nashaat-e-dard kaa dariyaa utarne vaalaa hai — Amardeep Singh

"yaadon mein teri ashk bahaae ko din hue yaad aa ki ab ye lutf uThaae ko din hue muddat hui tu milne na aaya kabhi mujhe mujh ko bhi teri yaad sataae ko din hue har subh fikr-e-kaar-e-jahaan mein khuli hai aankh khvaabon mein koi raat bitaae ko din hue haae vo mai-kade ke sabhi dil-figaar log jin sang koi shaam sajaae ko din hue taaza rafaaqaton ke nae zakhm khaaiye pichhli adaavatein jo ganvaae ko din hue aane lage nigaah mein is vaqt sab ke aib khud se kabhi nazar jo milaae ko din hue mahfil ki samt aanaa paDaa aakhirash hamein khalvat-kade mein dil jo dukhaae ko din hue jab se huaa huun aap mein apne se ham-sukhan auron ko apne sher sunaae ko din hue"

"chehre par ik chehraa lagaanaa siikh liyaa aakhir ham ne taur-e-zamaanaa siikh liyaa kab tak tujh ko zahmat ho katraane ki ham ne bhi ab aankh churaanaa siikh liyaa haae tum to dil se milne vaale the tum ne kab se haath milaanaa siikh liyaa zikr to us kaa ab bhi hotaa hai lekin baat pe ham ne baat banaanaa siikh liyaa dekho laDki Thiik nahin kam-umri mein ye jo tum ne aankh laDaanaa siikh liyaa kaun yahaan par aisaa jis ne vaqt milaa to ham se behtar vaqt ganvaanaa siikh liyaa ham bhi ab kuchh narm tabiat vaale hain bachchon ne bhi haath uThaanaa siikh liyaa"

"udaas rahne ki aadaton kaa shikaar ho kar tu rah na jaanaa ai zindagi taar-taar ho kar faqat sharaabon ke aasre kaT rahe hain din-raat utar chukaa ham ko aur to har khumaar ho kar ham apne hone ki khush-gumaani mein chuur the jab guzar gai ham se yaad-e-parvardigaar ho kar ye be-yaqini hai aadmi tak to Thiik lekin main rah na jaaun khudaa se be-e'tibaar ho kar main kab se qaid-e-vajud mein ghuT rahaa huun lekin mujhe sukun bhi nahin hai khud se faraar ho kar vo bhole-pan ko pahan ke phirtaa hai is jahaan mein tum us se milnaa to bas zaraa hoshiyaar ho kar vo kaam jis ki hamein tavaqqo thi dushmanon se amal mein kuchh log laae to hain pa yaar ho kar abhi to un ko fazaa mein har samt thaa mahaknaa jo khushbuein rah gaiin supurd-e-ghubaar ho kar 'amar' kahin khul na jaae haalat sukun-e-dil ki milo har ik shakhs se baDe be-qaraar ho kar"

"ik faqat khud se gilaa baaqi rahaa varna is dil mein to kyaa baaqi rahaa ik taraf teri kami khalti rahi ik taraf apnaa khalaa baaqi rahaa raah ki aasaaniyaan jaati rahin manzilon kaa marhala baaqi rahaa zindagi-dar-zindagi chalti rahi masala-dar-masala baaqi rahaa ham had-e-idraak se majbur the ham se jo thaa maavaraa baaqi rahaa ho raheinge ham bhi us ke ek din haan agar dil mein khudaa baaqi rahaa shahr-e-dil ke baa-vafaa jab kho gae aakhirash ik be-vafaa baaqi rahaa dil se teri yaad bhi rukhsat hui aur ab kyaa moajiza baaqi rahaa ai dil-e-naakaam kuchh to kar guzar yaa abhi kuchh sochnaa baaqi rahaa"

"gae vo din ki koi gham-shanaas aaegaa jo aa gayaa bhi to kyaa dil ko raas aaegaa chalo to raah-e-mohabbat mein be-talab ho kar maza safar kaa to bin-bhuk-pyaas aaegaa madad ko jis ki khaDaa huun main sar-nigun ho kar baDe ghurur mein vo naa-sipaas aaegaa vo saaf-go hai magar baat kaa hunar sikhe badan hasin hai to kyaa be-libaas aaegaa ajab nahin ki tire dar pe ek roz ye shakhs har ek samt se ho kar udaas aaegaa main duriyon kaa nayaa baab khol rakhtaa huun abhi vo shakhs mire aur paas aaegaa"

"jahaan-e-aam ko yaksar fareb detaa hai vo gham-zada ho to hans kar fareb detaa hai kuchh us ki tarz-e-adaa bhi kamaal hai kuchh vo nazar nazar se milaa kar fareb detaa hai main aise maahir-e-fan kaa murid huun jo mujhe mire gumaan se baDh kar fareb detaa hai miTaa gai hai mujhe ik nigaah-e-naaz to kyaa baDe-baDon ko ye manzar fareb detaa hai ham ahl-e-dil bhi isi par yaqin karte hain hamein ye dil jo ki aksar fareb detaa hai main is liye bhi tiraa ehtiraam kartaa huun tu mujh ko mujh se bhi behtar fareb detaa hai 'amar' ye us kaa karam hai ki vo ik ahl-e-kamaal agarche de bhi to kah kar fareb detaa hai"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"