Ghazal

ab ke mausam kaa khvaab likh denaa

Daali Daali gulaab likh denaa

ham ne likkhaa hai chaand saa chehra

tum use maahtaab likh denaa

· · ·

vo ahd-e-mukhlisaana ab kahaan hai

laDakpan kaa zamaana ab kahaan hai

vahi hai chaand taare bhi vahi hain

mohabbat vaalihaana ab kahaan hai

· · ·

khudaa karim hai itnaa karam hi farmaae

main us ko bhulnaa chaahun vo mujh ko yaad aae

fazaa mein nuur havaaon mein us ki khushbu hai

Thahar ai vaqt ki jaan-e-bahaar aa jaae

· · ·

khauf-e-zulmat se larazti hai fazaa ab ke baras

zahr mein Duub gai baad-e-sabaa ab ke baras

chain saDkon pe mayassar na sukun hai ghar mein

is tarah phaili hai dahshat ki vabaa ab ke baras

· · ·

aaine se aankh laDi hai

armaanon pe os paDi hai

ghar aangan zulmat ke pahre

darvaaze par dhuup jaDi hai

· · ·

ye ahd kar ke nikalnaa bahut zaruri hai

safar mein samt badalnaa bahut zaruri hai

zamin ki kokh use baanjh kar gai varna

chaman kaa phulnaa phalnaa bahut zaruri hai

· · ·

mujh ko khud se milaa de baabaa

jivan paar lagaa de baabaa

shahr-e-dil mein ghor andheraa

man ki jot jalaa de baabaa

· · ·

koi hangaama na aahaT na sadaa hai koi

dil ki dahliz pe phir qatl huaa hai koi

shahr-e-tanhaai moattar hai tiri yaadon se

phuul ehsaas ke gulshan mein khilaa hai koi

· · ·

qatre qatre ko kabhi tarsaa na thaa

main ki dariyaa thaa koi sahraa na thaa

hasraton ki jhiil par kohraa na thaa

ham-safar suraj thaa main tanhaa na thaa

· · ·

zahr piitaa hai shab-o-roz duaa detaa hai

paikar-e-khaak hi jannat kaa pataa detaa hai

gosha-e-zehn mein jaltaa hai raunat kaa charaagh

dil ki basti mein vahi aag lagaa detaa hai

· · ·

mere ashaar mein alfaaz ke jauhar dekho

band hai fikr ke kuuze mein samundar dekho

har taraf jalva-fagan nuur kaa manzar dekho

dekhne vaalo mire qalb ke andar dekho

· · ·

hamaare qalb ke aangan mein tu nahin rahtaa

saraab-e-husn tiri justuju nahin rahtaa

kuchh aisaa zakhm diyaa irtiqaai suraj ne

ragon mein dauDne vaalaa lahu nahin rahtaa

· · ·

nae maani nae uslub likhnaa

ghazal ko chaand kaa mahbub likhnaa

shuur-e-zindagi anqaa hai lekin

safar ke zaaiqe marghub likhnaa

· · ·

harif-e-sang huun miTTi se pyaar kartaa huun

lahu se apne gulaabon mein rang bhartaa huun

qadam qadam pe tiraa intizaar kartaa huun

main zindagi ke tajassus mein roz martaa huun

· · ·

fahm-o-idraak kaa husul samajh

main huun aadam mujhe rasul samajh

kaj-nigaahi ko apni bhuul samajh

aadamiyyat ke kuchh usuul samajh

· · ·

aaina ru-ba-ru hai shikasta khaDaa huun main

duniyaa samajh rahi hai ki sab se baDaa huun main

sadiyon se ik nigaah ko aankhein taras gaiin

dil ko bichhaae raah mein kab se khaDaa huun main

· · ·

khud apnaa ehtisaab kiyaa kuchh nahin kiyaa

zarre ko aaftaab kiyaa kuchh nahin kiyaa

honTon pe tishnagi kaa samundar liye hue

sahraa ko aab aab kiyaa kuchh nahin kiyaa

· · ·