huun be-qaraar magar ye bataa nahin saktaa — Haresh Vanza

"tamaasha banne se behtar yahi hai chup rahaa jaae bhale duniyaa phir andaaze lagaane par hi aa jaae jo zaahir thiin vo baatein to kitaabon mein bahut paDh liin chalo ab ke kisi ki khaamushi ko bhi paDhaa jaae talaashe jaaein sab se pahle to 'aib-o-hunar khud ke kisi ko baa'd mein achchhaa buraa insaan kahaa jaae tumhaari raae yakdam hi badalti jaaegi us par agar vo mudda'aa donon taraf se jo sunaa jaae musibat aur is afsurdagi se itnaa kyaa Darnaa kahin ye Dar tumhaari hausla-mandi na khaa jaae"

"jis ki khaatir jal rahe the ham sharaare ki tarah us ke dil mein rah gae to bas khasaare ki tarah jis taraf us kaa ishaara thaa vo koi aur thaa chaand ke yaavar nahin the ham sitaare ki tarah dil dukhaane kaa koi mauqa' nahin jo chhoDtaa saath aise shakhs ke the ham sahaare ki tarah jab samundar chhoDegaa manjdhaar mein laa ke use yaad aaeinge use bhi ham kinaare ki tarah chand ummidon tale dab ke mare hain ham 'haresh' ham ne dekhaa hi nahin khud ko sahaare ki tarah"

"aavaara kyon kahte ho us ko vaqt kaa maaraa kaho vo qais ban kar ghumtaa hai us ko bechaara kaho kyaa aap ne mujh ko abhi TuuTaa huaa taara kahaa dil ki tasalli ke liye ik baar dobaara kaho khushiyaan hamaari le ke jaao apne gham ke badle mein chaahe bhale phir aap kal ham ko hi naakaara kaho vo ik na ik din to dukhaaegaa tumhaaraa dil 'haresh' dil khol kar chaahe use tum kitnaa bhi pyaaraa kaho"

"ranj se duur the aur khushiyon se nisbat thi kabhi vaqt aisaa bhi thaa achchhi bhali qismat thi kabhi ye haqiqat hai ki ahbaab badalte raheinge vo jinhein pyaar ki khalvat mein zarurat thi kabhi ab use zahr ki maanind piye jaa rahe hain ik adhuri si mohabbat jo 'inaayat thi kabhi vo hamein chhoD gayaa is liye maayus nahin is liye hain ki use bhi to mohabbat thi kabhi"

"hamaare vaaste bas vo ghaDi bhar ko Thahar jaae hamein apnaa kahe ik baar phir chaahe mukar jaae ham aise log jin kaa saath koi bhi nahin detaa kahaan jaaein karein kyaa dard jab had se guzar jaae sanbhaale hain na jaane kab se aansu us ne aankhon mein koi pal bhar gale se bhi lagaa le to bikhar jaae kisi din zindagi ke bhi sahi maa'ni samajh loge mohabbat kaa nasha bas aap ke sar se utar jaae badaltaa jaa rahaa hai shauq vo bhi aaj-kal apne hamaare hisse ki ab ke mohabbat bhi na mar jaae"

"main baat apne dil ki bataane se rah gayaa manzil ke paas ho ke bhi paane se rah gayaa mahbub apnaa thaa hi taghaaful kaa 'illati so haal-e-dil bhi dhyaan mein aane se rah gayaa kho baiThaa thaa main hosh-o-havaas apne jis ghaDi vo lamha mujh se aage baDhaane se rah gayaa vo gul baTor le gayaa taa'rifein baagh mein main khaar thaa so zikr mein aane se rah gayaa had se ziyaada achchhe bane rahnaa jahl thaa bas ye sabaq main khud ko sikhaane se rah gayaa"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"Tuut kar ab sanvar gayaa huun main is tarah se bikhar gayaa huun main jo tire naam ki gali hai vo us gali se guzar gayaa huun main yaadein teri sameT laayaa huun aaj jab se udhar gayaa huun main khud mukarnaa sikhaa diyaa us ne phir kahaa ki mukar gayaa huun main kal talak jo na kar sakaa thaa main aaj vo kaam kar gayaa huun main yuun kahin main nahin Thahartaa par tere dar par Thahar gayaa huun main"

"bistar-e-karb pe jab niind jalaai main ne tab kisi khvaab ki buniyaad uThaai main ne zakhm aise the ki har shakhs ke aage rakkhe baat aisi thi ki khud se bhi chhupaai main ne hurmat-e-gham ke liye khud ko aziyyat bakhshi phir usi dard se taskin bhi paai main ne main ne zakhmon ko kuredaa unhein taaza rakkhaa tab kahin dasht mein ki naghma-saraai main ne apni khiDki se yunhi khud ko pukaaraa kal shab aur phir khud ko vo aavaaz sunaai main ne jaane vaale se rag-e-jaan kaa bhi rishta thaa 'samir' ye samajhne mein bahut der lagaai main ne"

"choT par choT khaa rahaa huun main 'aadatan muskuraa rahaa huun main us ke uupar to kuchh asar hi nahin apnaa dil kyon jalaa rahaa huun main aaj tanhaai mein jo baiThe ho kyaa tumhein yaad aa rahaa huun main kaun aaegaa mujh se milne ko apnaa ghar kyon sajaa rahaa huun main aaj ji bhar ke dekh lo mujh ko ab bahut duur jaa rahaa huun main kyaa tumhein ab bhi kuchh shikaayat hai ab to sab kuchh kamaa rahaa huun main haath mein Digriyaan sajaae hue Thokarein kitni khaa rahaa huun main ab mujhe peT in se bharnaa hai ye jo khanjar banaa rahaa huun main kal koi is ko bhi na chhoDegaa ye jo paudaa lagaa rahaa huun main"

"zindagi dushvaar hogi ye kabhi sochaa na thaa vo bagule gham ke uTThe jin kaa andesha na thaa saamne tum aa gae ho to bataa duun jaan-e-jaan jaise dil dhaDkaa thaa ab ki vaise dil dhaDkaa na thaa ye iraada kar liyaa thaa ham na bichhDeinge kabhi TuTeinge ik pal mein rishte ye kabhi sochaa na thaa yaad-e-maazi miT rahi hai vaqt ki raftaar se ab tasavvur mein hamaare koi bhi chehra na thaa sakht hairat ho rahi hai dekh kar apnaa vajud dhuup mein the sab ke saaye par miraa saayaa na thaa shauq-e-manzil dekh meri dekh meraa hausla shahr-e-dil ke raaston mein main kabhi Thahraa na thaa 'qalb' ko sahraa-navardi raas kyaa aati bhalaa vo kabhi aavaargi mein dar-ba-dar bhaTkaa na thaa"