tiri khamoshi zabaan-daani se maavaraa hai — Ali Shiran

"safar ba-khair ho anjaam tak pahunch jaaein khudaa kare ye qadam shaam tak pahunch jaaein sukhan kaa saaraa safar is liye kiyaa main ne ki mere honT tire naam tak pahunch jaaein nae junun ki aziyyat bhi mohtaram hai mujhe guzishta zakhm to aaraam tak pahunch jaaein makaan-e-husn se baahar bhi dekh aisaa na ho sharif log dar-o-baam tak pahunch jaaein khabar nahin miri aavaaz phir sune koi jinhein pahunchnaa hai kohraam tak pahunch jaaein hasin raat kaa mahtaab Duub jaane se qabl sitaare gardish-e-ayyaam tak pahunch jaaein khudaa ke bande khudaa tak pahunch gae hain 'ali' jo raam vaale hain vo raam tak pahunch jaaein"

"aankh jo bhi tiri aankhon se milaa baiThtaa hai qais ke halqa-e-ahbaab mein jaa baiThtaa hai mustaqil kaise rahe jism ke khitte kaa nizaam hukmraan roz mire dil mein nayaa baiThtaa hai ik taraf dil hai tiraa ek taraf meraa makaan dekhnaa ye hai ki sailaab mein kyaa baiThtaa hai daar-e-duniyaa miri peshaani ko chaukhaT na dikhaa ye vo masnad hai jahaan sirf khudaa baiThtaa hai dhuup ke vaqt shajar god mein letaa hai mujhe raat ho jaae to pahre pe diyaa baiThtaa hai dil mohabbat mein izaafe ki talab karte hue dusre ishq mein pahlaa bhi ganvaa baiThtaa hai ye bhi Thukraayaa huaa lagtaa hai tere dar kaa main jahaan baiThtaa huun ranj bhi aa baiThtaa hai"

"mujhe shuur bhi khvaahish kaa daagh lagne lagaa jahaan bhi dil ko lagaayaa dimaagh lagne lagaa talaash itnaa kiyaa raushni ko jangal mein thakan ke baa'd andheraa charaagh lagne lagaa kamaal darje ki shaffaafiyat thi aankhon mein khud apnaa aks mujhe un mein daagh lagne lagaa palak parinda thaa lab phuul aur zulf shajar vo chehra pahli nazar mein hi baagh lagne lagaa tu saamne thaa magar koi aur lag rahaa thaa pas-e-khalaa-e-mohabbat suraagh lagne lagaa"

"abhi mile hi nahin the mujhe suraagh mire havaae vaqt ne gul kar diye charaagh mire falak shuur pe ghaalib zamin jibillat par khalaa sameTe hue hain dil-o-dimaagh mire sanbhaal rakkhegi aulaad aakhirash kab tak qalam davaat kitaabein bujhe charaagh mare giraa diyaa tiri taamir ne miraa sab kuchh na gaanv gaanv rahaa aur na baagh baagh mire qadam-qadam pe mileinge lahu ke khushk nishaan bhaTakne deinge na aaindagaan ko daagh mire"

"kirdaar nibhaa kar bhi fasaane ke nahin the kuchh log zamaane mein zamaane ke nahin the ham suukh gae hain to ye ehsaas huaa hai paude tiri miTTi mein lagaane ke nahin the ai arz-e-madina tire baaghaat ke maalik rah jaane ke haqdaar the jaane ke nahin the kis dukh mein bharaa shahr Dubone pe ba-zid hai jis aankh mein do ashk bhi aane ke nahin the ye sunnat-e-shabbir na hoti to kabhi ham aabaai vatan chhoD ke jaane ke nahin the"

"mire sipurd kiyaa hai na khud liyaa hai mujhe kisi ne hairat-e-imkaan mein rakh diyaa hai mujhe bachaa nahin main zaraa bhi badan ke bartan mein tire khayaal ne be-saakhta piyaa hai mujhe tu ek shakhs hai lekin tiri mohabbat mein dil-o-dimaagh ne taqsim kar diyaa hai mujhe main apni samt bhi dekhun to kufr lagtaa hai khudaa ne yaad baDi chaah se kiyaa hai mujhe judaai ranj udaasi andheraa khauf ghuTan har ek yaar ne dil khol kar jiyaa hai mujhe tumhaare baa'd nahin ab kisi ki gunjaaish ki tum ne itnaa mohabbat se bhar diyaa hai mujhe"

"vo mujhe zindagi bataataa hai phir bhalaa kyon nazar churaataa hai main usi ko uThaa rahaa thaa par vo mujhe hi faqat giraataa hai yaad us ko kiyaa yahaan main ne par mujhe vo vahaan bhulaataa hai raaz saare bataa diye main ne kyon magar raaz vo chhupaataa hai log masruf hain mohabbat mein aur vo dil miraa dukhaataa hai"

"jis din se meraa khvaab suhaanaa badal gayaa us din se zindagi kaa fasaana badal gayaa sunne lagaa huun jab se nasihat baDon ki main jaari thaa jo labon pe taraana badal gayaa pahchaan kaa havaala bhi baaqi nahin rahaa chehre ke saath aaina-khaana badal gayaa uThti nahin hai aankh bhi ab aasmaan ki samt jab se gali kaa chaand puraanaa badal gayaa tahzib jin ke ghar ki 'alaamat thi kal talak afsos aaj un kaa gharaanaa badal gayaa 'azmat kaa taaj sar pe hai 'akhilesh' ke sajaa aisi havaa chali ki zamaana badal gayaa itni sharaafaton mein kami aa gai hai aaj pahle thaa jo libaas puraanaa badal gayaa ahl-e-vafaa ne jis ki thi taarikh ki raqam 'faaruq' 'ishq kaa vo fasaana badal gayaa"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"

"khaamushi ke batn se ye guftani paidaa hui main ba-zaahir chup huaa aur shaaeri paidaa hui is tarah saabit huaa gham aur khushi kaa imtizaaj hanste hanste us ki aankhon mein nami paidaa hui jurm ki paadaash mein ham khaak par pheinke gae so yahaan par intiqaaman zindagi paidaa hui khauf ne hi maslahat ki raah bhi ijaad ki main andheron se Daraa aur raushni paidaa hui dil mein kab utri kisi ke be-maaani guftugu baat karne se to bas aavaaz hi paidaa hui"

"zindagi bojhal hui aazaar se jism jhuktaa jaa rahaa hai baar se doston ne is qadar dhoke diye aur raghbat baDh gai aghyaar se zindagi kaa ik nayaa imkaan huaa ik daricha khul gayaa divaar se ab bayaan kaise karun rudaad-e-gham kaam mushkil hai dil-e-naa-chaar se hijr ki raaton mein bahtaa hi rahaa ek naala chashm-e-dariyaa-baar se misl-e-majnun regzaaron mein rahe sar paTakte ret ki divaar se ham asiraan-e-mohabbat hain yahaan uljhe hain ab gesu-e-khamdaar se 'qalb' teri ghazlein yuun shaadaan karein dard nikle hai tire ashaar se"

"zindagi dushvaar hogi ye kabhi sochaa na thaa vo bagule gham ke uTThe jin kaa andesha na thaa saamne tum aa gae ho to bataa duun jaan-e-jaan jaise dil dhaDkaa thaa ab ki vaise dil dhaDkaa na thaa ye iraada kar liyaa thaa ham na bichhDeinge kabhi TuTeinge ik pal mein rishte ye kabhi sochaa na thaa yaad-e-maazi miT rahi hai vaqt ki raftaar se ab tasavvur mein hamaare koi bhi chehra na thaa sakht hairat ho rahi hai dekh kar apnaa vajud dhuup mein the sab ke saaye par miraa saayaa na thaa shauq-e-manzil dekh meri dekh meraa hausla shahr-e-dil ke raaston mein main kabhi Thahraa na thaa 'qalb' ko sahraa-navardi raas kyaa aati bhalaa vo kabhi aavaargi mein dar-ba-dar bhaTkaa na thaa"