Ghazal

sang ko chhoD ke tu ne kabhi sochaa hi nahin

apni hasti mein khudaa ko kabhi DhunDaa hi nahin

uljhaa uljhaa saa hai kyuun apne bharam mein har-dam

tu ne khud apne garebaan mein jhaankaa hi nahin

· · ·

jis ne jaanaa jahaan tamaashaa hai

us ki Thokar mein ye zamaana hai

be-gharaz haar-jit se jo ho

zindagi us ki faatehaana hai

· · ·

be-rukhi ne us ki kaisaa ye ishaaraa kar diyaa

vaqt se pahle qayaamat kaa nazaaraa kar diyaa

laakh kahne par bhi us ne rukh pe rakkhaa thaa naqaab

ik jhalak ki aarzu ko naagavaaraa kar diyaa

· · ·

miri zindagi hai tanhaa tumhein kuchh asar to hotaa

koi dost tum saa hotaa koi ham-safar to hotaa

ye tamaam saae apne chalun kab talak sameTe

koi ham-nashin to hotaa koi chaara-gar to hotaa

· · ·

paas hone kaa ishaaraa mil gayaa

ab to jiine kaa sahaaraa mil gayaa

Dhal gayaa suraj to kuchh aisaa lagaa

subh-e-nau kaa ik nazaaraa mil gayaa

· · ·

khaamushi mein qayaas meraa hai

bandishein hi libaas meraa hai

khvaab phulon ke aankh ne gundhe

phir chaman kyuun udaas meraa hai

· · ·

khud ko tamaashaa khuub banaataa rahaa huun main

qimat bhi saadgi ki chukaataa rahaa huun main

yuun bhiiD mein to luTnaa baDi aam baat hai

sahraa mein khud ko tanhaa luTaataa rahaa huun main

· · ·

khushiyaan thiin bevafaa na rahin zindagi ke saath

gham baa-vafaa the chalte rahe aadmi ke saath

Dhalne lagi javaani jo aai thi chaar din

Thahraa buDhaapaa qabr talak rahbari ke saath

· · ·

shikva nasib kaa na kare baar baar tu

mushkil hayaat hans ke hamesha guzaar tu

kyuun fikr haal-o-maazi ki kartaa hai roz-o-shab

sab us ko ikhtiyaar hai be-ikhtiyaar tu

· · ·

soz-e-firaaq dil mein chhupaae hue hain ham

aur lab pe ik sukut sajaae hue hain ham

jo aashnaa nahin hain mohabbat ki aanch se

kyuun aas un se phir bhi lagaae hue hain ham

· · ·

be-qaraari dil-e-muztar ki baDhaai ham ne

aaj phir tum se koi aas lagaai ham ne

mushkilein raah-e-vafaa mein bhi banaain aasaan

rasm-e-ulfat to ba-har-taur nibhaai ham ne

· · ·