ye na samjho ghubaar hain ham log — Khursheed Alig

"kahaa na kuchh bhi dabaa di gai miri aavaaz uDaa na thaa ki shikasta hue par-e-parvaaz ajiib qaid mein dam hai ye kaisaa jiinaa hai ki zindagi hui jaati hai maut ki ghammaaz taDap taDap ke sar-e-daar mar gayaa koi hayaat kahiye ki marne hi kaa hai ik andaaz jigar kaa soz mayassar nahin to kuchh bhi nahin jigar ke soz se saaz-e-hayaat baa-aavaaz koi salib pe kyaa soch ke laTaktaa hai masih-e-vaqt se puchhe zaraa koi ye raaz firaaq-e-yaar mein har lamha zindagi hai azaab daraaz silsila-e-zist hai bahut hi daraaz gham-e-hayaat ne shaair banaa diyaa 'khurshid' vagarna main kahaan aur shaairi kaa ye eazaaz"

"husn maasum nahin ishq pe ilzaam ke baad aap kaa naam bhi aataa hai mire naam ke baad hai yahi aalam-e-mearaaj-e-mohabbat shaayad ab koi naam nahin lab pe tire naam ke baad ab mohabbat ki tumhein laaj to rakhni hogi log lete hain tiraa naam mire naam ke baad naa-muraadi se mire dil ki khalish kam na hui tishnagi aur baDhi hasrat-e-naakaam ke baad uljhanein ishq mein kuchh aur bhi baDh jaati hain kabhi aaghaaz se pahle kabhi anjaam ke baad main khataavaar-e-mohabbat sahi lekin ai dost zindagi aur nikhar aai is ilzaam ke baad"

"charaagh jalte nahin hain jalaae jaate hain ye ashk bahte nahin hain bahaae jaate hain jab un ki bazm mein pahunche to ye huaa maalum yahaan charaagh nahin dil jalaae jaate hain khizaan ke khauf se lutf-e-bahaar kyon chhoDein yahi to soch ke gul muskuraae jaate hain shab-e-firaaq ki be-taabiyaan na puchh hamein kuchh aise zakhm hain jo dil ko khaae jaate hain samaan ab aa gayaa sone kaa ghaaliban 'khurshid' charaagh shaam ke ghar ghar bujhaae jaate hain"

"na-jaane TuuT ke kab se bikhar rahaa huun main ki apni zaat kaa khud ek saaneha huun main mire lahu ki zarurat hai tere haathon ko isi tasavvur-e-rangin se ji rahaa huun main musibatein to hain apni shumaar se baahar ki haadsaat mein har lahza mubtalaa huun main na-jaane kaisaa safar hai ki kuchh pata hi nahin chalaa kahaan se kahaan aa ke ruk gayaa huun main na yaad aae koi aur na de koi aavaaz nikal ke yaadon ki basti se aa gayaa huun main anaa ko toD ke aa jaaun tere paas magar tiraa iraada na ab tak samajh sakaa huun main phir aaj sahme hue lamhe yaad aane lage hisaar-e-dard mein 'khurshid' ghir gayaa huun main"

"ham taghaaful ko ibtidaa samjhe aur vo dard ki davaa samjhe vo to begaangi mein the goyaa aur ham un ko aashnaa samjhe shorish-e-dil ne jo kahaa ham se is ko ham hukm aap kaa samjhe un se qaaem huaa hai naqsh-e-vafaa koi un ko na bevafaa samjhe aashnaa-e-muraad-e-saahil hai vo jo tufaan ko naakhudaa samjhe kal sar-e-bazm in ishaaron se kahiye 'khurshid' aap kyaa samjhe"

"bhari mahfil mein zabt-e-gham baa-aasaani bhi karte hain magar tanhaai mein ashkon ki arzaani bhi karte hain miyaan ham khaaksaari mein javaab apnaa nahin rakhte zarurat aa paDe to phir hama-daani bhi karte hain unhein mat dekhein ahl-e-dil hiqaarat ki nigaahon se faqiraan-e-haram shahron pe sultaani bhi karte hain shikaayat be-sabab karte hain apne gum-shuda dil ki kabhi aap apni chizon ki nigahbaani bhi karte hain khaDe hain sab saf-e-insaaniyat mein haath baandhe par zaraa sochein kabhi kyaa kaar-e-insaani bhi karte hain yahi kaasa liye 'khurshid' jo phirte hain galiyon mein yahi jab vaqt aa jaae to man-maani bhi karte hain"

"dil shaad nahin karte aabaad nahin karte mahsus ye hotaa hai vo yaad nahin karte naashaad zamaane ke dil shaad nahin karte kam-aql parindon ko aazaad nahin karte mohtaaj-e-karam aksar rahte hain gharibon ke jo log gharibon ki imdaad nahin karte kuchh log shikaayat ko haq apnaa samajhte hain kuchh log kabhi tum se fariyaad nahin karte ham apne iraadon mein rakhte hain tavaanaai ham daad ke taalib ko bedaad nahin karte jo aap ki niyyat kaa kuchh ilm hamein hotaa ham apni mohabbat ko barbaad nahin karte is daur-e-siyaasat mein 'mahmud' qayaamat hai ahbaab jo karte hain jallaad nahin karte"

"bahr-e-rang-e-daastaan rahne diyaa ik tajassus darmiyaan rahne diyaa ab zamin ban kar bichhaa jaataa hai vo main ne jis ko aasmaan rahne diyaa raushni aur khvaab saare hech the apni aankhon mein dhuaan rahne diyaa vo jagah raushan nahin hogi kabhi is mohabbat ko jahaan rahne diyaa maan ne maathaa chuum kar rukhsat kiyaa maamtaa kaa saaebaan rahne diyaa kul milaa ke ye hai raaz-e-tishnagi ham ne dil ko sargiraan rahne diyaa khud hami paamaal Thahre shauq se khush-gumaan ko khush-gumaan rahne diyaa"

"tere tasavvuraat se aage nahin gayaa ye dil tavahhumaat se aage nahin gayaa jo biich raah chhoD gayaa shukr hai vo shakhs meri tavaqqu'aat se aage nahin gayaa shaayad use pasand thiin jhuTi numaaishein lekin main dil ki baat se aage nahin gayaa jazbaat-e-dil ko vo bhi na kuchh Dhang de sakaa main bhi takallufaat se aage nahin gayaa tohfa bhi us ke vaaste kangan liyaa 'zarim' vallah main us ke haath se aage nahin gayaa"

"ajab mushkil ki dil kaa haal aisaa ho gayaa hai sabhi ab puchhte hain mujh se ye kyaa ho gayaa hai main ye samjhaa ki gham kaa ab mudaavaa ho gayaa hai kuredaa zakhm to ye aur taaza ho gayaa hai kabhi fursat mile to khud se main baatein karungaa mujhe khud se mile bhi to zamaana ho gayaa hai magar ab sochtaa huun toD duun saare maraasim magar dil bhi tire gham se shanaasaa ho gayaa hai miri barbaad hasti kaa nazaara dekhne ko vo aae aur gham mein phir izaafa ho gayaa hai isi dariyaa mein ab khud ko Dubonaa chaahtaa huun ki is dil kaa talaatum mein kinaare ho gayaa hai chalo bhi 'qalb' ab tum dusraa dekho Thikaanaa ki is basti mein apnaa sab paraayaa ho gayaa hai"

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"khurshid jhaanktaa hai ridaa-e-sahaab se yaa nuur chhan rahaa hai kisi ke naqaab se baahar jo aaj dekh liyaa hai hijaab se suraj laraz rahaa hai tumhaare shabaab se naaseh Daraa rahe the khudaa ke 'azaab se khud hi janaab baaz na aae sharaab se lamhe guzar chuke hain jo phulon ki sej par is daur-e-pur-khatar mein vo lagte hain khvaab se khud ko to pahle dekhiye phir kahiye bevafaa bas itni iltijaa hai hamaari janaab se har roz ik na ik nai zid hai zabaan par tang aa gayaa huun main dil-e-khaana-kharaab se ahl-e-vafaa mein meraa vahi naam paD gayaa tum ne mujhe navaaz diyaa jis khitaab se kin manzilon pe meraa nishaan-e-qadam nahin puchho miraa maqaam mah-o-aaftaab se jo husn kaa kahin bhi tahaffuz na kar sake phir kaun saa hai faaeda aisi naqaab se saaya bhi jis hasin kaa DhunDe na mil sakaa be-misl vo khudaa ke hue intikhaab se sun kar hamaare she'r vo kuchh muskuraa diye 'faaruq' aaj ham bhi rahe kaamyaab se"