Ghazal

ye mujh se puchhte hain chaaragar kyuun

ki tu zinda to hai ab tak magar kyuun

jo rasta chhoD ke main jaa rahaa huun

usi raste pe jaati hai nazar kyuun

· · ·

dard kuchh din to mehmaan Thahre

ham ba-zid hain ki mezbaan Thahre

sirf tanhaai sirf viraani

ye nazar jab uThe jahaan Thahre

· · ·

khulaa hai dar pa tiraa intizaar jaataa rahaa

khulus to hai magar e'tibaar jaataa rahaa

kisi ki aankh mein masti to aaj bhi hai vahi

magar kabhi jo hamein thaa khumaar jaataa rahaa

· · ·

zindagi ki aandhi mein zehn kaa shajar tanhaa

tum se kuchh sahaaraa thaa aaj huun magar tanhaa

zakhm-khurda lamhon ko maslahat sambhaale hai

an-ginat marizon mein ek chaaragar tanhaa

· · ·

ye tasalli hai ki hain naashaad sab

main akelaa hi nahin barbaad sab

sab ki khaatir hain yahaan sab ajnabi

aur kahne ko hain ghar aabaad sab

· · ·

ba-zaahir kyaa hai jo haasil nahin hai

magar ye to miri manzil nahin hai

ye tuuda ret kaa hai beach dariyaa

ye bah jaaegaa ye saahil nahin hai

· · ·

pyaas ki kaise laae taab koi

nahin dariyaa to ho saraab koi

zakhm-e-dil mein jahaan mahaktaa hai

isi kyaari mein thaa gulaab koi

· · ·

na khushi de to kuchh dilaasa de

dost jaise ho mujh ko bahlaa de

aagahi se mili hai tanhaai

aa miri jaan mujh ko dhoka de

· · ·

dil mein mahak rahe hain kisi aarzu ke phuul

palkon pe khilne vaale hain shaayad lahu ke phuul

ab tak hai koi baat mujhe yaad harf harf

ab tak main chun rahaa huun kisi guftugu ke phuul

· · ·

sukhi Tahni tanhaa chiDiyaa phikaa chaand

aankhon ke sahraa mein ek nami kaa chaand

us maathe ko chume kitne din biite

jis maathe ki khaatir thaa ik Tiikaa chaand

· · ·

ham ne DhunDein bhi to DhunDein hain sahaare kaise

in saraabon pe koi umr guzaare kaise

haath ko haath nahin sujhe vo taariki thi

aa gae haath mein kyaa jaane sitaare kaise

· · ·

hamaare dil mein ab talkhi nahin hai

magar vo baat pahle si nahin hai

mujhe maayus bhi karti nahin hai

yahi aadat tiri achchhi nahin hai

· · ·

yaqin kaa agar koi bhi silsila nahin rahaa

to shukr kijiye ki ab koi gilaa nahin rahaa

na hijr hai na vasl hai ab is ko koi kyaa kahe

ki phuul shaakh par to hai magar khilaa nahin rahaa

· · ·

saari hairat hai miri saari adaa us ki hai

be-gunaahi hai miri aur sazaa us ki hai

mere alfaaz mein jo rang hai vo us kaa hai

mere ehsaas mein jo hai vo fazaa us ki hai

· · ·

jism damaktaa, zulf ghaneri, rangin lab, aankhein jaadu

sang-e-marmar, uudaa baadal, surkh shafaq, hairaan aahu

bhikshu-daani, pyaasaa paani, dariyaa saagar, jal gaagar

gulshan khushbu, koyal kuku, masti daaru, main aur tu

· · ·

dil kaa har dard kho gayaa jaise

main to patthar kaa ho gayaa jaise

daagh baaqi nahin ki naqsh kahun

koi divaar dho gayaa jaise

· · ·

shukr hai khairiyat se huun saahab

aap se aur kyaa kahun saahab

ab samajhne lagaa huun sud-o-ziyaan

ab kahaan mujh mein vo junun saahab

· · ·

main khud bhi sochtaa huun ye kyaa meraa haal hai

jis kaa javaab chaahiye vo kyaa savaal hai

ghar se chalaa to dil ke sivaa paas kuchh na thaa

kyaa mujh se kho gayaa hai mujhe kyaa malaal hai

· · ·

sach ye hai be-kaar hamein gham hotaa hai

jo chaahaa thaa duniyaa mein kam hotaa hai

Dhaltaa suraj phailaa jangal rasta gum

ham se puchho kaisaa aalam hotaa hai

· · ·

yahi haalaat ibtidaa se rahe

log ham se khafaa khafaa se rahe

in charaaghon mein tel hi kam thaa

kyuun gila ham ko phir havaa se rahe

· · ·

gham hote hain jahaan zehaanat hoti hai

duniyaa mein har shai ki qimat hoti hai

aksar vo kahte hain vo bas mere hain

aksar kyuun kahte hain hairat hoti hai

· · ·

ham to bachpan mein bhi akele the

sirf dil ki gali mein khele the

ik taraf morche the palkon ke

ik taraf aansuon ke rele the

· · ·

main kab se kitnaa huun tanhaa tujhe pataa bhi nahin

tiraa to koi khudaa hai miraa khudaa bhi nahin

kabhi ye lagtaa hai ab khatm ho gayaa sab kuchh

kabhi ye lagtaa hai ab tak to kuchh huaa bhi nahin

· · ·

dast-bardaar agar aap ghazab se ho jaaein

har sitam bhuul ke ham aap ke ab se ho jaaein

chaudhvin shab hai to khiDki ke giraa do parde

kaun jaane ki vo naaraaz hi shab se ho jaaein

· · ·