Ghazal

baDi mushkil se ki thi yaar himmat tujh ko khone ki

bataa kyaa shart hai teri zaraa nazdik hone ki

chale aate hain tere gaanv jab ye dil taDaptaa hai

zarurat hi nahin paDti hai mujh ko rone-dhone ki

· · ·

jaane kis khaak se banaa hai vo

jhuuT par jhuuT boltaa hai vo

aadi mujrim hain ham mohabbat ke

ham se puchho kahaan bikaa hai vo

· · ·

duun main taskin ruuh ko apni

mujh ko koi khabar to do apni

muskuraanaa banaa hai tere liye

mastiyon mein magan raho apni

· · ·

phuul kaliyaan bhi ham bichhaaeinge

dil ki dharti ko yuun sajaaeinge

hijr kaaTeinge aur khushi ke saath

ek do yaar bhi banaaeinge

· · ·

hamein jab kaam se fursat milegi

tumhein us vaqt hi chaahat milegi

janaaze par zarur aanaa hamaare

vahaan tum ko nai ibrat milegi

· · ·

khushi se jhumti phirti hai aur phir muskuraati hai

miri taaza ghazal vo yaad kar ke gungunaati hai

tumhein cigarette se nafrat hai to ye kyon bhuul baiThe tum

tumhein jis se mohabbat hai use cigarette bachaati hai

· · ·

hamaare kaam ulTe paD gae hain

sabhi ke sard lahje paD gae hain

tumhaari baat sunte hi achaanak

mire sab rang phike paD gae hain

· · ·

ye sunte hi khushi se ham bhi pichhe aa gae hain

vo saaf andaaz mein sab kuchh hamein farmaa gae hain

suhulat se kinaaraa kar ke kaar-e-khair mein bhi

sitam saare hamaari zaat par vo Dhaa gae hain

· · ·

taDapte dil ko kaafi hai bas itnaa vaahima rakhnaa

bichhaDne vaalaa lauTegaa hamesha hausla rakhnaa

chale jaaeinge ham bhi dosto duniyaa-e-faani se

faqat itni guzaarish hai duaa kaa silsila rakhnaa

· · ·

dilon par hukmaraani hai usi ki

ye qissa aur kahaani hai usi ki

yahaan qabza na karnaa bhuul kar bhi

yahaan bas raajdhaani hai usi ki

· · ·

koi martaa nahin khasaaron se

ham ne sikhaa hai aabshaaron se

jo mizaajan yazid hote hain

duur rahtaa huun aise yaaron se

· · ·

khayaal-o-khvaab tak taaza raheinge jo bhi hogaa

jiyeinge aur tiri khaatir mareinge jo bhi hogaa

tiri naaraazgi bhi khatm karni hai abhi to

tamaashaa saadh kar joker baneinge jo bhi hogaa

· · ·