Ghazal

tanhaaiyon mein ashk bahaane se kyaa milaa

khud ko diyaa banaa ke jalaane se kyaa milaa

mujh se bichhaD ke ret saa vo bhi bikhar gayaa

us jaane vaale shakhs ko jaane se kyaa milaa

· · ·

dhire dhire dard kaa ye zaaiqa baDhtaa gayaa

jitne bhi aansu mile utnaa nasha baDhtaa gayaa

vo bhi kuchh kahte rahe aur ham bhi kuchh kahte rahe

phir bhi kyon khaamoshiyon kaa daaera baDhtaa gayaa

· · ·

meri tanhaai ne chup-chaap guzaarish kar di

raat ne aankhon mein phir khvaab ki baarish kar di

jab bulaayaa inhein ye dauD ke aaiin phir se

mujh pe phir se tiri yaadon ne navaazish kar di

· · ·

hai mire hind ki tahzib ki paikar urdu

apni mushtarka viraasat ki hai dukhtar urdu

is ke har lafz mein tahzib ki nuraani hai

lafz-e-taabaan liye hai mehr-e-munavvar urdu

· · ·

ye miri ghazal kaa mizaaj hai kabhi aag hai kabhi phuul hai

kabhi qahqahon kaa hai qaafila kabhi aansuon se malul hai

jo de pyaar tu use pyaar de jo de dard us ko mu'aaf kar

yahi zindagi kaa hai qaaeda yahi dosti kaa usuul hai

· · ·

tiraa hi naam kaafi hai to ghairon kaa bayaan kyon ho

nae kirdaar se bojhal ye meri daastaan kyon ho

tire bhi paanv baDhte hain miri baahein bhi phaili hain

to phir ye faasla itnaa hamaare darmiyaan kyon ho

· · ·

dil miraa soz-e-nihaan se umr bhar betaab thaa

kashti-e-dil kaa muqaddar pur-khatar girdaab thaa

vaan ki aariz surkh thaa rang-e-tilaa-e-naab se

yaan vufur-e-ashk se mizhgaan miraa simaab thaa

· · ·

hai nafas nafas tiri aarzu hai qadam qadam tiri justuju

main jahaan rahun main kahin chalun tiri yaad milti hai ku-ba-ku

hai havaa mein jaise mahak tiri kisi abr mein hai jhalak teri

miri shaam ke ye nuqush bhi tire jaise lagte hain hu-ba-hu

· · ·

jang-e-hayaat-o-maut mein kyaa kyaa nahin huaa

guzraa hai dard had se pe chaara nahin huaa

main ne sadaa rakhin yahin qatron si fitratein

main aaj tak ghurur kaa dariyaa nahin huaa

· · ·

din mein jiitaa huun magar raat mein mar jaataa huun

ik talaatum saa hai yaadon kaa jidhar jaataa huun

main ne tujh jaise kisi shakhs ko chaahaa thaa kabhi

ab to is baat ko sochun bhi to Dar jaataa huun

· · ·

fan jo meaar tak nahin pahunchaa

apne shahkaar tak nahin pahunchaa

pagDi pairon mein kaise main rakhtaa

haath dastaar tak nahin pahunchaa

· · ·

sab hai faani yahaan sansaar mein kis kaa kyaa hai

fikr phir bhi hai tujhe apnaa paraayaa kyaa hai

aap kaa pahlaa hi andaaz bataa detaa hai

aap ko aap ke vaalid ne sikhaayaa kyaa hai

· · ·

bhuul paae na tujhe aaj bhi rone vaale

tu kahaan hai miri aankhon ko bhigone vaale

ham kisi ghair ke ho jaaein ye mumkin hi nahin

aur tum to kabhi apne nahin hone vaale

· · ·

lagaa ke dhaDkan mein aag meri ba-rang-e-raqs-e-sharar gayaa vo

mujhe banaa ke sulagtaa sahraa mire jahaan se guzar gayaa vo

yuun niind se kyuun mujhe jagaa kar charaagh-e-ummid phir jalaa kar

hui sahar to use bujhaa kar havaa ke jaisaa guzar gayaa vo

· · ·

jab bhi milte hain to jiine ki duaa dete hain

jaane kis baat ki vo ham ko sazaa dete hain

haadse jaan to lete hain magar sach ye hai

haadse hi hamein jiinaa bhi sikhaa dete hain

· · ·

yuun hi har baat pe hansne kaa bahaana aae

phir vo maasum saa bachpan kaa zamaana aae

kaash lauTein mire paapaa bhi khilaune le kar

kaash phir se mire haathon mein khazaana aae

· · ·

ham bhi guzar gae yahaan kuchh pal guzaar ke

raatein thiin qarz ki yahaan din the udhaar ke

jaise puraanaa haar thaa rishta tiraa miraa

achchhaa kiyaa jo rakh diyaa tu ne utaar ke

· · ·

sahraa-e-laa-hudud mein tishna-labi ki khair

maahaul-e-ashk-baar mein lab ki hansi ki khair

laffaaz saare ban gae shaah-e-sukhan yahaan

saadiq sukhan-varon ki sukhan-parvari ki khair

· · ·

naadaan dil ne dekhiye kyaa kyaa samajh liyaa

har shakhs ko jahaan mein apnaa samajh liyaa

suraj jo ek roz zaraa der se ugaa

jugnu ne aasmaan ko apnaa samajh liyaa

· · ·

maut hoti nahin jismon kaa fanaa ho jaanaa

asl mein maut hai mahrum-e-baqaa ho jaanaa

vaqt to guzraa magar zakhm puraane na hue

mere zakhmon ki to fitrat hai nayaa ho jaanaa

· · ·

shaam aai hai liye haath mein yaadon ke charaagh

vo tire saath guzaare hue lamhon ke charaagh

mere is ghar mein andheraa kabhi hotaa hi nahin

hain mire siine mein jalte hue zakhmon ke charaagh

· · ·

bikhraa huun jab main khud yahaan koi mujhe giraae kyuun

pahle se raakh raakh huun phir bhi koi bujhaae kyuun

iisaa na vo nabi koi adnaa saa aadmi koi

phir bhi salib-e-dard ko sar pe koi uThaaein kyuun

· · ·

vo jo phuul the tiri yaad ke tah-e-dast-e-khaar chale gae

tire shahr mein bhi sukun hai tire be-qaraar chale gae

na vo ashk ab na vo aable na vo chikhti hui dhaDkanein

miri zaat se tire dard ke sabhi ishtihaar chale gae

· · ·

raat jab TuuT kar bikhar jaae

jaagne vaalaa phir kidhar jaae

umr guzri hai jaise kaanon se

sarsaraati havaa guzar jaae

· · ·