe hue par, raat bhi tufaani thi gul hui sham' to daaman bhaDak uTThaa 'hashami' jab nazar bujh gai viraani hi viraani thi"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"chaand bhi khoyaa khoyaa saa hai taare bhi khvaabida hain aaj fazaa ke bojhal-pan se lahje bhi sanjida hain jaane kin kin logon se is dard ke kyaa kyaa rishte the hijr ki is aabaad saraa mein sab chehre naadida hain itne barson baad bhi donon kaise TuuT ke milte hain tu hai kitnaa saada-dil aur ham kitne pechida hain sun jaanaan ham tark-e-taalluq aur kisi din kar leinge aaj tujhe bhi ujlat si hai ham bhi kuchh ranjida hain kaanon mein ik sargoshi hai be-maani si sargoshi aankhon mein kuchh khvaab saje hain khvaab bhi umr-rasida hain ghar ki vo makhdush imaarat gir ke phir taamir hui ab aangan mein peD hain jitne saare shaakh burida hain is basti mein ek saDak hai jis se ham ko nafrat hai us ke niche pagDanDi hai jis ke ham girvida hain"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"dast-kash hon na mai-e-gul ke khush-aashaam abhi ki labaalab hain mah-o-mehr ke do-jaam abhi zehn mein saaqi hai mai-khaana hai hai jaam abhi hosh kahtaa huun ise hosh kaa kyaa kaam abhi mujh ko darkaar na hai kufr na islaam abhi sidhe sidhe hi chale aate hain paighaam abhi tu bhi baaqi tiri rahmat bhi hai baaqi saaqi rahne de hai mai-e-isyaan se baDaa kaam abhi khaal-o-gesu se hai ye silsila-e-raaz-o-niyaaz daana sad-daana ho ye daam ho sad-daam abhi ziist ke khvaab ki taabir abhi baaqi hai ibtidaa dekh chuke hai magar anjaam abhi rah-rav-e-ishq abhi duur hai mearaaj-e-habib rashk-e-manzil na huaa raah mein har gaam abhi zarra-zarra hai ik aatish-kada-e-nur kalim dekh agar tu na ho aatish-zada-e-baam abhi imtiyaaz-e-man-o-tu raaz-e-khafi hai lekin khaasgaan ke liye kahtaa huun sar-e-aam abhi aks ko zo'm hai be-misli-e-rang-o-bu kaa turfa ye hai ki muqaabil hai vo gulfaam abhi raaz-goi tiri 'aiman' hai gunaah-e-akbar maang le afv ki us kaa hai karam aam abhi"

"baad-e-shimaal chalne lagi ang ang mein lipTaa hai kaun mujh se ye patjhaD ke rang mein khvaahish ke kaarobaar se bachnaa muhaal hai utregaa tu bhi saath mire is surang mein main aandhiyon mein haath bhi pakDun tiraa to kyaa ik shaakh-e-be-siper huun havaaon ki jang mein 'raanjhaa' main 'ahd-e-nau kaa qabilon mein baT gayaa to 'hir' ban ke pi na saki zahr jhang mein garmaa sakin na chaahatein teraa kaThor jism har ek jal ke bujh gai tasvir sang mein aage 'musavvir' aag 'aqab mein hai ye sadaa pichhe na muD ke dekhnaa is dasht-e-sang mein"

"tifli piiri o naujavaani hech tiin din ki hai zindagaani hech umr-e-do-roza par ghamanD itnaa munimon ki hai lan-taraani hech raat thoDi hai aao pyaar karein subh ko hogi ye kahaani hech chaar din ki bahaar hai saari ye takabbur hai yaar-e-jaani hech dil ke haathon 'haqir' jhagDon mein meri guzri sadaa javaani hech"