Ghazal

sabhi khudaaon se teri amaan chaahti hai

ilaahi ab ke zamin aasmaan chaahti hai

andhere baargah-e-rab se izn paate hain

ye raushni hi charaaghon ki jaan chaahti hai

· · ·

baDi gudaaz pashemaaniyon pe zinda rahe

ham apne khvaab ki viraaniyon pe zinda rahe

unhein lagaa thaa ki ye log maare jaaeinge

sunahre log hare paaniyon pe zinda rahe

· · ·

faakhtaaon ke bikhere hue par le jaao

ye zaruri hai yahi rakht-e-safar le jaao

aur to kyaa hi bachaa aankh ke viraane mein

hai koi khvaab saa ik raat-badar le jaao

· · ·

main anaayaas bhaTaktaa rahaa viraane mein

achchhaa-khaasaa thaa khudaa us ke badan-khaane mein

bahr se khele hue saare shanaavar ik din

Duub jaate hain kisi chaah-e-zanakhdaane mein

· · ·

dil ye jis aarzu se Dartaa hai

raat-din us ke taiin hi martaa hai

dukh jalaavan se zehn bhaTTi par

yaadein pakti hain peT bhartaa hai

· · ·

subh kaise hui ghazaalon ki

raat thi surkh aankh vaalon ki

tirgi kaa galaa dabaate hue

saans ukhaDne lagi ujaalon ki

· · ·

ye kaun is darja aatishin rakh-rakhaav mein hai

ye kis kaa chehra hai jo dahakte alaav mein hai

sadaa-e-kun is ke baa'd shaayad kabhi na aae

hamaari takhliq apne antim paDaav mein hai

· · ·

ye kaun is darja aatishin rakh-rakhaav mein hai

ye kis kaa chehra hai jo dahakte alaav mein hai

sadaa-e-kun is ke baa'd shaayad kabhi na aae

hamaari takhliq apne antim paDaav mein hai

· · ·

hasin hai to rahe subh teri par nahin kar

main shab-parast huun mujh par abhi sahar nahin kar

jo raah main ne chuni hai kahin nahin jaati

umid-e-naaz mujhe apnaa ham-safar nahin kar

· · ·

koi saayaa pas-e-divaar Thahar jaaegaa

raushni vaalaa jise dekh ke Dar jaaegaa

is ke aage tire saahil kaa badan chamkegaa

dil samundar hai yahin aa ke Thahar jaaegaa

· · ·

karb se bharne ko jab aai miri raat ki aankh

ek suraj ne uThaai phir inaayaat ki aankh

meri har baat se baaton kaa ziyaan hotaa thaa

us ki khaamoshi ne kholi thi miri baat ki aankh

· · ·

bechaare sahraa ko ik nivaala nahin bachaa hai

hamaare paanv mein koi chhaalaa nahin bachaa hai

vo shahr-e-hijraan kaa aakhiri fard thaa so khush thaa

ki us se koi bichhaDne vaalaa nahin bachaa hai

· · ·

vo maarka jo hai nahin sar ho nahin rahaa

ik be-fasil shahr mein dar ho nahin rahaa

main chaahtaa huun teri mohabbat yatim ho

par meri badduaa mein asar ho nahin rahaa

· · ·

main jise dasht samajhtaa rahaa ghar niklaa hai

kyaa ajab meri duaaon se asar niklaa hai

dil ki taariki se ik naala khudaa ki jaanib

jaantaa hai nahin pahunchegaa magar niklaa hai

· · ·

kisi badan ki tamanna mein gham nikal aae

ghamon ko bhuuk lagi thi so ham nikal aae

ajab sakhi hai zamaane mein baanT detaa hai

main jitnaa ishq use de duun kam nikal aae

· · ·

muntazir huun main apne aazar kaa

lenaa hai intiqaam Thokar kaa

naa-khudaaon ki niyyaton ki qasam

hai bharosa to bas samundar kaa

· · ·

khair se dil ne kisi taur bahal jaanaa hai

par miri jaan tujhe yaan se nikal jaanaa hai

auj par hai abhi jaltaa huaa suraj chhu lo

bakht Dhal jaane ki shai hai ise Dhal jaanaa hai

· · ·

ik mehrbaan kaa sab se baDaa Dar bhi main hi thaa

aur apni aastin ke andar bhi main hi thaa

vo main thaa jo buton kaa mukhaalif banaa rahaa

jis ne unhein taraashaa vo aazar bhi main hi thaa

· · ·

tazaad-e-zaat mein chhupte hue chhupaate hue

main thak gayaa huun bahut zindagi nibhaate hue

khudaa karim miri aakhiri umiid ki khair

nujumi khauf mein thaa zaaicha banaate hue

· · ·

ik taqaaza pas-e-divaar kiyaa jaaegaa

aur phir ishq se inkaar kiyaa jaaegaa

vo sisakti hui taabir sirhaane hogi

jab mujhe khvaab se bedaar kiyaa jaaegaa

· · ·

hamaare honTon pe ek muddat se jis kaa nauha machal rahaa hai

ye utraa utraa udaas chehra kabhi hamaari ghazal rahaa hai

ajab nazaara-parast dilbar hai tum sunoge to hans paDoge

lahu rulaataa hai aur kahtaa hai surkh chashma ubal rahaa hai

· · ·

TuuTi hui qabron mein kahin the ki nahin the

sab ahl-e-havas zer-e-zamin the ki nahin the

dibaacha-e-imkaan mein rakh chhoDne vaale

ham log bataa ahl-e-yaqin the ki nahin the

· · ·

mere alfaaz ko guftaar ko khaa jaaegi

meri vahshat mire afkaar ko khaa jaaegi

ashk roko nahi bah jaane do varna ik din

ye nami jism ki divaar ko khaa jaaegi

· · ·

is aalam-e-pur-dard mein dukh sab kaa khudaa hai

dil baargah-e-dukh mein 'aqidat se khaDaa hai

ai shaam-nashin raat ki tahvil mein aa jaa

ik khvaab teri raahguzar dekh rahaa hai

· · ·