koi na ham-safar na koi rahnumaa milaa — Zyesha Usmaan

"tire hi rahm-o-karam pe zinda tujhi se ghaafil the 'umr bhar ham hamin ne yaa-rab ye rah chuni thi to kyon na hote yuun dar-ba-dar ham jahaan ne Thukraa diyaa ho jis ko vo phir bhalaa kis ke dar pe jaate tiri hi jaanib thaa lauT aanaa so aa gae hain jhukaae sar ham jo yaad aaiin khataaein apni qusur apne gunaah apne jabin nadaamat se jhuk gai hai hue hain ashkon se tar-ba-tar ham na ham ko fariyaad kaa saliqa na iltijaa kaa shu'ur maulaa tu apne mangton ki laaj rakh le hain sar-ba-sajda is aas par ham"

"kis samt baDh rahe hain qadam kuchh pataa nahin tanhaa safar kaa mujh ko koi tajraba nahin ai dil dayaar-e-ghair se vaapas chale-chalo is shahr mein milegaa koi ham-navaa nahin kaisaa ye marhala hai ki ik dusre se ham kahne ko aashnaa hain magar aashnaa nahin ham ko hi tere baa'd na kuchh raas aa sakaa duniyaa mein dil lagaane ko varna thaa kyaa nahin aise to TuTte nahin chaahat ke silsile paiham bhulaane se to koi bhultaa nahin ai khvaab-e-khush-numaa tiri hasrat bajaa magar aankhon kaa khush-numaai pe ab haq rahaa nahin dil ik khizaan-rasida chaman hai ki jis mein phir taa-'umr aarzu kaa koi gul khilaa nahin"

"aankh mein ashk kaa jis tarh sitaara chamke kaash us tarh muqaddar bhi hamaaraa chamke koi hasrat koi khvaahish na adhuri rah jaae khvaab chamke jo agar saare kaa saaraa chamke bujh gae jo bhi diye vaqt ki is aandhi mein un ki qismat kaa sitaara bhi dubaara chamke daagh jitne bhi mile tum se mujhe ulfat mein hai du'aa meri vo har daagh tumhaaraa chamke vo ho gulshan mein to gulshan ki fazaa raushan ho vo ho manzar mein to har ek nazaara chamke zindagi tu ne diye sirf khasaare ham ko ham khasaaron kaa magar le ke sahaaraa chamke aankh aise hi nahin hoti hai nam har lahza us ne chaahaa thaa ki dariyaa kaa kinaara chamke muntazir huun main kisi roz du'aaon ke 'evaz mere daaman mein bhi qudrat kaa ishaara chamke"

"kyaa bataaun ki kyaa thaa aankhon mein qahr koi bapaa thaa aankhon mein ek sannaaTaa saa thaa aankhon mein jaise tufaan chhupaa thaa aankhon mein dil mein aatish-fishaan thaa zakhm koi aur dhuaan uTh rahaa thaa aankhon mein jis ke dam se thi raushni vo hi khvaab chubhne lagaa thaa aankhon mein dard Dhalne lage the ashkon mein zabt TuuTaa milaa thaa aankhon mein guzre vaqton ki har masarrat kaa 'aks dhundlaa gayaa thaa aankhon mein khauf maayusi bebasi vahshat karb kaa silsila thaa aankhon mein"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"chaand bhi khoyaa khoyaa saa hai taare bhi khvaabida hain aaj fazaa ke bojhal-pan se lahje bhi sanjida hain jaane kin kin logon se is dard ke kyaa kyaa rishte the hijr ki is aabaad saraa mein sab chehre naadida hain itne barson baad bhi donon kaise TuuT ke milte hain tu hai kitnaa saada-dil aur ham kitne pechida hain sun jaanaan ham tark-e-taalluq aur kisi din kar leinge aaj tujhe bhi ujlat si hai ham bhi kuchh ranjida hain kaanon mein ik sargoshi hai be-maani si sargoshi aankhon mein kuchh khvaab saje hain khvaab bhi umr-rasida hain ghar ki vo makhdush imaarat gir ke phir taamir hui ab aangan mein peD hain jitne saare shaakh burida hain is basti mein ek saDak hai jis se ham ko nafrat hai us ke niche pagDanDi hai jis ke ham girvida hain"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"dast-kash hon na mai-e-gul ke khush-aashaam abhi ki labaalab hain mah-o-mehr ke do-jaam abhi zehn mein saaqi hai mai-khaana hai hai jaam abhi hosh kahtaa huun ise hosh kaa kyaa kaam abhi mujh ko darkaar na hai kufr na islaam abhi sidhe sidhe hi chale aate hain paighaam abhi tu bhi baaqi tiri rahmat bhi hai baaqi saaqi rahne de hai mai-e-isyaan se baDaa kaam abhi khaal-o-gesu se hai ye silsila-e-raaz-o-niyaaz daana sad-daana ho ye daam ho sad-daam abhi ziist ke khvaab ki taabir abhi baaqi hai ibtidaa dekh chuke hai magar anjaam abhi rah-rav-e-ishq abhi duur hai mearaaj-e-habib rashk-e-manzil na huaa raah mein har gaam abhi zarra-zarra hai ik aatish-kada-e-nur kalim dekh agar tu na ho aatish-zada-e-baam abhi imtiyaaz-e-man-o-tu raaz-e-khafi hai lekin khaasgaan ke liye kahtaa huun sar-e-aam abhi aks ko zo'm hai be-misli-e-rang-o-bu kaa turfa ye hai ki muqaabil hai vo gulfaam abhi raaz-goi tiri 'aiman' hai gunaah-e-akbar maang le afv ki us kaa hai karam aam abhi"

"baad-e-shimaal chalne lagi ang ang mein lipTaa hai kaun mujh se ye patjhaD ke rang mein khvaahish ke kaarobaar se bachnaa muhaal hai utregaa tu bhi saath mire is surang mein main aandhiyon mein haath bhi pakDun tiraa to kyaa ik shaakh-e-be-siper huun havaaon ki jang mein 'raanjhaa' main 'ahd-e-nau kaa qabilon mein baT gayaa to 'hir' ban ke pi na saki zahr jhang mein garmaa sakin na chaahatein teraa kaThor jism har ek jal ke bujh gai tasvir sang mein aage 'musavvir' aag 'aqab mein hai ye sadaa pichhe na muD ke dekhnaa is dasht-e-sang mein"

"tifli piiri o naujavaani hech tiin din ki hai zindagaani hech umr-e-do-roza par ghamanD itnaa munimon ki hai lan-taraani hech raat thoDi hai aao pyaar karein subh ko hogi ye kahaani hech chaar din ki bahaar hai saari ye takabbur hai yaar-e-jaani hech dil ke haathon 'haqir' jhagDon mein meri guzri sadaa javaani hech"