us ne chaahat ko miri samt baDhaayaa kab thaa — Asma Mohammad Shahid Khan

"apni hasti ko nigaahon mein giraate kab tak dast-basta tire darbaar mein aate kab tak teri khaamosh-nigaahi kaa bharam kyaa rakhte apne ashkon ko zamaane se chhupaate kab tak sabr ki ret pe ashkon kaa janaaza rakh kar harf-e-khaamosh ko ham she'r banaate kab tak tu jo raazi hi nahin ham se kisi baat pe bhi apne lafzon se tujhe aur manaate kab tak dil ki dahliz pe likkhaa hai tiraa naam abhi zakhm har baar nae dil pe lagaate kab tak main agar dil mein nahin huun to bataa de mujh ko ye tamaasha sar-e-baazaar dikhaate kab tak sab ne maanaa ki ye dil teraa talabgaar rahaa zakhm siine ke zamaane se chhupaate kab tak zindagi khud hi savaalon kaa safar hai 'asmaa' apni aankhon mein javaabon ko sajaate kab tak"

"imaan miraa chain se jiine nahin detaa kyuun ashk-e-mohabbat mujhe piine nahin detaa us shakhs ko main kaise bhalaa ghar mein bulaaun jo chaak-e-garebaan mujhe siine nahin detaa kahte hain mohabbat to 'ibaadat hai saraapaa phir kyuun ye zamaana mujhe jiine nahin detaa main us pe bhalaa kaise bharosa karun 'asmaa' jo Dubne vaalon ko safine nahin detaa"

"us se keh do mire khvaabon mein na aae vo kabhi mere soe hue armaan na jagaae vo kabhi kaT gai 'umr miri niind ki aaghosh mein hi loriyaan de ke mujhe ab na sulaae vo kabhi chhuT gayaa daaman-e-ummid mire haathon se naghma-e-zist mujhe ab na sunaae vo kabhi main ne ik 'umr guzaari hai bhulaane mein use phir mire dil mein mohabbat na jagaae vo kabhi ek hi aan mein sab khaak huaa hai 'asmaa' chaand taaron se shabistaan na sajaae vo kabhi"

"ab to duniyaa se dil lagaanaa kyaa chaand taaron se ghar sajaanaa kyaa main ne baandhaa hai peT par patthar mujh ko rokegaa ab zamaana kyaa vo to kahtaa hai ab na aaegaa mil gayaa us ko phir bahaana kyaa mere aangan mein chaand utraa hai in charaaghon se lau lagaanaa kyaa baat uDne lagi hai 'asmaa' ki ban gayaa hai koi fasaana kyaa"

"us se milnaa hai to phir niind kahaan aaegi raat jal jal ke charaaghon si hi kaT jaaegi us ke aane ke tasavvur se bahakte hain qadam us ki khushbu se miri raat mahak jaaegi sochti huun ki agar vo na milegaa mujh ko jism se jaan miri pal mein nikal jaaegi us se keh do ki mujhe aise na dekhe varna shaakh-e-gul baad-e-sabaa se hi lachak jaaegi jab se dekhaa hai use chaand ke badle 'asmaa' ab mujhe kaise bhalaa shakl koi bhaaegi"

"khvaab ban kar miri aankhon mein samaa jaataa hai meri soi hui raaton ko jagaa jaataa hai jab bhi main haath uThaati huun du'aa ki khaatir vo khudaa ban ke mire saamne aa jaataa hai main ne us ke liye duniyaa se baghaavat ki hai vo mujhe chhoD ke har roz chalaa jaataa hai ab to hairaan bhi hoti nahin aankhein meri jo bhi aataa hai vo aaina dikhaa jaataa hai us ko maa'lum nahin raat kaa 'aalam 'asmaa' shaam hote hi mire ghar se chalaa jaataa hai"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"chaand bhi khoyaa khoyaa saa hai taare bhi khvaabida hain aaj fazaa ke bojhal-pan se lahje bhi sanjida hain jaane kin kin logon se is dard ke kyaa kyaa rishte the hijr ki is aabaad saraa mein sab chehre naadida hain itne barson baad bhi donon kaise TuuT ke milte hain tu hai kitnaa saada-dil aur ham kitne pechida hain sun jaanaan ham tark-e-taalluq aur kisi din kar leinge aaj tujhe bhi ujlat si hai ham bhi kuchh ranjida hain kaanon mein ik sargoshi hai be-maani si sargoshi aankhon mein kuchh khvaab saje hain khvaab bhi umr-rasida hain ghar ki vo makhdush imaarat gir ke phir taamir hui ab aangan mein peD hain jitne saare shaakh burida hain is basti mein ek saDak hai jis se ham ko nafrat hai us ke niche pagDanDi hai jis ke ham girvida hain"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"dast-kash hon na mai-e-gul ke khush-aashaam abhi ki labaalab hain mah-o-mehr ke do-jaam abhi zehn mein saaqi hai mai-khaana hai hai jaam abhi hosh kahtaa huun ise hosh kaa kyaa kaam abhi mujh ko darkaar na hai kufr na islaam abhi sidhe sidhe hi chale aate hain paighaam abhi tu bhi baaqi tiri rahmat bhi hai baaqi saaqi rahne de hai mai-e-isyaan se baDaa kaam abhi khaal-o-gesu se hai ye silsila-e-raaz-o-niyaaz daana sad-daana ho ye daam ho sad-daam abhi ziist ke khvaab ki taabir abhi baaqi hai ibtidaa dekh chuke hai magar anjaam abhi rah-rav-e-ishq abhi duur hai mearaaj-e-habib rashk-e-manzil na huaa raah mein har gaam abhi zarra-zarra hai ik aatish-kada-e-nur kalim dekh agar tu na ho aatish-zada-e-baam abhi imtiyaaz-e-man-o-tu raaz-e-khafi hai lekin khaasgaan ke liye kahtaa huun sar-e-aam abhi aks ko zo'm hai be-misli-e-rang-o-bu kaa turfa ye hai ki muqaabil hai vo gulfaam abhi raaz-goi tiri 'aiman' hai gunaah-e-akbar maang le afv ki us kaa hai karam aam abhi"

"baad-e-shimaal chalne lagi ang ang mein lipTaa hai kaun mujh se ye patjhaD ke rang mein khvaahish ke kaarobaar se bachnaa muhaal hai utregaa tu bhi saath mire is surang mein main aandhiyon mein haath bhi pakDun tiraa to kyaa ik shaakh-e-be-siper huun havaaon ki jang mein 'raanjhaa' main 'ahd-e-nau kaa qabilon mein baT gayaa to 'hir' ban ke pi na saki zahr jhang mein garmaa sakin na chaahatein teraa kaThor jism har ek jal ke bujh gai tasvir sang mein aage 'musavvir' aag 'aqab mein hai ye sadaa pichhe na muD ke dekhnaa is dasht-e-sang mein"

"tifli piiri o naujavaani hech tiin din ki hai zindagaani hech umr-e-do-roza par ghamanD itnaa munimon ki hai lan-taraani hech raat thoDi hai aao pyaar karein subh ko hogi ye kahaani hech chaar din ki bahaar hai saari ye takabbur hai yaar-e-jaani hech dil ke haathon 'haqir' jhagDon mein meri guzri sadaa javaani hech"