Ghazal

din ho ki raat, kunj-e-qafas ho ki sehn-e-baagh

aalaam-e-rozgaar se haasil nahin faraagh

raghbat kise ki lijiye aish-o-tarab kaa naam

fursat kahaan ki kijiye sahbaa se pur ayaagh

· · ·

ham se bhi gaahe gaahe mulaaqaat chaahiye

insaan hain sabhi to musaavaat chaahiye

achchhaa chalo khudaa na sahi un ko kyaa huaa

aakhir koi to qaazi-e-haajaat chaahiye

· · ·

har chand unhein ahd faraamosh na hogaa

lekin hamein us vaqt koi hosh na hogaa

dekhoge to aaegi tumhein apni jafaa yaad

khaamosh jise paaoge khaamosh na hogaa

· · ·

nahin naam-o-nishaan saae kaa lekin yaar baiThe hain

uge shaayad zamin se khud-ba-khud divaar baiThe hain

savaar-e-kashti-e-amvaaj-e-dil hain aur ghaafil hain

samajhte hain ki ham dariyaa-e-gham ke paar baiThe hain

· · ·

jab bhi koi baat ki aansu Dhalke saath

ham bhi paagal ho gae man paagal ke saath

raat ko kaali chaandni din ko kaali dhuup

DhunDein aankhein raushni rahein dhundalke saath

· · ·

dukhi dilon ke liye taaziyaana rakhtaa hai

har ek shakhs yahaan ik fasaana rakhtaa hai

kisi bhi haal mein raazi nahin hai dil ham se

har ik tarah kaa ye kaafir bahaana rakhtaa hai

· · ·

hai jo taasir si fughaan mein abhi

log baaqi hain kuchh jahaan mein abhi

dil se uThtaa hai subh-o-shaam dhuaan

koi rahtaa hai is makaan mein abhi

· · ·

zarurat thi ki jo maidaan mein nikle sar-ba-kaf nikle

magar ham hain ki nikle bhi to le kar chang-o-daf nikle

hamin the inqilaab-e-dahr ke paighaambar ik din

hamin ai vaae ab tir-e-halaakat kaa hadaf nikle

· · ·

mausam kaa aah-o-naala se andaaza kijiye

taaza havaa pe band na darvaaza kijiye

yaa chheDiye na manzar-e-naadidani kaa zikr

yaa misl-e-aaftaab baham ghaaza kijiye

· · ·

jahaan tak gayaa kaarvaan-e-khayaal

na thaa kuchh ba-juz hasrat-e-paaemaal

mujhe teraa tujh ko hai meraa khayaal

magar zindagi phir bhi hai khasta-haal

· · ·

yahaan to phir vahi divaar-o-dar nikal aae

kidhar ko yaar chale the kidhar nikal aae

kahaan kaa paa-e-vafaa aur kahaan kaa dasht-e-talab

ki ab to raste kai mukhtasar nikal aae

· · ·

bayaan mein tere har tarz-e-bayaan gum

fasaane mein mire har daastaan gum

na ham gum hain na teraa aastaan gum

magar kuchh silsila hai darmiyaan gum

· · ·

ham se baat mein pech na Daal

yuun mat dil ke chor nikaal

marnaa hai to Darnaa kyaa

chaltaa hai kyuun chor ki chaal

· · ·

hai vaaqia kuchh aur rivaayat kuchh aur hai

yaaron ko yaani ham se shikaayat kuchh aur hai

samjhi gai jo baat hamaari ghalat to kyaa

yaan tarjuma kuchh aur hai aayat kuchh aur hai

· · ·

kuchh ajnabi se log the kuchh ajnabi se ham

duniyaa mein ho na paae shanaasaa kisi se ham

dete nahin sujhaai jo duniyaa ke khatt-o-khaal

aae hain tirgi mein magar raushni se ham

· · ·

jaae khirad nahin hai ki farzaana chaahiye

hu kaa maqaam hai koi divaana chaahiye

hai is mein qaid-e-shahr na viraana chaahiye

bahr-e-faraagh tab-e-faqiraana chaahiye

· · ·