Ghazal

sukun-e-qalb kisi ko nahin mayassar aaj

shikast-e-khvaab hai har shakhs kaa muqaddar aaj

hai vaz-e-haal miri kyuun ye bad se bad-tar aaj

amir-e-shahr ke badle hue hain tevar aaj

· · ·

sarak rahi hai us ki chilman maashaa-allaah maashaa-allaah

shaayad ab vo degaa darshan maashaa-allaah maashaa-allaah

garaj rahaa hai baadal ghan-ghan maashaa-allaah maashaa-allaah

bajti hai us ki paael jhan-jhan maashaa-allaah maashaa-allaah

· · ·

insaaniyat na jis mein ho vo aadmi nahin

jis mein huzur qalb na ho bandagi nahin

jis mein junun-e-shauq na ho aashiqi nahin

dil kaa moaamla hai koi dil-lagi nahin

· · ·

lauT kar jaise daur-e-shabaab aa gayaa

aap kyaa aa gae inqalaab aa gayaa

is tarah dil ke armaan puure hue

naama-bar le ke khat kaa javaab aa gayaa

· · ·

kar ke asir-e-ghamza-o-naaz-o-adaa mujhe

ai dil-navaaz tu ne ye kyaa de diyaa mujhe

jaanaa thaa itni jald to aayaa thaa kis liye

ek ek pal hai hijr kaa sabr-aazmaa mujhe

· · ·

hasb-e-vaada mujh se milne vo kabhi aayaa nahin

is se baDh kar aur kuchh bhi hausla-farsaa nahin

hijr thaa is kaa bahut sabr-aazmaa mere liye

gham se patthar ho gayaa lekin kabhi royaa nahin

· · ·

ehsaas kaa vasil-e-izhaar hai ghazal

aaina-daar-e-nudrat-e-afkaar hai ghazal

urdu adab ko jis pe hamesha rahegaa naaz

izhaar-e-fikr-o-fan kaa vo meaar hai ghazal

· · ·

gul-badan gul-ezaar aa jaao

jaa rahi hai bahaar aa jaao

hai agar mujh se pyaar aa jaao

hai fazaa saaz-gaar aa jaao

· · ·

vo hain aaj baalaa-e-baam allaah allaah

mai-e-ishq kaa le ke jaam allaah allaah

mujhe kar diyaa khud se be-khud unhonne

nigaahon se de kar payaam allaah allaah

· · ·

takhta-e-mashq-e-sitam mujh ko banaane vaalaa

thaa vahi roz mire khvaab mein aane vaalaa

muntashir kar diyaa shiraaza-e-hasti jis ne

khaana-e-dil ko mire thaa vo sajaane vaalaa

· · ·

bimaar-e-mohabbat ki davaa aur hi kuchh hai

kuchh aur hi samjhe the huaa aur hi kuchh hai

'aazaad' ki tahrir kaa andaaz alag hai

'iqbaal' ke naghmon ki navaa aur hi kuchh hai

· · ·

ibn-e-aadam barsar paikaar hai

garm zulm-o-jaur kaa baazaar hai

dandanaate phir rahe hain shar-pasand

kaun aakhir is kaa zimmedaar hai

· · ·

dekhaa thaa jo bhi khvaab mein ab kyaa hai kuchh nahin

is husn aur shabaab mein ab kyaa hai kuchh nahin

mere liye to jaise vo kaaghaz kaa phuul thaa

us khushnumaa gulaab mein ab kyaa hai kuchh nahin

· · ·

na aae kaam kisi ke jo zindagi kyaa hai

bashar-navaaz na ho jo vo aadmi kyaa hai

zamaana-saaz hain jo vo hain maslahat-andesh

jo ho khulus se aari vo dosti kyaa hai

· · ·

vo bhuul gayaa mujh se barson ki shanaasaai

lamhon ne khataa ki thi sadiyon ne sazaa paai

haalaat kaa ab main huun khaamosh tamaashaai

bhaai se taDaptaa hai milne ke liye bhaai

· · ·

jab se mein ne dekhaa hai ek khushnumaa chehra

tab se hai nigaahon mein us kaa chaand saa chehra

surat aur sirat mein imtiyaaz mushkil hai

hai har ek chehre par ek dusraa chehra

· · ·

main soz-e-darun apnaa dikhaa bhi nahin saktaa

kyaa mujh pe guzarti hai bataa bhi nahin saktaa

raushan hai isi se miraa kaashaana-e-hasti

is sham-e-mohabbat ko bujhaa bhi nahin saktaa

· · ·

tum aa rahe ho ki jaa rahe ho

bataao kyon muskuraa rahe ho

ye kaisaa jalva dikhaa rahe ho

nigaah-o-dil mein samaa rahe ho

· · ·

us ne kiyaa hai vaada-e-fardaa aane do us ko aae to

naam badal denaa phir meraa lauT ke vaapas jaae to

arz-e-tamannaa kareinge us se agar na vo Thukraae to

us se zarur mileinge jaa kar pahle hamein bulaae to

· · ·

mushtahar naam karo tum miraa akhbaaron mein

main to shaamil huun mohabbat ke gunahgaaron mein

mar ke bhi zinda-e-jaaved hain fankaar-e-azim

jo nazar aate hain taarikh ke shah-paaron mein

· · ·

is ke ghar se mere ghar tak ek kahaani biich mein hai

meri us ki raahguzar tak ek kahaani biich mein hai

chappa chappa us ki gali kaa rahaa hai mere zer-e-qadam

josh-e-junun se azm-e-safar tak ek kahaani biich mein hai

· · ·

nazar bachaa ke vo ham se guzar gae chup-chaap

abhi yahin the na jaane kidhar gae chup-chaap

hui khabar bhi na ham ko kab aae aur gae

nigaah-e-naaz se dil mein utar gae chup-chaap

· · ·

kaun hai kis kaa ye paighaam hai kyaa arz karun

zindagi naama-e-gumnaam hai kyaa arz karun

de ke vo daavat-e-nazzaara jahaan phir na milaa

ye vahi jalva-gah-e-aam hai kyaa arz karun

· · ·

vo hasb-e-vaada na aayaa to aankh bhar aai

mujhe tamaashaa banaayaa to aankh bhar aai

sajaa ke rakhtaa thaa palkon pe jis ko main aksar

nazar se us ne giraayaa to aankh bhar aai

· · ·