Ghazal

chhoDo ye baat-chit bhi kis kaa hai kyaa huaa

achchhaa huaa hai yaar jo achchhaa buraa huaa

dhire se chalnaa chaahiye thaa bhaagne lage

ham ne kharaab kar liyaa rasta banaa huaa

· · ·

javaab maangaa to ulTaa savaal karne lage

hamaare ahd ke bachche kamaal karne lage

baDe buzurg parindon se pyaar karte the

so ham bhi sabz ruton kaa khayaal karne lage

· · ·

log aae hi nahin mujh ko mayassar aise

jo mujhe kahte ki aise nahin 'azbar' aise

jaisaa main huun mire chehre ki hansi jaisi hai

ghaur se dekh ki hote nahin joker aise

· · ·

zamin banaai nae zaaviye banaane paDe

kahin pe qaus kahin daaere banaane paDe

kahin thi raushni matlub aur kahin raunaq

kahin charaagh kahin qumqume banaane paDe

· · ·

chameli raat kah rahi thi meri bu liyaa karein

aur is se ji nahin bhare to mujh ko chhu liyaa karein

gar aap ko bhi shauq hai qad-aavari kaa yuun karein

zamin mein paanv gaaD kar zaraa numu liyaa karein

· · ·

chuTki kaaTo zaraa hilaao mujhe

main yahin huun yaqin dilaao mujhe

roz ik jhiil raah takti hai

khinch letaa hai ik alaav mujhe

· · ·

siyaah shab ki balaaon ke haath lag gae the

mire charaagh havaaon ke haath lag gae the

vo le ke katranein guDiyaa banaane lag gai thi

ki shahr-zaadi ko gaanv ke haath lag gae the

· · ·

be-yaqini ke Dar se TuuT gae

ham jo dast-e-hunar se TuuT gae

tum nahin jaante ki kitne dil

haadse ke asar se TuuT gae

· · ·

visaal-rut ki kamaai samajh mein aane lagi

judaa hue to judaai samajh mein aane lagi

qafas ke paar ki duniyaa kaa husn khilne lagaa

rihaa hue to rihaai samajh mein aane lagi

· · ·

jaane kaisaa sog manaayaa jaataa hai

kuchh qabron par diyaa jalaayaa jaataa hai

kuchh jismon ki lazzat puuri karne ko

kuchh jismon ko khinch ke laayaa jaataa hai

· · ·

ab ke ye baat zehn mein Thaani hai aur bas

ham ne to apni jaan bachaani hai aur bas

nuqsaan to hamaaraa hai kachche gireinge ham

tum ne to ek shaakh hilaani hai aur bas

· · ·