Ghazal

"vujud naghma-saraa hai hayaat raqs mein hai vo sarkhushi hai ki sab kaaenaat raqs mein hai churaa ke laayaa huun charkh-e-kuhan se taabaani huzur-e-'adl miri vaardaat raqs mein hai vo chal paDaa hai su-e-hashr koi aavaara taraazu vajd mein hai pul-siraat raqs mein hai gunaah-e-rasm-kushi ham pe kyon na ho saabit subut naach rahe hain sabaat raqs mein hai jhaTak diyaa hai ye kis mah-jabin ne zulfon ko ki taabishon se bayaabaan ki raat raqs mein hai tabib nuskhe mein 'aazaad' likh rahaa hai junun khushaa vo dard ki jis se najaat raqs mein hai"

"be-rabt se lafzon ke hain be-rabt ma'aani baalaa-e-had-e-fahm hai hasti ki kahaani ab lauT ke dekhun to dikhaai nahin deti us rishta-e-derina ki koi bhi nishaani sahraa mein pas-e-shaam nikal aae na suraj lene ko hai angDaai vo khvaabida javaani dil mein to samundar hain bahut karb ke lekin aankhon ko mayassar nahin do buund bhi paani bahte hue dariyaa pe na kar takiya ki is ne jalte hue khemon ki nahin aag bujhaani ai husn-e-samaa'at abhi fursat nahin varna ik turfa hikaayat thi mujhe tujh ko sunaani mujh ko bhi havas rasta badalne ki thi lekin qadmon ne kisi taur miri baat na maani phir dekheinge kab sabz zamaana mire mausam phir lauT ke kab aaegi saa'at vo suhaani ik lamha-e-aazaad ki takhliq hai ulfat naafiz hai kahaan is pe koi qaid-e-zamaani"

"ai khush-qadam gavaaraa ye zahmat agar karo kuchh din harim-e-jaan mein hamaare basar karo kuchh naa-taraash sang hain mere bhi haath mein gardun-nashino mujh mein bhi paidaa hunar karo aankhon ke aasmaan mein hai khvaabon ki kahkashaan is kahkashaan ki sair ba-rang-e-digar karo ik ye bhi rasm hai ki tamanna ki raah mein manzil kaa koi qasd na ho aur safar karo main ne mataa'-e-zist ganvaai so dil-rubaa ab tum bhi intizaar miraa 'umr bhar karo roidagi se khaali paDi hai zamin-e-dil ai chashm-e-abr-khez ise tar-ba-tar karo rang-e-hinaai phikaa agar paD gayaa to kyaa phir khun-e-aarzu se ise taaza-tar karo"

"bichhDaa to lafz-e-dard ki tafsir kar gayaa naafiz mire vujud pe taa'zir kar gayaa aankhein sunahri dekh ke main sochne lagaa ye kaun kahkashaaon ko tasvir kar gayaa vo bistar-e-visaal se uTh kar chalaa gayaa aur furqaton ke dukh miri taqdir kar gayaa aankhon se saari niind ki lazzat chali gai har khvaab ko vo hasrat-e-taa’bir kar gayaa ulfat kaa saaniha jo faqat dil kaa raaz thaa vo naaznin us ki bhi tashhir kar gayaa 'aazaad' ab nigaahon mein jachtaa nahin koi ik shakhs meri ruuh ki tathir kar gayaa"

"charaagh isi liye apne bujhaa ke chalte hain ki hukm saare yahaan par havaa ke chalte hain ham aise shahr-e-halaakat mein bas rahe hain jahaan masih-e-vaqt salibein uThaa ke chalte hain ab aise ahl-e-hunar se kise 'aqidat ho jo dil ke daagh jabin par sajaa ke chalte hain hamaare khvaab kisi karbalaa se kam to nahin so ham bhi ret pe kheme jalaa ke jalte hain kabhi ham un ki basaarat kaa nuur the ai dil jo aaj ham se nigaahein churaa ke chalte hain udaasiyon ke safar kuchh nishaan-e-manzil de ki ab to apne qadam laDkhaDaa ke chalte hain mazaar-e-ahl-e-tamanna hai vo jagah 'aazaad' jahaan se qaafile aansu bahaa ke chalte hain"

"kaavish-e-'ishq pe in'aam agar ho jaae saamnaa tujh se sar-e-'aam agar ho jaae har ghaDi saans ke chalne se hai siine mein dukhan is mein kuchh vaqfa-e-aaraam agar ho jaae dil ki be-vajh si ranjish kaa mudaavaa to nahin phir bhi milne ki koi shaam agar ho jaae jis ne murjhaa ke bikharnaa hai numu se pahle us ki khushbu kaa koi naam agar ho jaae khil uThein qaht-zada aankh mein ashkon ke kanval mausam-e-sabr kaa itmaam agar ho jaae phir kisi harf-e-nasihat ki kahaan hai haajat ruuh pe karb kaa ilhaam agar ho jaae ab kahaani mein sunaane ko bachaa hi kyaa hai behtari is mein hai anjaam agar ho jaae"

"navishta-haa-e-haqiqat jo naa-umid karein gumaan ke des mein kis se yaqin kharid karein vo be-dili hai ki saansein ghubaar lagti hain vo tirgi hai ki jugnu mile to 'iid karein ye kyaa ki 'umr-e-ravaan sab qitaal mein guzre khushi halaak karein aarzu shahid karein vo agle vaqton kaa vaa'da to ho chukaa rusvaa so ‘ahd-naama murattab koi jadid karein main ab iraadat-o-bai'at se ho chukaa taaib janaab-e-shaikh kisi aur ko murid karein har ik paDaao kaa haasil hai bas yahi muzhda talaash jaari rakhein justuju mazid karein"