Ghazal

ghar huaa gulshan huaa sahraa huaa

har jagah meraa junun rusvaa huaa

ghairat-e-ahl-e-chaman ko kyaa huaa

chhoD aae aashiyaan jaltaa huaa

· · ·

tu phuul ki maanind na shabnam ki tarah aa

ab ke kisi be-naam se mausam ki tarah aa

har martaba aataa hai mah-e-nau ki tarah tu

is baar zaraa meri shab-e-gham ki tarah aa

· · ·

ai husn zamaane ke tevar bhi to samjhaa kar

ab zulm se baaz aa jaa ab jaur se tauba kar

TuuTe hue paimaane bekaar sahi lekin

mai-khaane se ai saaqi baahar to na pheinkaa kar

· · ·

mujhe rutba-e-gham bataanaa paDegaa

agar mere pichhe zamaana paDegaa

bahut gham-zada dil hain kaliyon ke lekin

usulan unhein muskuraanaa paDegaa

· · ·

husn kaa ek aah ne chehraa niDhaal kar diyaa

aaj to ai dil-e-hazin tu ne kamaal kar diyaa

sahtaa rahaa jafaa-e-dost kahtaa rahaa adaa-e-dost

mere khulus ne miraa jiinaa muhaal kar diyaa

· · ·

jab mere raaste mein koi mai-kada paDaa

ik baar apne gham ki taraf dekhnaa paDaa

tark-e-taalluqaat ko ik lamha chaahiye

lekin tamaam umr mujhe sochnaa paDaa

· · ·

ik tishna-lab ne baDh ke jo saaghar uThaa liyaa

har bul-havas ne mai-kada sar par uThaa liyaa

maujon ke ittihaad kaa aalam na puchhiye

qatra uThaa aur uTh ke samundar uThaa liyaa

· · ·

mujhe pyaar se tiraa dekhnaa mujhe chhup chhupaa ke vo dekhnaa

miraa soyaa jazba ubhaarnaa tumhein yaad ho ki na yaad ho

rah-o-rasm qalb o nigaah ke vo tumhaare daave nibaah ke

vo hamaaraa shekhi baghaarnaa tumhein yaad ho ki na yaad ho

· · ·

mere chehre se gham aashkaaraa nahin

ye na samjho ki mein gham kaa maaraa nahin

chashm-e-saaqi pe bhi haq hamaaraa nahin

ab ba-juz tark-e-mai koi chaaraa nahin

· · ·

yaa rab miri hayaat se gham kaa asar na jaae

jab tak kisi ki zulf-e-pareshaan sanvar na jaae

vo aankh kyaa jo aariz o rukh par Thahar na jaae

vo jalva kyaa jo diida o dil mein utar na jaae

· · ·

yuun tiri talaash mein tere khasta-jaan chale

jaise jhuum jhuum kar gard-e-kaarvaan chale

aaj yuun hi saaqiyaa jaam-e-arghavaan chale

jaise bazm-e-vaaz mein shaikh ki zabaan chale

· · ·

vo jaane kitnaa sar-e-bazm sharmsaar huaa

sunaa ke apni ghazal main qusur-vaar huaa

hazaar baar vo guzraa hai be-niyaazaana

na jaane kyuun mujhe ab ke hi naa-gavaar huaa

· · ·

vo khaanumaan-kharaab na kyuun dar-ba-dar phire

jis se tiri nigaah mile yaa nazar phire

raah-e-junun mein yuun to hain laakhon hi sar-phire

yaa-rab miri tarah na koi umr bhar phire

· · ·

chehra-e-subh nazar aayaa rukh-e-shaam ke baad

sab ko pahchaan liyaa gardish-e-ayyaam ke baad

mil gai raah-e-yaqin manzil-e-auhaam ke baad

jalve hi jalve nazar aae dar-o-baam ke baad

· · ·

ham aagahi-e-ishq kaa afsaana kaheinge

kuchh aql ke maare hamein divaana kaheinge

rahtaa hai vahaan zikr-e-tuhur-o-mai-e-kausar

ham aaj se kaabe ko bhi mai-khaana kaheinge

· · ·

dil se agar kabhi tiraa armaan jaaegaa

ghar ko lagaa ke aag ye mehmaan jaaegaa

sab honge us se apne taaaruf ki fikr mein

mujh ko mire sukut se pahchaan jaaegaa

· · ·

ahl-e-dair-o-haram rah gae

tere divaane kam rah gae

miT gae manzilon ke nishaan

sirf naqsh-e-qadam rah gae

· · ·

Dubne vaale ki mayyat par laakhon rone vaale hain

phuT-phuT kar jo rote hain vahi Dubone vaale hain

kis kis ko tum bhuul gae ho ghaur se dekho baada-kasho

shish-mahal ke rahne vaale patthar Dhone vaale hain

· · ·

jhuTi hi tasalli ho kuchh dil to bahal jaae

dhundli hi sahi lekin ik shama to jal jaae

is mauj ki Takkar se saahil bhi laraztaa hai

kuchh roz to tufaan ki aaghosh mein pal jaae

· · ·

gham har ik aankh ko chhalkaae zaruri to nahin

abr uThe aur baras jaae zaruri to nahin

barq sayyaad ke ghar par bhi to gir sakti hai

aashiyaanon pe hi lahraae zaruri to nahin

· · ·

koi samjhegaa kyaa raaz-e-gulshan

jab tak uljhe na kaanTon se daaman

yak-ba-yak saamne aa na jaanaa

ruk na jaae kahin dil ki dhaDkan

· · ·

saaqiyaa tu ne mire zarf ko samjhaa kyaa hai

zahr pi lungaa tire haath se sahbaa kyaa hai

main chalaa aayaa tiraa husn-e-taghaaful le kar

ab tiri anjuman-e-naaz mein rakkhaa kyaa hai

· · ·

duniyaa-e-tasavvur ham aabaad nahin karte

yaad aate ho tum khud hi ham yaad nahin karte

vo jaur-e-musalsal se baaz aa to gae lekin

be-daad ye kyaa kam hai be-daad nahin karte

· · ·

aisaa bannaa sanvarnaa mubaarak tumhein kam se kam itnaa kahnaa hamaaraa karo

chaand sharmaaegaa chaandni raat mein yuun na zulfon ko apni sanvaaraa karo

ye tabassum ye aariz ye raushan jabin ye adaa ye nigaahein ye zulfein hasin

aaine ki nazar lag na jaae kahin jaan-e-jaan apnaa sadqa utaaraa karo

· · ·