san li sadaa-e-koh-e-nidaa aur chal paDe — Makhmoor Saeedi

"kasak puraane zamaane ki saath laayaa hai tiraa khayaal ki barson ke baad aayaa hai kisi ne kyuun mire qadmon tale bichhaayaa hai vo raasta ki kahin dhuup hai na saayaa hai Dagar Dagar vahi galiyaan chali hain saath mire qadam qadam pe tiraa shahr yaad aayaa hai bataa rahi hai ye shiddat ujaaD mausam ki shaguft-e-gul kaa zamaana qarib aayaa hai havaa-e-shab se kaho aae phir bujhaane ko charaagh ham ne sar-e-shaam phir jalaayaa hai kaho ye Dubte taaron se do ghaDi ruk jaaein nishaan-e-gum-shudagaan muddaton mein paayaa hai bas ab ye pyaas kaa sahraa ubuur kar jaao nadi ne phir tumhein apni taraf bulaayaa hai fusun-e-khvaab-e-tamaashaa ki TuTtaa jaae main so rahaa thaa ye kis ne mujhe jagaayaa hai sulag uThe hain sharaare badan mein kyuun 'makhmur' khunuk havaa ne jo baDh kar gale lagaayaa hai"

"vo daur-e-nashaat-o-dida-o-dil jaise bas abhi guzraa hi to hai siine ki kasak kis tarah miTe har daagh-e-kuhan taaza hi to hai tu saath kahaan lekin ab tak har rahguzar-e-tanhaai par jo aage aage chaltaa hai ai dost koi tujh saa hi to hai is taair-e-aavaara ke liye yuun jaal na bun ummidon ke uDtaa huaa lamha jaise abhi roke se tire ruktaa hi to hai maalum nahin kis vaqt ye kyaa bartaav kisi se karti hai duniyaa se koi ummid na rakh maayus na ho duniyaa hi to hai kirnein nae din ke suraj ki phaileingi to gum ho jaaegaa taarik hai jis se dil kaa ufuq guzri shab kaa saayaa hi to hai lamhon ke hujum-e-gurezaan mein ik lamha jise apnaa kahiye jaan de ke bhi haath aa jaae agar mahngaa kab hai sastaa hi to hai 'makhmur' taaaqub kar dekho kuchh duur nahin haath aa jaae ik gum-shuda khushbu kaa jhonkaa aangan se abhi guzraa hi to hai"

"jaada-e-marg-e-musalsal se guzartaa jaaun zindagi ye hai ki har saans mein martaa jaaun khuun har lamha-e-maujud kaa kartaa jaaun rang tasvir-e-shab-o-roz mein bhartaa jaaun muntashir silsila-e-gham ko to kartaa jaaun saath hi saath magar khud bhi bikhartaa jaaun bas yunhi hamsari-e-ahl-e-jahaan mumkin hai dam-ba-dam apni bulandi se utartaa jaaun main kisi manzil-e-hasti pe kahaan ruktaa thaa raah mein tum jo na mil jaao guzartaa jaaun umr bhar jaada-e-pur-khaar pe chalnaa hogaa do-ghaDi saaya-e-gul mein bhi Thahartaa jaaun apni qismat huun ulajhtaa hi chalaa jaataa huun teri taqdir nahin huun ki sanvartaa jaaun madd-o-jazr-e-yam-e-ehsaas kaa parvarda huun Dubtaa jaaun magar khud hi ubhartaa jaaun aa hi niklaa huun jo yaadon ke khanDar tak 'makhmur' bhule-bisron se mulaaqaat bhi kartaa jaaun"

"labon pe hai jo tabassum to aankh pur-nam hai shuur-e-gham kaa ye aalam ajiib aalam hai guzar na jaada-e-imkaan se be-khayaali mein yahin kahin tiri jannat yahin jahannam hai bhaTak rahaa hai dil imroz ke andheron mein nishaan-e-manzil-e-fardaa bahut hi mubham hai baDhaa diyaa hai asiron ki khasta-haali ne qafas se taa-ba-chaman varna faasla kam hai abhi nahin kisi aalam mein dil Thaharne kaa abhi nazar mein tiri anjuman kaa aalam hai kahaan ye zindagi-e-harza-gard le aai na rahguzaar-e-tarab hai na jaada-e-gham hai kuchh aise ham ne tire gham ki parvarish ki hai ki jaise maqsad-e-hasti faqat tiraa gham hai"

"laala-o-gul kaa jahaan raas kab aayaa hai mujhe in nazaaron ne bahut khuun rulaayaa hai mujhe vaqt ne jab koi aaina dikhaayaa hai mujhe kyaa bhayaanak miraa chehra nazar aayaa hai mujhe talkhi-e-marg rag-o-pai mein utarti jaae zindagi tu ne ye kyaa zahr pilaayaa hai mujhe chalte chalte yunhi thak kar kahin so jaaungaa dasht-e-ghurbat ki kaDi dhuup hi saayaa hai mujhe zindagi ne miri dam saadh liyaa hai jaise jab tiri yaad mein khoyaa huaa paayaa hai mujhe ufuq-e-dil pe nazar aati hai kho jaati hai ek parchhaain ne divaana banaayaa hai mujhe ghar se niklaa huun to ab puchh rahaa huun khud se jaa rahaa huun main kahaan kis ne bulaayaa hai mujhe koi hogaa jo miri raah takegaa shaayad ik yahi vahm yahaan khinch ke laayaa hai mujhe sirf ik khvaab thaa main apne zamaane ke liye jis ne paayaa hai mujhe us ne ganvaayaa hai mujhe do sitaaron ki mulaaqaat kaa vahshi naghma be-sadaa raat ne phir aaj sunaayaa hai mujhe khvaab us ke kabhi ho jaaein na viraan 'makhmur' us ne kyon apne khayaalon mein basaayaa hai mujhe"

"jab koi shaam-e-hasin nazr-e-kharaabaat hui aksar aise mein tire gham se mulaaqaat hui aap-apne ko na pahchaan sake ham taa-der un se bichhDe to ajab surat-e-haalaat hui husn se nibh na na saki vaz-e-karam aakhir tak avval avval to mohabbat ki mudaaraat hui roz mai pi hai tumhein yaad kiyaa hai lekin aaj tum yaad na aae ye nai baat hui us ne aavaaz mein aavaaz milaa di thi kabhi aaj tak khatm na mausiqi-e-jazbaat hui dil pe ik gham ki ghaTaa chhaai hui thi kab se aaj un se jo mile TuuT ke barsaat hui kis ki parchhaain paDi kaun idhar se guzraa itni rangin jo guzargaah-e-khayaalaat hui un se ummid-e-mulaaqaat ke baad ai 'makhmur' muddaton tak na khud apne se mulaaqaat hui"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"chaand bhi khoyaa khoyaa saa hai taare bhi khvaabida hain aaj fazaa ke bojhal-pan se lahje bhi sanjida hain jaane kin kin logon se is dard ke kyaa kyaa rishte the hijr ki is aabaad saraa mein sab chehre naadida hain itne barson baad bhi donon kaise TuuT ke milte hain tu hai kitnaa saada-dil aur ham kitne pechida hain sun jaanaan ham tark-e-taalluq aur kisi din kar leinge aaj tujhe bhi ujlat si hai ham bhi kuchh ranjida hain kaanon mein ik sargoshi hai be-maani si sargoshi aankhon mein kuchh khvaab saje hain khvaab bhi umr-rasida hain ghar ki vo makhdush imaarat gir ke phir taamir hui ab aangan mein peD hain jitne saare shaakh burida hain is basti mein ek saDak hai jis se ham ko nafrat hai us ke niche pagDanDi hai jis ke ham girvida hain"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"dast-kash hon na mai-e-gul ke khush-aashaam abhi ki labaalab hain mah-o-mehr ke do-jaam abhi zehn mein saaqi hai mai-khaana hai hai jaam abhi hosh kahtaa huun ise hosh kaa kyaa kaam abhi mujh ko darkaar na hai kufr na islaam abhi sidhe sidhe hi chale aate hain paighaam abhi tu bhi baaqi tiri rahmat bhi hai baaqi saaqi rahne de hai mai-e-isyaan se baDaa kaam abhi khaal-o-gesu se hai ye silsila-e-raaz-o-niyaaz daana sad-daana ho ye daam ho sad-daam abhi ziist ke khvaab ki taabir abhi baaqi hai ibtidaa dekh chuke hai magar anjaam abhi rah-rav-e-ishq abhi duur hai mearaaj-e-habib rashk-e-manzil na huaa raah mein har gaam abhi zarra-zarra hai ik aatish-kada-e-nur kalim dekh agar tu na ho aatish-zada-e-baam abhi imtiyaaz-e-man-o-tu raaz-e-khafi hai lekin khaasgaan ke liye kahtaa huun sar-e-aam abhi aks ko zo'm hai be-misli-e-rang-o-bu kaa turfa ye hai ki muqaabil hai vo gulfaam abhi raaz-goi tiri 'aiman' hai gunaah-e-akbar maang le afv ki us kaa hai karam aam abhi"

"baad-e-shimaal chalne lagi ang ang mein lipTaa hai kaun mujh se ye patjhaD ke rang mein khvaahish ke kaarobaar se bachnaa muhaal hai utregaa tu bhi saath mire is surang mein main aandhiyon mein haath bhi pakDun tiraa to kyaa ik shaakh-e-be-siper huun havaaon ki jang mein 'raanjhaa' main 'ahd-e-nau kaa qabilon mein baT gayaa to 'hir' ban ke pi na saki zahr jhang mein garmaa sakin na chaahatein teraa kaThor jism har ek jal ke bujh gai tasvir sang mein aage 'musavvir' aag 'aqab mein hai ye sadaa pichhe na muD ke dekhnaa is dasht-e-sang mein"

"tifli piiri o naujavaani hech tiin din ki hai zindagaani hech umr-e-do-roza par ghamanD itnaa munimon ki hai lan-taraani hech raat thoDi hai aao pyaar karein subh ko hogi ye kahaani hech chaar din ki bahaar hai saari ye takabbur hai yaar-e-jaani hech dil ke haathon 'haqir' jhagDon mein meri guzri sadaa javaani hech"