Ghazal

ataaq-e-shab mein sahar ke charaagh raushan kar

qabaa-e-dil hi nahin dil ke daagh raushan kar

kisi tariq se taaza havaa giraft mein laa

kisi sabil se apnaa dimaagh raushan kar

· · ·

usi ke zulm se main haalat-e-panaah mein thaa

har ik nafas miraa jis shakhs ki panaah mein thaa

chamak rahaa thaa vo khurshid-e-do-jahaan ki tarah

vo haath jo ki garebaan-e-kaj-kulaah mein thaa

· · ·

safha-e-qirtaas par khush-rang tahrirein nahin

apne qabze mein abhi lafzon ki jaagirein nahin

zindagi ham ne guzaari ek beva ki tarah

khvaab vo dekhe ki jin ki koi taabirein nahin

· · ·

rukh-e-hayaat hai sharminda-e-jamaal bahut

jami hui hai abhi gard-e-maah-o-saal bahut

gurez-paa hai jo mujh se tiraa visaal to kyaa

miraa junun bhi hai aamaada-e-zavaal bahut

· · ·

jahaan-e-jubba-o-dastaar ki himaayat kyaa

yazid-e-vaqt hai kyaa aur us ki bai'at kyaa

munaafiqaana ravish aam hoti jaati hai

naqaab-poshi-e-ahbaab ki shikaayat kyaa

· · ·

kabhi aankhon pe kabhi sar pe biThaae rakhnaa

zindagi talkh sahi dil se lagaae rakhnaa

lafz to lafz hain kaaghaz se bhi khushbu phuTe

safha-e-vaqt pe vo phuul khilaae rakhnaa

· · ·

koi shai dil ko bahlaati nahin hai

pareshaani ki rut jaati nahin hai

hamaare khvaab chori ho gae hain

hamein raaton ko niind aati nahin hai

· · ·

mire har lafz ki tauqir rahne ke liye hai

main vo zinda huun meri tahrir rahne ke liye hai

sitam-gar ne jo pahnaai mire dast-e-talab mein

ye mat samjho ki vo zanjir rahne ke liye hai

· · ·

tishnagi-e-lab pe ham aks-e-aab likkheinge

jin kaa ghar nahin koi ghar ke khvaab likheinge

tum ko kyaa khabar is ki zindagi pe kyaa biiti

zindagi ke zakhmon par ham kitaab likkheinge

· · ·

jo pi rahaa hai sadaa khuun be-gunaahon kaa

vo shakhs to hai numaainda kaj-kulaahon kaa

jise bhi chaahaa salib-e-sitam pe khinch diyaa

faqih-e-shahr to qaail nahin gavaahon kaa

· · ·

husul-e-manzil-e-jaan kaa hunar nahin aayaa

vo raushni thi ki kuchh bhi nazar nahin aayaa

bhaTak rahe hain abhi ziist ke saraabon mein

musaafiron ko shuur-e-safar nahin aayaa

· · ·

samundar kaa tamaasha kar rahaa huun

main saahil ban ke pyaasaa mar rahaa huun

agarche dil mein sahraa-e-tapish hai

magar main Dubne se Dar rahaa huun

· · ·

qaatil huaa khamosh to talvaar bol uThi

maqtal mein khun-e-garm ki har dhaar bol uThi

puchhaa subuk saron kaa numaainda kaun hai

sun kar faqih-e-shahr ki dastaar bol uThi

· · ·

mashaqqat kaa khazaana maangtaa hai

miri mehnat zamaana maangtaa hai

har ik lamha dil-e-aavaara-fitrat

masaafat kaa khazaana maangtaa hai

· · ·

rut na badle to bhi afsurda shajar lagtaa hai

aur mausam ke taghayyur se bhi Dar lagtaa hai

dard-e-hijrat ke sataae hue logon ko kahin

saaya-e-dar bhi nazar aae to ghar lagtaa hai

· · ·

banti nahin baat to phir baat kyaa karein

bigDe hue hain shahr ke haalaat kyaa karein

aati nahin giraft mein saanson ki Doriyaan

hain gardish-e-mudaam mein din-raat kyaa karein

· · ·

dida-e-be-rang mein khun-rang manzar rakh diye

ham ne is dasht-e-tapaan mein bhi samundar rakh diye

vo jagah jo laal-o-gauhar ke liye maqsud thi

kis ne ye sang-e-malaamat us jagah par rakh diye

· · ·

asiraan-e-havaadis ki giraan-jaani nahin jaati

jahaan se khun-e-insaani ki arzaani nahin jaati

darogh-e-maslahat ke dekh kar aasaar chehron par

haqiqat-aashnaa aankhon ki hairaani nahin jaati

· · ·

paDe hain raah mein jo log be-sabab kab se

pukaarti hai unhein manzil-e-talab kab se

ye aur baat makinon ko kuchh khabar na hui

lagaa rahe the muhaafiz magar naqab kab se

· · ·