Ghazal

tujhe main bhuul jaanaa chaahtaa huun

yuun dil ko aazmaanaa chaahtaa huun

na chheDo aaj dard-o-gham ke qisse

main khul kar muskuraanaa chaahtaa huun

· · ·

khasaare mein rahe lekin na chhoDi saadgi ham ne

ba-har-surat nibhaai dushmanon se dosti ham ne

salaf the jo hamaare misl-e-khurshid-o-mah-o-anjum

unhi ke raaste pe chal ke paai raushni ham ne

· · ·

dard ke chaand ki tasvir ghazal mein aae

sher likkhun to ye taasir ghazal mein aae

sunte aae hain bahut zikr hasin khvaabon kaa

ab kisi khvaab ki taabir ghazal mein aae

· · ·

saaz-e-hayaat qaid-o-salaasil kahein kise

jab dil hi bujh gayaa ho to phir dil kahein kise

rudaad-e-gham tavil to itni nahin magar

koi kahaan hai madd-e-muqaabil kahein kise

· · ·

hujum-e-dard milaa imtihaan aisaa thaa

magar vo chup hi rahaa be-zabaan aisaa thaa

kisi ki izzat-o-naamus par na aanch aai

luTaa to uf bhi na ki mehrbaan aisaa thaa

· · ·

lipaT rahi hain jo tujh se duaaein meri hain

havaa kaa shor nahin hai sadaaein meri hain

kisi bhi raah se tum aa sako to aa jaanaa

ki shahr meraa hai saari dishaaein meri hain

· · ·

ham ne jab chaahaa koi aag bujhaane aae

aae to log magar dil ko jalaane aae

kuchh asar hotaa nahin bazm-e-tarab kaa dil par

dard kaa giit koi aaj sunaane aae

· · ·

be-niyaaz-e-bahaar saa kyuun hai

dil ko zakhmon se pyaar saa kyuun hai

vo khafaa hain ki ham gharibon ko

gham pe kuchh ikhtiyaar saa kyuun hai

· · ·

khun-e-dil mujh se tiraa rang-e-hinaa maange hai

yaa hatheli pe koi naqsh-e-vafaa maange hai

jo sadaa detaa rahaa daar-o-rasan tohfe mein

ham faqiron se vahi harf-e-duaa maange hai

· · ·

pahunch kar shab ki sarhad par ujaalaa Duub jaataa hai

na ho jis kaa koi vo be-sahaaraa Duub jaataa hai

jise gaataa hai koi barbat-e-sad-chaak-daamaan par

fazaa-e-be-yaqini mein vo naghma Duub jaataa hai

· · ·

chhupaa hai karb-e-musalsal havaa ke lahje mein

koi to phuul khilaae du'aa ke lahje mein

main us ki qadr karungaa jo mere aibon ko

mire hi munh pe kahe aashnaa ke lahje mein

· · ·