Ghazal

jo zamaane kaa ham-zabaan na rahaa

vo kahin bhi to kaamraan na rahaa

is tarah kuchh badal gai hai zamin

ham ko ab khauf-e-aasmaan na rahaa

· · ·

badal ke rakh deinge ye tasavvur ki aadmi kaa vaqaar kyaa hai

khalaa mein vo chaand naachtaa hai zamaan makaan kaa hisaar kyaa hai

bahak gae the sambhal gae hain sitam ki had se nikal gae hain

ham ahl-e-dil ye samajh gae hain kashaakash-e-rozgaar kyaa hai

· · ·

mahfilon mein jaa ke ghabraayaa kiye

dil ko apne laakh samjhaayaa kiye

yaas ki gahraaiyon mein Duub kar

zakhm-e-dil se khud ko bahlaayaa kiye

· · ·

kaun bhalaa ye kahtaa hai khud aa ke ham ko manaaein aap

TuuTaa dil ab kaise juDegaa sachchi qasmein na khaain aap

patthar siine par rakh leinge jite-ji jaaeinge

aap ko qaatil kaun kahegaa kyuun naahaq ghabraaein aap

· · ·

tabaah ho ke bhi ik apni aan baaqi hai

baghaavaton ki taDap gham ki jaan baaqi hai

khalaa mein Duub ke ham ko bhi ye huaa maalum

ki kuchh nahin hai magar aasmaan baaqi hai

· · ·

saada kaaghaz pe koi naam kabhi likh lenaa!

ho sake milne ki ik shaam kabhi likh lenaa!

yuun to ham ahl-e-junun kuchh bhi nahin karte hain

gumrahi kaa hi sahi kaam kabhi likh lenaa!

· · ·

fareb khaa ke bhi sharminda-e-sukun na hue

na kam huaa kisi manzil pe valvala dil kaa

ye soch kar tiri mahfil se ham chale aae

ki ek baar to baDh jaae hausla dil kaa

· · ·

ajiib dil mein mire aaj iztiraab saa hai!

khuli hai aankh samundar bhi ek khvaab saa hai!

Thahar Thahar ke bajaataa hai koi saazina

main kyaa karun mire siine mein ik rubaab saa hai!

· · ·

main bhaag ke jaaungaa kahaan apne vatan se

jiitaa huun masaaib ki baqaa mere liye hai

sach bolne vaale ko Daraate ho sitam se

ruk jaao Thahar jaao jazaa mere liye hai

· · ·

gunjtaa shahron mein tanhaai kaa sannaaTaa to hai

be-kasi kaa ham-navaa ab tak vahi saayaa to hai

TuTti jaati hain ummidon ki zanjirein magar

Thokarein khaane ko majburi kaa ik sahraa to hai

· · ·

dasht-e-vafaa mein Thokarein khaane kaa shauq thaa

ab har qadam pe uDti hai kaali hari havaa

tanhaa kahaan huun go ki yahaan koi bhi nahin

mujh se lipaT ke sotaa hai saaya khafaa khafaa

· · ·

ab khaanumaan-kharaab ki manzil yahaan nahin

kahne ko aashiyaan hai magar aashiyaan nahin

ishq-e-sitam-navaaz ki duniyaa badal gai

husn-e-vafaa-shanaas bhi kuchh bad-gumaan nahin

· · ·

hazaar chaahaa lagaaein kisi se dil lekin

bichhaD ke tujh se tire shahr mein rahaa na gayaa

kabhi ye soch ke roe ki mil sake taskin

magar jo rone pe aae to phir hansaa na gayaa

· · ·

koi harf-e-nafi na kaam aayaa

kitni sachchi thi dosti apni

Thokarein khaa ke surkh-ru Thahraa

ik du'aa hai ye zindagi apni

· · ·

barson paDh kar sarkash rah kar zakhmi ho kar samjhaa main

har kucha hai kucha-e-qaatil zakhmi ho kar sambhlaa main

tufaani jazbon se bach kar duur talak kaise jaataa?

ek jazira ban kar aakhir lahron lahron Thahraa main

· · ·

zarre kaa raaz mehr ko samjhaanaa chaahiye

chhoTi si koi baat ho laD jaanaa chaahiye

khvaabon ki ek naav samundar mein Daal ke

tufaan ki mauj mauj se Takraanaa chaahiye

· · ·

kyaa kyaa nahin kiyaa magar un par asar nahin

shaayad ki apni sai-e-junun kaar-gar nahin

ghabraa ke chaahte hain ki gardish mein ham rahein

manzil kahin na ho koi aisaa safar nahin

· · ·

ishq ki saari baatein ai dil paagal-pan ki baatein hain

zulf-e-siyah ke saae mein bhi daar-o-rasan ki baatein hain

viraanon mein jaa ke dekho kaise kaise phuul khile hain

divaanon ke honTon par ab sarv o saman ki baatein hain

· · ·

bahut zi-fahm hain duniyaa ko lekin kam samajhte hain!

ajab qissa hai sab kuchh jaan kar mubham samajhte hain

havaaein tez-tar hain aaj baadal aane vaale hain

taDapte sard jhonkon ko bhi sab mausam samajhte hain

· · ·

auron pe ittifaaq se sabqat mili mujhe

bhule se sar-kashi ki rivaayat mili mujhe

ghairon ki dosti se kise hamdami mili

sab se bichhaD ke apni rifaaqat mili mujhe

· · ·

vo rind kyaa ki jo piite hain be-khudi ke liye

surur chaahiye vo bhi kabhi kabhi ke liye

ye kyaa ki bazm mein shamein jalaa ke baiThe ho

kabhi milo to sar-e-raah dushmani ke liye

· · ·

kyaa khabar thi ki kabhi be-sar-o-saamaan honge

fasl-e-gul aate hi is tarh se viraan honge

dar-ba-dar phirte rahe khaak uDaate guzri

vahshat-e-dil tire kyaa aur bhi ehsaan honge

· · ·

khabar sunegaa miri maut ki to khush hogaa

ki ab to jaa ke divaane ko chain aaegaa

mileinge mujh se kahin achchhe jaan-nisaar tujhe

magar kabhi to miraa zikr aa hi jaaegaa

· · ·

dushman-e-jaan koi banaa hi nahin

itne ham laaiq-e-jafaa hi nahin

aazmaa lo ki dil ko chain aae

ye na kahnaa kahin vafaa hi nahin

· · ·