Ghazal

"ye kis ke aansuon ne us naqsh ko miTaayaa jo mere lauh-e-dil par tu ne kabhi banaayaa thaa dil jab us pe maail thaa shauq sakht mushkil targhib ne use bhi aasaan kar dikhaayaa ik gard-baad mein tu ojhal huaa nazar se is dasht-e-be-samar se juz khaak kuchh na paayaa ai chob-e-khushk-e-sahraa vo baad-e-shauq kyaa thi meri tarah barahna jis ne tujhe banaayaa phir ham hain nim-shab hai andesha-e-abas hai vo vaahima ki jis se teraa yaqin aayaa"

"chaar-su hai baDi vahshat kaa samaan kisi aaseb kaa saaya hai yahaan koi aavaaz si hai marsiyaan-khvaan shahr kaa shahr banaa goristaan ek makhluq jo basti hai yahaan jis pe insaan kaa guzartaa hai gumaan khud to saakit hai misaal-e-tasvir jumbish-e-ghair se hai raqs-kunaan koi chehra nahin juz zer-e-naqaab na koi jism hai juz be-dil-o-jaan ulmaa hain dushman-e-fahm-o-tahaqiq kodani sheva-e-daanish-mandaan shaair-e-qaum pe ban aai hai kizb kaise ho tasavvuf mein nihaan lab hain masruf-e-qasida-goi aur aankhon mein hai zillat uryaan sabz khat aaqibat-o-din ke asiir paarsaa khush-tan-o-nau-khez javaan ye zan-e-naghma-gar-o-ishq-shiaar yaas-o-hasrat se hui hai hairaan kis se ab aarzu-e-vasl karein is kharaabe mein koi mard kahaan"

"kabhi dhanak si utarti thi un nigaahon mein vo shokh rang bhi dhime paDe havaaon mein main tez-gaam chali jaa rahi thi us ki samt kashish ajiib thi us dasht ki sadaaon mein vo ik sadaa jo fareb-e-sadaa se bhi kam hai na Duub jaae kahin tund-rau havaaon mein sukut-e-shaam hai aur main huun gosh-bar-aavaaz ki ek vaade kaa afsun saa hai fazaaon mein miri tarah yunhi gum-karda-raah chhoDegi tum apni baanh na denaa havaa ki baanhon mein nuqush paanv ke likhte hain manzil-e-naa-yaaft miraa safar to hai tahrir meri raahon mein"

"muddat se ye aalam hai dil kaa hanstaa bhi nahin rotaa bhi nahin maazi bhi kabhi dil mein na chubhaa aainda kaa sochaa bhi nahin vo mere honT pe likkhaa hai jo harf mukammal ho na sakaa vo meri aankh mein bastaa hai jo khvaab kabhi dekhaa bhi nahin chalte chalte kuchh tham jaanaa phir bojhal qadmon se chalnaa ye kaisi kasak si baaqi hai jab paanv mein vo kaanTaa bhi nahin dhundlaai hui shaamon mein koi parchhaain si phirti rahti hai main aahaT sunti huun jis ki vo vahm nahin saaya bhi nahin tazin-e-lab-o-gesu kaisi pindaar kaa shisha TuuT gayaa thi jis ke liye sab aaraaish us ne to hamein dekhaa bhi nahin"

"patthar se visaal maangti huun main aadamiyon se kaT gai huun shaayad paaun suraagh-e-ulfat muTThi mein khaak-bhar rahi huun har lams hai jab tapish se aari kisi aanch se yuun pighal rahi huun vo khvaahish-e-bosa bhi nahin ab hairat se honT kaaTti huun ik tiflak-e-justuju huun shaayad main apne badan se khelti huun ab taba kisi pe kyuun ho raaghib insaanon ko barat chuki huun"

"jo mujh mein chhupaa meraa galaa ghonT rahaa hai yaa vo koi iblis hai yaa meraa khudaa hai jab sar mein nahin ishq to chehre pe chamak hai ye nakhl khizaan aai to shaadaab huaa hai kyaa meraa ziyaan hai jo muqaabil tire aa jaaun ye amr to maalum ki tu mujh se baDaa hai main banda-o-naachaar ki sairaab na ho paaun ai zaahir-o-maujud miraa jism duaa hai haan us ke taaaqub se mire dil mein hai inkaar vo shakhs kisi ko na milegaa na milaa hai kyuun nur-e-abad dil mein guzar kar nahin paataa siine ki siyaahi se nayaa harf likhaa hai"

"ye pairahan jo miri ruuh kaa utar na sakaa to nakh-ba-nakh kahin paivast resha-e-dil thaa mujhe maaal-e-safar kaa malaal kyun-kar ho ki jab safar hi miraa faaslon kaa dhokaa thaa main jab firaaq ki raaton mein us ke saath rahi vo phir visaal ke lamhon mein kyuun akelaa thaa vo vaaste ki tiraa darmiyaan bhi kyuun aae khudaa ke saath miraa jism kyuun na ho tanhaa saraab huun main tiri pyaas kyaa bujhaaungi is ishtiyaaq se tishna zabaan qarib na laa saraab huun ki badan ki yahi shahaadat hai har ek uzv mein bahtaa hai ret kaa dariyaa jo mere lab pe hai shaayad vahi sadaaqat hai jo mere dil mein hai us harf-e-raaegaan pe na jaa jise main toD chuki huun vo raushni kaa tilism shuaa-e-nur-e-azal ke sivaa kuchh aur na thaa"