Ghazal

yahaan-vahaan se idhar-udhar se na jaane kaise kahaan se nikle

khushi se jiine ki justuju mein hazaar gham ek jaan se nikle

ye kamtari bartari ke fitne ye aam-o-aalaa ke sard jhagDe

hamin ne naazo se dil mein paale hamaare hi darmiyaan se nikle

· · ·

khush-mizaaji kaa dikhaavaa bhi nahin kar sakte

ham vo kaahil hain jo itnaa bhi nahin kar sakte

vo sunaate hain rihaai ke farize sab ko

jo rihaa ek parinda bhi nahin kar sakte

· · ·

ishq ki umr jab uchhaal ki thi

kyuun tamannaa tujhe zavaal ki thi

do-Takaa thaa mire javaab kaa mol

dhuum har su tire savaal ki thi

· · ·

ajab maamul hai aavaargi kaa

garebaan jhaankti hai har gali kaa

na jaane kis tarah kaise khudaa ne

bharosa kar liyaa thaa aadmi kaa

· · ·

mausam-e-hijr mein zakhmon se ladaa rahtaa hai

dil vo paudhaa ke jo patjhaD mein haraa rahtaa hai

bas ye ik baat mujhe laati hai nazdik tire

tu bhi to meri tarah khud se khafaa rahtaa hai

· · ·

collage kaa daalaan nahin hai pyaare zaalim duniyaa hai

aur yahaan sach bolne vaalaa sach mein sab se jhuTaa hai

main tere didaar ki khaatir aa jaataa huun khvaabon tak

varna is lazzat ke alaava nindon mein kyaa rakkhaa hai

· · ·

tiri chashm-e-tar mein ravaan-davaan gham-e-ishq kaa jo malaal hai

ye hi ibtidaa-e-firaaq hai ye hi intihaa-e-visaal hai

hai qarib phir bhi hai ajnabi tu idhar nahin main udhar nahin

kisi raah ke hain do samt ham main junub huun tu shumaal hai

· · ·

jo thaa har aan mubtalaa meraa

vo bhi samjhaa na maajraa meraa

hai mohabbat mein kuchh havas pinhaan

tu na kariyo kabhi kahaa meraa

· · ·

meri miTTi se agar ruuh nikaali jaae

is mein ye to nahin tasdiq karaa li jaae

main tujhe khvaab mein yuun khvaab sajaataa dekhun

jaise tasvir mein tasvir banaa li jaae

· · ·

farzi daavedaar hai

apni jo bhi yaari hai

mere vaade par mat jaa

ye bilkul sarkaari hai

· · ·