Ghazal

baghair us ke ab aaraam bhi nahin aataa

vo shakhs jis kaa mujhe naam bhi nahin aataa

usi ki shakl mujhe chaand mein nazar aae

vo maah-rukh jo lab-e-baam bhi nahin aataa

· · ·

siina madfan ban jaataa hai jiite jaagte raazon kaa

jaanchnaa zakhmon ki gahraai kaam nahin andaazon kaa

saari chaabiyaan mere havaale kiin aur us ne itnaa kahaa

aaThon pahar hifaazat karnaa shahr hai nau darvaazon kaa

· · ·

khvaab kahaan se TuuTaa hai taabir se puchhte hain

qaidi sab kuchh bhuul gayaa zanjir se puchhte hain

jaam-e-jam laayaa hai ghar ghar duniyaa ke haalaat

dil ki baatein ham teri tasvir se puchhte hain

· · ·

milne ki har aas ke pichhe an-dekhi majburi thi

raah mein dasht nahin paDtaa thaa chaar gharon ki duuri thi

jazbon kaa dam ghuTne lagaa hai lafzon ke ambaar tale

pahle nishaan-zad kar lenaa thaa jitni baat zaruri thi

· · ·

ye jahaan-navard ki daastaan ye fasaana Dolte saae kaa

mire sar-burida khayaal hain ki dhuaan hai suuni saraae kaa

vo havaa kaa chupke se jhaanknaa kisi bhule bisre madaar se

kahin ghar mein shahr ki zulmatein kahin chhat pe chaand kiraae kaa

· · ·

ban se fasil-e-shahr tak koi savaar bhi nahin

kis ko biThaaein takht par gard-o-ghubaar bhi nahin

barg-o-gul-o-tuyur sab shaakhon ki samt uD gae

qasr-e-jahaan-panaah mein naqsh-o-nigaar bhi nahin

· · ·

zehn mein daaere se banaataa rahaa duur hi duur se muskuraataa rahaa

main samundar nahin chaand ko ilm hai raat bhar phir bhi mujh ko bulaataa rahaa

aankh mein khema-zan nil-gun vusatein apnaa pahlaa qadam hi khalaaon mein hai

jo jafaa ke jazira-numaaon mein hai dil kaa us khaak-e-khasta se naataa rahaa

· · ·

phir to is be-naam safar mein kuchh bhi na apne paas rahaa

teri samt chalaa huun jab tak samton kaa ehsaas rahaa

teri gali mein TuuT gae sab jurm-o-sazaa ke paimaane

ek tabassum dekhne vaalaa saari umr udaas rahaa

· · ·

sab rang naa-tamaam hon halkaa libaas ho

shaffaaf paaniyon pe kanval kaa libaas ho

ashkon se bun ke marsiya pahnaa diyaa gayaa

ab zindagi ke tan pe ghazal kaa libaas ho

· · ·

gulaabon ke nasheman se mire mahbub ke sar tak

safar lambaa thaa khushbu kaa magar aa hi gai ghar tak

vafaa ki saltanat iqlim-e-vaada sar-zamin-e-dil

nazar ki zad mein hai khvaabon se taabiron ke kishvar tak

· · ·

raat kaa har ik manzar ranjishon se bojhal thaa

chaand bhi adhuraa thaa main bhi naa-mukammal thaa

aankh ki munDeron par aarzu nahin larzi

ik charaagh ki lau se ik charaagh ojhal thaa

· · ·

vo be-dili mein kabhi haath chhoD dete hain

to ham bhi sair-e-samaavaat chhoD dete hain

jab un ke gird kahaani tavaaf karne lage

to darmiyaan se koi baat chhoD dete hain

· · ·

bayaabaan duur tak main ne sajaayaa thaa

magar vo shahr ke raste se aayaa thaa

diye ki aarzu ko jab bujhaayaa thaa

phir us ke baad aahaT thi na saaya thaa

· · ·

hijr ke tapte mausam mein bhi dil un se vaabasta hai

ab tak yaad kaa pattaa pattaa Daali se paivasta hai

muddat guzri duur se main ne ek safina dekhaa thaa

ab tak khvaab mein aa kar shab bhar dariyaa mujh ko Dastaa hai

· · ·

raat us ke saamne mere sivaa bhi main hi thaa

sab se pahle main gayaa thaa dusraa bhi main hi thaa

main mukhaalif samt mein chaltaa rahaa huun umr bhar

aur jo us tak gayaa vo raasta bhi main hi thaa

· · ·

soe hue jazbon ko jagaanaa hi nahin thaa

ai dil vo mohabbat kaa zamaana hi nahin thaa

mahke the charaagh aur dahak uTThi thiin kaliyaan

go sab ko khabar thi use aanaa hi nahin thaa

· · ·

aankh se bichhDe kaajal ko tahrir banaane vaale

mushkil mein paD jaaeinge tasvir banaane vaale

ye divaana-pan to rahegaa dasht ke saath safar mein

saae mein so jaaeinge zanjir banaane vaale

· · ·

har ek pal ki udaasi ko jaantaa hai to aa

mire vajud ko tu dil se maantaa hai to aa

vafaa ke shahr mein ab log jhuuT bolte hain

tu aa rahaa hai magar sach ko maantaa hai to aa

· · ·

shauq barahna-paa chaltaa thaa aur raste pathrile the

ghiste ghiste ghis gae aakhir kankar jo nokile the

khaar-e-chaman the shabnam shabnam phuul bhi saare giile the

shaakh se TuuT ke girne vaale patte phir bhi piile the

· · ·

kashti bhi nahin badli dariyaa bhi nahin badlaa

aur Dubne vaalon kaa jazba bhi nahin badlaa

tasvir nahin badli shisha bhi nahin badlaa

nazrein bhi salaamat hain chehraa bhi nahin badlaa

· · ·

kuchh be-tartib sitaaron ko palkon ne kiyaa taskhir to kyaa

vo shakhs nazar bhar ruk na sakaa ehsaas thaa daaman-gir to kyaa

kuchh bante miTte daaere se ik shakl hazaaron tasvirein

sab naqsh o nigaar uruuj pe the aankhein thiin zavaal-pazir to kyaa

· · ·

sote hain vo aaina le kar khvaabon mein baal banaate hain

saada se parinde ki khaatir kyaa reshmi jaal banaate hain

ummid ki sukhti shaakhon se saare patte jhaD jaaeinge

is khauf se apni tasvirein ham saal-ba-saal banaate hain

· · ·

yuun to sadaa-e-zakhm baDi duur tak gai

ik chaaraagar ke shahr mein jaa kar bhaTak gai

khushbu giraft-e-aks mein laayaa aur us ke baa'd

main dekhtaa rahaa tiri tasvir thak gai

· · ·

phir vahi kahne lage tu mire ghar aayaa thaa

chaand jin chaar gavaahon ko nazar aayaa thaa

rang phulon ne chune aap se milte julte

aur bataate bhi nahin kaun idhar aayaa thaa

· · ·