Ghazal

"na ho nahin hai agar us kaa shiin qaaf durust vo haq pe hai to nahin is se ikhtilaaf durust ta'alluqaat ki tajdid ke liye yaaro hai apni apni kami kaa ye e'tiraaf durust azaab jhaank rahaa hai zaraa to fikr karo nahin hai ghar ke kivaaDon mein ye shigaaf durust ye raushni to mataaa-e-nazar ki dushman hai miri nazar mein hai ab is se inhiraaf durust zaraa tum apni hadon kaa bhi jaaeza le lo ye maantaa huun ki hai mujh se ikhtilaaf durust ye justuju to kisi saae kaa taaaqub hai huaa hai mujh pe achaanak ye inkishaaf durust milegaa kyaa tujhe 'anvar-shamim’ baaz aa jaa nahin hai is dar-e-daulat kaa ye tavaaf durust"

"gham mein jo shaad-kaam hote hain qaabil-e-ehtiraam hote hain rahm lutf-o-karam taras ehsaan zulm ke kitne naam hote hain shikva-e-gham jahaan hai su-e-adab aise bhi kuchh maqaam hote hain taaj-daari vo kyaa kareinge jo khvaahishon ke ghulaam hote hain ehtiyaaton ke shahr mein 'anvar' haadse subh-o-shaam hote hain"

"saail bhi hain is daur mein kaase bhi bahut hain mil jaaein to ab jhuTe dilaase bhi bahut hain allaah ye ghabraa ke kahin zahr na pi lein kuchh log mire shahr mein pyaase bhi bahut hain main dekh rahaa huun jo charaaghon ke nae zakhm shikve nae mausam ki havaa se bhi bahut hain maayus nahin hain tiri rahmat se khudaayaa ye sukhe hue peD jo pyaase bhi bahut hain shaad aap ki har baat se 'anvar' hain bahut shaad bezaar magar lafz-e-vafaa se bhi bahut hain"

"subh-e-nau kaa khayaal karte hain shab-gazida kamaal karte hain kitne khush hain miri tabaahi par jo ba-zaahir malaal karte hain jo dilon ko navaazte hain bahut dil vahi paaemaal karte hain TuuT jaate hain aaine phir bhi ham bahut dekh-bhaal karte hain sochtaa huun ki lauT kar mujh ko raahzan kyon malaal karte hain khair marnaa to hai bahut aasaan jiine vaale kamaal karte hain gaanv mein hi bhale the ham 'anvar' shahr mein ye khayaal karte hain"

"zalil maslahaton kaa asiir niklegaa khabar nahin thi ki tu be-zamir niklegaa hamaare shahr ke logon ko ye umiid na thi amir-e-shahr bhi dil kaa faqir niklegaa agar naqaab haTi raahzan ke chehre se to kyaa khabar thi hamaaraa amiir niklegaa main jaantaa thaa tire lab se bad-gumaani mein jo lafz niklegaa ban kar vo tiir niklegaa sunaa hai kucha-e-shisha-garaan se aaj 'anvar' vo sang-zaadon kaa jamm-e-ghafir niklegaa"

"musibat mein kabhi aise hasin lamhe bhi aate hain ki dushman bhi puraani ranjishon ko bhuul jaate hain bahut ji chaahtaa hai jin se koi sach bataane ko na jaane kyon vo sach qasdan unhi se ham chhupaate hain unhein khud ehtisaabi ki bhi kuchh taufiq ho yaa-rab jo qasdan aae din meri vafaaein aazmaate hain baDaa qaatil takalluf pal rahaa hai tere lahje mein baDe shubhaat mere dil mein paiham sar uThaate hain khudaa raa sang-rezon kaa shubh karnaa na tum hargiz mire khat mein khulus-e-dil ke moti jagmagaate hain ye rukh hai kyaa hasin 'anvar-shamim' apni tabaahi kaa kai ahbaab jo bechain the ab muskuraate hain"

"na chhoD zid magar is ko anaa kaa naam na de ye ek but hai tu but ko khudaa kaa naam na de gila nahin mujhe teri munaafiqat kaa magar munaafiqat ko khulus-e-vafaa kaa naam na de qubul tark-e-taalluq bhi hai hamein lekin tu is sitam ko hamaari razaa kaa naam na de ik aarzu hai taalluq bahaal karne ki is aarzu ko miri iltijaa kaa naam na de jo tere zulm-o-sitam par khamosh hai 'anvar' to apne zulm-o-sitam ko sazaa kaa naam na de"

"bujhaai jo lagaai bhi miri thi vo dil ki aag laai bhi miri thi miraa kyaa vo badan rusvaa huaa to bas us mein paarsaai bhi miri thi riyaa-kaari pahan kar kaise niklun isi se to laDaai bhi miri thi zaraa si baat ne sahmaae rakkhaa ki us ki jag-hansaai bhi miri thi miri kam-zarfiyon ne sab ganvaae khudaa ki ye khudaai bhi miri thi"