vahi hain apni raaton ki kathaaein — Aitbar Sajid

"kaise kahin ki jaan se pyaaraa nahin rahaa ye aur baat ab vo hamaaraa nahin rahaa aansu tire bhi khushk hue aur mere bhi nam ab kisi nadi kaa kinaaraa nahin rahaa kuchh din tumhaare lauT ke aane ki aas thi ab is umiid kaa bhi sahaaraa nahin rahaa raste mah-o-nujum ke tabdil ho gae in khiDkiyon mein ek bhi taaraa nahin rahaa samjhe the dusron se bahut mukhtalif tujhe kyaa maan lein ki tu bhi hamaaraa nahin rahaa haathon pe bujh gai hai muqaddar ki kahkashaan yaa raakh ho gayaa vo sitaaraa nahin rahaa tum e’tibaar us ke liye kyuun udaas ho ik shakhs jo kabhi bhi tumhaaraa nahin rahaa"

"shahr-e-havaa mein jalte rahnaa andeshon ki chaukhaT par raat gae tak uljhe rahnaa be-mafhum khayaalon mein qasr-e-umr gavaahi degaa kaise kaise karb sahe kaisi kaisi rut guzri hai ham par itne saalon mein dosh-e-khalaa se khaak-e-zamin par utre to ehsaas huaa taare baanTne vaale raahi paD gae kin janjaalon mein le aai kis qarya-e-shab mein ik jhuTe mahtaab ki chaah saaya saaya bhaTak rahaa huun be-tanvir ujaalon mein mausam mausam yahi rahaa gar khushbu ki tahqir kaa rang siise ki kaliyaan phuTeingi ab lohe ki Daalon mein 'saajid' ab tak bhugat rahe hain ik be-ant sazaa ki umr apnaa naam likhaa baiThe the ik din jiine vaalon mein"

"dil hain yuun muztarib makaanon mein machhliyaan jaise martabaanon mein dhuup se DhunDte hain raah-e-faraar log shishe ke saaebaanon mein be-iraada kalaam ki khvaahish be-sabab luknatein zabaanon mein teri aamad pe jaise lauT aayaa vaqt guzre hue zamaanon mein dil dhaDaktaa hai har sitaare kaa aaj ki raat aasmaanon mein zang-aalud ho gae jazbi jam gae harf sard-khaanon mein reshmi log DhunDte hain ham shahr ke aahani makaanon mein"

"kahaa din ko bhi ye ghar kis liye viraan rahtaa hai yahaan kyaa ham saa koi be-sar-o-saamaan rahtaa hai dar-o-divaar sannaaTe ki chaadar mein hain khvaabida bhalaa aisi jagah zinda koi insaan rahtaa hai musalsal puchhne par ek chilman se javaab aayaa yahaan ik dil-shikasta saahab-e-divaan rahtaa hai jhijak kar main ne puchhaa kyaa kabhi baahar nahin aataa javaab aayaa use khalvat mein itminaan rahtaa hai kahaa kyaa us ke rishta-daar bhi milne nahin aate javaab aayaa ye sahraa raat-din sunsaan rahtaa hai kahaa koi to hogaa us ke dukh-sukh baanTne vaalaa javaab aayaa nahin khaali ye ghar ye lawn rahtaa hai kahaa is ghar ke aangan mein hain kuchh phulon ke paude bhi javaab aayaa ki khaali phir bhi har gul-daan rahtaa hai kahaa kyaa is mohalle mein nahin pursaan-e-haal us kaa javaab aayaa khayaal us kaa mujhe har aan rahtaa hai khudaa kaa shukr hai ham ik fazaa mein saans lete hain agar milte nahin itnaa to itminaan rahtaa hai"

"tiri rahmaton ke dayaar mein tire baadalon ko pataa nahin abhi aag sard hui nahin abhi ik alaav jalaa nahin miri bazm-e-dil to ujaD chuki miraa farsh-e-jaan to simaT chukaa sabhi jaa chuke mire ham-nashin magar ek shakhs gayaa nahin dar-o-baam sab ne sajaa liye sabhi raushni mein nahaa liye miri ungliyaan bhi jhulas gaiin magar ik charaagh jalaa nahin gham-e-zindagi tiri raah mein shab-e-aarzu tiri chaah mein jo ujaD gayaa vo basaa nahin jo bichhaD gayaa vo milaa nahin jo dil-o-nazar kaa surur thaa mire paas rah ke bhi duur thaa vahi ek gulaab umiid kaa miri shaakh-e-jaan pe khilaa nahin pas-e-kaarvaan sar-e-rahguzar main shikasta-paa huun to is liye ki qadam to sab se milaa liye miraa dil kisi se milaa nahin miraa ham-safar jo ajiib hai to ajib-tar huun main aap bhi mujhe manzilon ki khabar nahin use raaston kaa pata nahin"

"mujhe vo kunj-e-tanhaai se aakhir kab nikaalegaa akele-pan kaa ye ehsaas mujh ko maar Daalegaa kisi ko kyaa paDi hai meri khaatir khud ko zahmat de pareshaan hain sabhi kaise koi mujh ko sambhaalegaa abhi taarikh naami ek jaadugar ko aanaa hai jo zinda shahr aur ajsaam ko patthar mein Dhaalegaa bas agle moD par manzil tiri aane hi vaali hai mire ai ham-safar tu kitnaa meraa dukh baTaa legaa sharik-e-ranj kyaa karnaa use taklif kyaa deni ki jitni der baiThegaa vahi baatein nikaalegaa rihaa kar de qafas ki qaid se ghaayal parinde ko kisi ke dard ko is dil mein kitne saal paalegaa"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"